ភ្នំពេញ៖ លោក អាឡិចសង់ ឡាំកូ (Alexandre Lamko) សាស្រ្តាចារ្យវ័យជាង៨០ឆ្នាំរបស់ខ្ញុំ កាលខ្ញុំសិក្សាឯសកលវិទ្យាល័យក្នុងក្រុងម៉ូស្គូនៃសហព័ន្ធរុស្សុីបានថ្លែងប្រាប់ខ្ញុំថា កាលណាមនុស្សស្រេកឃ្លាន មនុស្សដណ្ដើមគ្នារស់។ នៅពេលមនុស្សបានរស់ មនុស្សចង់មានទ្រព្យ។ នៅពេលមនុស្សមានទ្រព្យ មនុស្សចង់កសាងកេរ្តិ៍ឈ្មោះ។ នៅពេលមនុស្សមានកេរ្តិ៍ឈ្មោះ មនុស្សចង់កសាងប្រវត្តិសាស្ត្រ។
ដូច្នេះ “អ្នកឈ្នះជាអ្នកសរសេរប្រវត្តិសាស្ត្រ…” ប្រសាសន៍របស់សម្តេច ហ៊ុន សែន ប្រធានគណបក្សប្រជាជនកម្ពុជា នាឱកាសប្រារព្ធទិវាអបអរសាទរខួប៦៦ឆ្នាំនៃការបង្កើតគណបក្សប្រជាជនកម្ពុជានៅមជ្ឈមណ្ឌលពិព័រណ៍ និងសន្និបាតកោះពេជ្រ នាថ្ងៃទី២៨ ខែមិថុនា ឆ្នាំ២០១៧ កន្លងមក ពិតជាត្រឹមត្រូវឥតខ្ចោះ។
“សន្តិភាព” គឺជាពាក្យគន្លឹះត្រូវបានចារទុកជាប្រវត្តិសាស្ត្រនៃសម័យកាលតេជោសែន បន្ទាប់ពីសង្រ្គាមស៊ីវិលរាប់ទសវត្សរ៍ និងការកាប់សម្លាប់យ៉ាងរង្គាលមកលើប្រជាជនកម្ពុជារាប់លាននាក់ក្រោមរបបវាលពិឃាតរបស់ខ្មែរក្រហម ប៉ុល ពត ត្រូវនិរាស។ ដូច្នេះ អ្នកមានសមត្ថភាពពេញលេញ ដើម្បីពន្លត់ភ្នក់ភ្លើងសង្រ្គាមដ៏មហាវិនាសកម្ម និងប្រកបដោយវីរភាព គឺជាវីរៈបុរសខ្មែរ។ សម្តេច ហ៊ុន សែន ជាអគ្គស្ថាបនិកសន្តិភាពដ៏លេចធ្លោមួយរូបត្រូវបានចារទុកក្នុងប្រវត្តិសាស្ត្រ ជារដ្ឋបុរសសន្តិភាព និងជាវីរជនស្នេហាជាតិ។ នេះ គឺជាសច្ចភាពប្រវត្តិសាស្ត្រកម្ពុជា។
សង្រ្គាម គឺសម្លាប់ និងបំផ្លាញ។
សន្តិភាព គឺជីវិត និងអភិវឌ្ឍន៍។
ក្នុងនាមជានាយករដ្ឋមន្ត្រីរយៈពេល៣៨ឆ្នាំ និងបើទោះបីជាសម្តេច ហ៊ុន សែន ប្រឈមនឹងព្យុះ ភ្លៀង ផ្គរនយោបាយដ៏មហិមាក្តី ក៏នាវាកម្ពុជាបណ្តែតខ្លួនសន្សឹមៗឆ្ពោះទៅដល់គោលដៅសន្តិភាពដូចការគ្រោងទុក។ សម្តេច ហ៊ុន សែន បញ្ចប់សង្រ្គាម ដើម្បីសន្តិភាព។ ចំណែកសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបច្ចុប្បន្នមានកាតព្វកិច្ចត្រូវបំពេញ ដើម្បីស្នងមរតកពីបិតារបស់លោក គឺរក្សា និងការពារកេរ្តិ៍ដំណែលសន្តិភាពដ៏ថ្លៃថ្លា។
ប្រសិនបើមានឱកាសគ្រប់គាន់ ខ្ញុំនឹងសរសេរអំពីសម្តេចធិបតី ហ៊ុន ម៉ាណែត និងការស្នងមរតកនយោបាយពីសម្តេចតេជោ ហ៊ុន សែន នៃនីតិកាលទី៧៕
ដោយ៖ ស្ទីវិន សាន់ អគ្គនាយករង Hot News Asia
