នាយករដ្ឋមន្ត្រី៖ សមិទ្ធផលបេសកកម្មការងារ ក្នុងកិច្ចប្រជុំកំពូលអាស៊ាន នៅឥណ្ឌូនេស៊ី ជាសមិទ្ធផលសម្រាប់ពលរដ្ឋខ្មែរទាំងមូល

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា សមិទ្ធផលជោគជ័យនៃបេសកកម្មការងារ ក្នុងកិច្ចប្រជុំកំពូលអាស៊ាន នៅឥណ្ឌូនេស៊ី ជាសមិទ្ធផលសម្រាប់ប្រជាពលរដ្ឋខ្មែរទាំងមូល មិនមែនទៅដើម្បីសម្ញែងនោះទេ តែដើម្បីប្រយោជន៍ជាតិ ។

ក្នុងឱកាសបន្តចុះជួបកម្មករជិត ២ម៉ឺននាក់ នៅខេត្តកំពង់ស្ពឺ នាថ្ងៃទី៩ ខែកញ្ញា ឆ្នាំ២០២៣សម្តេចមហាបវរធិបតី ហ៊ុន ម៉ាណែត បានថ្លែងថា «ខ្ញុំឃើញមានការអត្ថាធិប្បាយច្រើនណាស់ ពាក់ព័ន្ធនឹងការធ្វើទស្សនកិច្ចរបស់ខ្ញុំ ទៅចូលរួមកិច្ចប្រជុំកំពូលអាស៊ាន នៅប្រទេសឥណ្ឌូនេស៊ី ហើយខ្ញុំអរគុណដល់ប្រជាពលរដ្ឋទូទាំងប្រទេស ក៏ដូចជាមិត្តបរទេសមួយចំនួន តាមសារព័ត៌មាន ដែលបានវាយតម្លៃខ្ពស់ទៅលើសមិទ្ធផលនៃទស្សនកិច្ច។ សមិទ្ធផលដែលខ្ញុំទៅធ្វើនេះ មិនមែនជាសមិទ្ធផលសម្រាប់ខ្ញុំទេ គឺជាសមិទ្ធផលសម្រាប់កម្ពុជា ព្រោះខ្ញុំទៅក្នុងនាមជានាយករដ្ឋមន្ត្រីនៃកម្ពុជា ក្នុងនាមជាប្រមុខ និងជាតំណាងជាន់ខ្ពស់ប្រជាជនកម្ពុជា អីចឹងសមិទ្ធផលដែលទទួលនេះ គឺសម្រាប់ប្រជាជនខ្មែរយើងទាំងអស់ ហើយយើងបានទទួលនូវការគាំទ្រ និងការស្វាគមន៍យ៉ាងកក់ក្តៅពីបណ្តាប្រទេសទាំងអស់ នៅលើពិភពលោកដែលចូលរួមក្នុងកិច្ចប្រជុំនៅទីនោះ ទាំងមហាអំណាអាមេរិក ជប៉ុន អូស្ត្រាលី ឥណ្ឌា និងប្រទេសផ្សេងៗទៀត»

សម្តេចគូសបញ្ជាក់ថា «សំណួរសួរថា តើឯកឧត្តម ហ៊ុន ម៉ាណែត ទៅហ្នឹងទៅធ្វើអី? មេដឹកនាំប្រទេសមួយៗ ទៅចូលប្រជុំ ពីមុនសម្តេចតេជោ ទៅប្រជុំរាល់ដងធ្វើអី ? ទៅគ្រាន់តែធ្វើការងារបង្ហាញរូបភាព ស្លៀកពាក់ស្អាត ចូលរួមថតរូប អត់ទេ សាច់រឿងដែលថ្នាក់ដឹកនាំប្រទេសនីមួយ រួមទាំងខ្ញុំ ដែលជាតំណាងកម្ពុជា យើងទៅនេះ គឺមិនមែន ដើម្បីសម្តែង សម្ញែងនោះទេ ប៉ុន្តែទៅធ្វើការងារសំខាន់ ដើម្បីប្រទេសជាតិ» ៕