សម្ដេចធិបតី ហ៊ុន ម៉ាណែត៖ ការជួយទីម័រឡេស្ត ក៏ជាមោទនភាពរបស់កម្ពុជា ព្រោះកម្ពុជា យល់យ៉ាងច្បាស់អំពីស្ថានភាព និងបរិការណ៍ ដែលទីម័រឡេស្ត កំពុងស្ថិតនៅ នាពេលបច្ចុប្បន្ន
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងថា ការជួយប្រទេសទីម័រឡេស្តនេះ ក៏ជាមោទនភាពរបស់កម្ពុជាផងដែរ ព្រោះកម្ពុជាដែលបានឆ្លងកាត់ សោកវិនាសកម្ម ១០០០ជំពូក យល់យ៉ាងច្បាស់អំពីស្ថានភាព និង បរិការណ៍ ដែលប្រទេសទីម័រឡេស្ត កំពុងស្ថិតនៅ នាពេលបច្ចុប្បន្ន។
សម្ដេចមហាបវរធិបតី ហ៊ុន ម៉ាណែត បានថ្លែងក្នុងជួបសម្តែងការគួរសមជាមួយ ឯកឧត្តម កៃ រ៉ាឡា ហ្សាណាណា ហ្គូសម៉ៅ (Kay Rala Xanana Gusmão) នាយករដ្ឋមន្ត្រី នៃសាធារណរដ្ឋប្រជាធិបតេយ្យទីម័រឡេស្ត នាល្ងាចថ្ងៃពុធ ៦រោច ខែស្រាពណ៍ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី៦ ខែកញ្ញា ឆ្នាំ២០២៣ នៅរដ្ឋធានីហ្សាការតា នៃសាធារណរដ្ឋឥណ្ឌូណេស៊ី។
សម្ដេចធិបតី ក៏បានថ្លែងអំណរគុណយ៉ាងជ្រាលជ្រៅចំពោះការអបអរសាទរ និងការកោតសរសើរចំពោះប្រទេសកម្ពុជា និងសម្ដេចតេជោ។ ក្នុងន័យនេះ ក្រោមការដឹកនាំរបស់សម្ដេចធិបតី កម្ពុជានឹងបន្តគាំទ្រ និងជួយជ្រោមជ្រែងដល់ប្រទេសទីម័រឡេស្តបន្ថែមទៀត ជាពិសេស សម្រាប់ដំណើរការនៃការ រៀបចំខ្លួន ចូលជាសមាជិកអាស៊ាន ឱ្យបាននាពេលខាងមុខ ៕
