ឯកឧត្តម វ៉ាន់ មុនីនាថ កិច្ចប្រជុំរដ្ឋមន្ត្រីបរិស្ថានអាស៊ានលើកទី១៧ កិច្ចប្រជុំថ្នាក់រដ្ឋមន្ត្រីលើកទី១៨ ស្តីពីការបំពុលផ្សែងអ័ព្ទឆ្លងដែន(COP-18) និងកិច្ចប្រជុំពាក់ព័ន្ធ

ភ្នំពេញ៖ នៅថ្ងៃទី២២-២៤ ខែកក្កដា ឆ្នាំ២០២៣ ឯកឧត្តម វ៉ាន់ មុនីនាថ រដ្ឋលេខាធិការក្រសួងបរិស្ថាន តំណាងឯកឧត្តមរដ្ឋមន្រ្តីក្រសួងបរិស្ថាន បានដឹកនាំគណៈប្រតិភូអន្តរក្រសួង ចូលរួមកិច្ចប្រជុំរដ្ឋមន្ត្រីបរិស្ថានអាស៊ានលើកទី១៧ កិច្ចប្រជុំថ្នាក់រដ្ឋមន្ត្រីលើកទី១៨ ស្តីពីការបំពុលផ្សែងអ័ព្ទឆ្លងដែន(COP-18) និងកិច្ចប្រជុំពាក់ព័ន្ធនៅទីក្រុងវៀងចន្ទន៍ ប្រទេសឡាវ។

ជាលទ្ធផលអង្គប្រជុំបានអនុម័តឯកសារសំខាន់ៗមួយចំនួនដូចខាងក្រោម៖
១-សេចក្តីថ្លែងការណ៍រួមអាស៊ាន ស្តីពីការប្រែប្រួលអាកាសធាតុសម្រាប់កិច្ចប្រជុំលើកទី២៨ (COP-28) នៃអនុសញ្ញាក្របខណ្ឌសហប្រជាជាតិស្តីពីការប្រែប្រួលអាកាសធាតុ
២-ការដាក់បញ្ជូលឧទ្យានជាតិរដ្ឋសមាជិកអាស៊ានចំនួន០២ទៅជាឧទ្យានបេតិកភណ្ឌអាស៊ាន
៣-កម្មវិធីយុទ្ធសាស្រ្តអាស៊ាន-ជប៉ុន ស្តីពីការប្រែប្រួលអាកាសធាតុ និងបរិស្ថាន
៤-ផែនការសកម្មភាពអាស៊ាន ស្តីពីប្រភេទទន្រ្ទានរាតត្បាត
៥-ផែនទីបង្ហាញផ្លូវគ្មានផ្សែងលើកទី២ (២០២៣-២០៣០)
៦-យុទ្ធសាស្រ្តដីមមោគអាស៊ានលើកទី២ (២០២៣-២០៣០)
៧-ផែនការការងារស្តីពីបរិស្ថាន និងការប្រែប្រួលអាកាសធាតុ
៨-ការចុះហត្ថលេខាលើកិច្ចព្រមព្រៀងនៃការបង្កើតមជ្ឈមណ្ឌលអាស៊ាន ស្តីពីការប្រែប្រួលអាកាសធាតុ និងមជ្ឈមណ្ឌលសម្របសម្រួលអាស៊ាន ស្តីពីការត្រួតពិនិត្យការបំពុលផ្សែងអ័ព្ទឆ្លងដែន។

នៅក្នុងពិធីប្រគល់ពានរង្វាន់អាស៊ានសម្រាប់រដ្ឋសមាជិកអាស៊ាន ព្រះរាជាណាចក្រកម្ពុជា គឺលោក ហែម សុភេម និងលោកស្រី ឱក សុចិន្តា បានទទួលពានរង្វាន់ជើងឯកយុវជនអេកូអាស៊ាន និងសាលាបឋមសិក្សាគំរូក្រុង និងសាលាវិទ្យាល័យ ហ៊ុន សែន មិត្តភាព ខេត្តព្រះសីហនុ បានទទួលពានរង្វាន់សាលាមេត្រីបរិស្ថានលើកទី៤។

កិច្ចប្រជុំរដ្ឋមន្ត្រីបរិស្ថានអាស៊ានលើកទី១៧ កិច្ចប្រជុំថ្នាក់រដ្ឋមន្ត្រីលើកទី១៨ ស្តីពីការបំពុលផ្សែងអ័ព្ទឆ្លងដែន(COP-18) និងកិច្ចប្រជុំពាក់ព័ន្ធ មានការចូលរួមពីរដ្ឋមន្រ្តី ឬតំណាងជាន់ខ្ពស់រដ្ឋសមាជិកទាំង១០ អគ្គលេខាធិការរងអាស៊ាន នាយកប្រតិបត្តិមជ្ឈមណ្ឌលអាស៊ានជីវៈចម្រុះ អាស៊ានបូកបីចិន ជប៉ុន និងកូរ៉េ សរុបចំនួនជាង ៣០០នាក់ ៕