កាណាដាទាមទារឱ្យក្រុមហ៊ុន Meta លុបចោលការហាមឃាត់លើព័ត៌មានដើម្បីអនុញ្ញាតឱ្យចែករំលែកព័ត៌មានអំពីភ្លើងឆេះព្រៃ
កាណាដា៖ ទីភ្នាក់ងារព័ត៌មាន Reuters បានរាយការណ៍ថា រដ្ឋាភិបាលកាណាដាបានអំពាវនាវឱ្យក្រុមហ៊ុន Meta លុបចោលការហាមឃាត់របស់ខ្លួនលើការចែករំលែកព័ត៌មានក្នុងស្រុកនៅលើវេទិការបស់ខ្លួន ដោយលើកឡើងពីការព្រួយបារម្ភអំពីផលប៉ះពាល់លើព័ត៌មានភ្លើងឆេះព្រៃដ៏ធ្ងន់ធ្ងរនៅតំបន់ភាគខាងលិចនៃប្រទេស។
ថ្មីៗនេះ ក្រុមហ៊ុន Meta បានអនុវត្តប្លុកព័ត៌មាននៅលើវេទិកា Facebook និង Instagram របស់ខ្លួនសម្រាប់អ្នកប្រើប្រាស់កាណាដាទាំងអស់ ដើម្បីឆ្លើយតបទៅនឹងច្បាប់ថ្មីដែលតម្រូវឱ្យក្រុមហ៊ុនអ៊ីនធឺណិតយក្សផ្តល់សំណងសម្រាប់អត្ថបទព័ត៌មាន។
អ្នកស្រុកនៅក្នុងទីក្រុង Yellowknife ភាគខាងជើងដាច់ស្រយាលដែលប្រឈមមុខនឹងភ្លើងឆេះព្រៃបានត្អូញត្អែរទៅកាន់ប្រព័ន្ធផ្សព្វផ្សាយក្នុងស្រុកដោយបញ្ជាក់ថាការហាមឃាត់បានរារាំងពួកគេពីការផ្សព្វផ្សាយព័ត៌មានសំខាន់ៗទាក់ទងនឹងភ្លើងតាមរយៈវេទិកាទាំងនេះ។
រដ្ឋមន្ត្រីបេតិកភណ្ឌ Pascale St-Onge បានរិះគន់ការសម្រេចចិត្តរបស់ក្រុមហ៊ុន Meta ថា មិនប្រុងប្រយ័ត្ន និងធ្វើឱ្យប៉ះពាល់ដល់ការទទួលបានព័ត៌មានសំខាន់ៗនៅលើ Facebook និង Instagram។
នាងបានបន្តថា ជម្រើសដែលមិនប្រុងប្រយ័ត្នរបស់ក្រុមហ៊ុន Meta ក្នុងការទប់ស្កាត់ព័ត៌មាន កំពុងតែធ្វើឱ្យប៉ះពាល់ដល់ការចូលប្រើព័ត៌មានសំខាន់ៗនៅលើ Facebook និង Instagram។
នាងបានជំរុញឱ្យក្រុមហ៊ុន Meta ស្តារការចែករំលែកព័ត៌មានជាបន្ទាន់ ដើម្បីសុវត្ថិភាពរបស់ជនជាតិកាណាដាប្រឈមមុខនឹងភាពអាសន្ននេះ ដោយសង្កត់ធ្ងន់លើតម្រូវការសម្រាប់ព័ត៌មានបន្ថែមទៀតនៅក្នុងស្ថានភាពធ្ងន់ធ្ងរនេះ។
រដ្ឋមន្ត្រីដឹកជញ្ជូន លោក Pablo Rodriguez បានបន្ទរពីកង្វល់ទាំងនេះ ដោយគូសបញ្ជាក់ថា ការហាមប្រាមនេះបានបណ្តាលឱ្យមនុស្សខ្វះលទ្ធភាពទទួលបានព័ត៌មានសំខាន់ៗ។
Chris Bittle សមាជិកសភាមកពីគណបក្សសេរីនិយមដែលកំពុងកាន់អំណាចក៏បានថ្កោលទោសសកម្មភាពរបស់ក្រមហ៊ុន Meta ថាជា មិនប្រុងប្រយ័ត្ន និងគ្មានការទទួលខុសត្រូវ។
Ollie Williams ដែលជាប្រតិបត្តិករនៃស្ថានីយ៍ឌីជីថល Cabin Radio របស់ Yellowknife បានរាយការណ៍ថា បុគ្គលបានប្រើការចែករំលែករូបថតអេក្រង់នៃព័ត៌មាននៅលើ Facebook ចាប់តាំងពីពួកគេមិនអាចចែករំលែកតំណភ្ជាប់ព័ត៌មាន។
ជាការឆ្លើយតប អ្នកនាំពាក្យក្រុមហ៊ុន Meta បានទំនាក់ទំនងតាមរយៈអ៊ីមែលថា ក្រុមហ៊ុនបានដំណើរការមុខងារ Safety Check នៅលើ Facebook ដែលអនុញ្ញាតឱ្យអ្នកប្រើប្រាស់ជូនដំណឹងដល់អ្នកដទៃអំពីសុវត្ថិភាពរបស់ពួកគេក្នុងអំឡុងពេលគ្រោះមហន្តរាយធម្មជាតិ ឬវិបត្តិនានា។
អ្នកនាំពាក្យរូបនេះបានបន្ថែមថា ប្រជាជនកាណាដានៅតែអាចចូលប្រើមាតិកាពីភ្នាក់ងាររដ្ឋាភិបាលផ្លូវការ សេវាសង្គ្រោះបន្ទាន់ និងអង្គការមិនមែនរដ្ឋាភិបាលនៅលើ Facebook និង Instagram។
ក្រុមហ៊ុន Meta បានអះអាងថា អ្នកប្រើប្រាស់ជាចម្បងមិនប្រើវេទិការបស់ពួកគេសម្រាប់ព័ត៌មាន ហើយអះអាងថាការបង្ខំឱ្យក្រុមហ៊ុនបង់ប្រាក់សម្រាប់មាតិកាដែលបានចែករំលែកនឹងមិនមាននិរន្តរភាពសម្រាប់អាជីវកម្មរបស់ខ្លួន។
ប្រភព៖ Live Mint
ប្រែសម្រួលដោយ៖ {ឡាយ លីហួ}