ឯកឧត្ដមបណ្ឌិត ជា ចាន់តូ អញ្ជើញបូកសរុបលទ្ធផលនៃការបោះឆ្នោតជ្រើសតាំងតំណាងរាស្ត្រនីតិកាលទី៧ នៅខេត្តកំពង់ធំ

ភ្នំពេញ៖ ឯកឧត្ដមបណ្ឌិត ជា ចាន់តូ សមាជិកគណៈអចិន្រ្តៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ធំ នាព្រឹកថ្ងៃទី២០ ខែសីហា ឆ្នាំ២០២៣ បានអញ្ជើញជាអធិបតីក្នុងពិធីប្រជុំបូកសរុបលទ្ធផលនៃការបោះឆ្នោតជ្រើសតាំងតំណាងរាស្ត្រនីតិកាលទី៧ នៅខេត្តកំពង់ធំ ដោយមានការចូលរួមពីតំណាងរាស្រ្តជាប់ឆ្នោត សមាជិកព្រឹទ្ធសភា ក្រុមការងារគណបក្ស គណៈកម្មាធិការគណបក្ស គ្រប់ផ្នែក គ្រប់ថ្នាក់ និងសមាជិក សមាជិកាគណបក្ស ក្នុងខេត្តកំពង់ធំ ចំនួន ២,១៦០នាក់។

ឯកឧត្តមបណ្ឌិតប្រធាន បានអបអរសាទរដល់ជ័យជំនះនៃការបោះឆ្នោត និងកោតសរសើរដល់ថ្នាក់ដឹកនាំ និងសមាជិក សមាជិកាគណបក្សទាំងអស់ នៃខេត្តកំពង់ធំ ដែលបានធ្វើការងារយ៉ាងសកម្ម ដើម្បីទទួលបានការគាំទ្រពីប្រជាជន ជាពិសេសបានផ្តាំផ្ញើឲ្យបន្តចុះមូលដ្ឋានជាប្រចាំ និងចូលរួមជាមួយរដ្ឋាភិបាលក្នុងអាណត្តិថ្មី ក្នុងការបន្តថែរក្សាសន្តិភាព និងការអភិវឌ្ឍ។

ឯកឧត្តម សួស យ៉ារ៉ា តំណាងរាស្រ្តជាប់ឆ្នោត មណ្ឌលខេត្តកពង់ធំ បានចូលរួមយោបល់ នៅក្នុងរបាយការណ៍បូកសរុប និងបានសង្កត់ធ្ងន់លើការលើកកម្ពស់ការងារសង្គមកិច្ច និងសេវាសុខាភិបាល ជូនប្រជាជន ក្រោមក្របខណ្ឌនៃអាទិភាពរបស់រាជរដ្ឋាភិបាល។

ឯកឧត្តមក៏បានរំលឹកទៅដល់ក្រុមគ្រូពេទ្យស្ម័គ្រចិត្តនៃសមាគមន៍ក្រុមគ្រូពេទ្យស្ម័គ្រចិត្តខេត្តឃ្យុងសាងប៊ុកដូ សាធារណរដ្ឋកូរ៉េ ដែលបានចុះពិនិត្យ និងព្យាបាលជំងឺជូនប្រជាពលរដ្ឋ និងមន្ត្រីរាជការ នៅមន្ទីពេទ្យបង្អែកខេត្តកំពង់ធំ រយៈពេល៣ថ្ងៃចាប់ពីថ្ងៃទី១១ ដល់ថ្ងៃទី១៣ ខែសីហា ឆ្នាំ២០២៣ ជូនប្រជាពលរដ្ឋសរុប​ ៣៦១០នាក់ ដោយមានការចូលរួមសម្របសម្រួលដោយ លោកជំទាវ ឃួន ឃុនឌី សមាជិការព្រឹទ្ធសភា ឯកឧត្តម ញឹក បានខេង និងឯកឧត្តម ងួន រាសី​ អភិបាលរងខេត្ត ដែលជាតំណាង ឯកឧត្តម ងួន​ រតនៈ​ អភិបាលខេត្តកំពង់ធំ​ មន្ទីរសុខាភិបាល មន្ទីរពេទ្យបង្អែកខេត្ត សមាគមប្រឹក្សាសុខភាពប្រជាជន សហភាពសហព័ន្ធយុវជនកម្ពុជាខេត្តកំពង់ធំ និងកងកម្លាំង។

ឯកឧត្តម សួស យ៉ារ៉ា នឹងព្យាយាមអញ្ជើញគ្រូពេទ្យស្ម័គ្រចិត្តមកជួយពិនិត្យ និងព្យាបាលជូនប្រជាជនក្នុងខេត្តកំពង់ធំ ជាបន្តទៀត ៕