ក្រុមអ្នកជំនាញធ្វើការពង្រឹងរចនាសម្ព័ន្ធខឿនជ្រុងនិរតី និងទប់ស្កាត់ការហូរច្រោះនៃល្បាយដីខ្សាច់ពីខាងក្នុងគ្រឹះរួតទី៣ នៃប្រាសាទបាយ័ន

ភ្នំពេញ៖ ក្រុមអ្នកជំនាញ នៃអាជ្ញាធរជាតិអប្សរាបានធ្វើការពង្រឹងរចនាសម្ព័ន្ធខឿនជ្រុងនិរតី និងទប់ស្កាត់ការហូរច្រោះ នៃល្បាយដីខ្សាច់ពីខាងក្នុងគ្រឹះរួតទី៣ នៃប្រាសាទបាយ័ន បន្ទាប់ពីអ្នកជំនាញកត់សម្គាល់ឃើញថា មានទីតាំងមួយចំនួននៅជុំវិញខឿនរួតនោះ មានល្បាយដីខ្សាច់ហូរច្រោះចេញតាមចន្លោះជញ្ជាំង ក្រោយពេលមានភ្លៀងដែលវាអាចនឹងបង្កជាហានិភ័យដល់ប្រាសាទនេះ។

ស្ថាបត្យករ និងជាក្រុមការងារបច្ចេកទេសជួសជុលខឿនរួតទី៣ របស់ប្រាសាទបាយ័ន កញ្ញា ម៉េង សុវណ្ណលីលីន មានប្រសាសន៍ថា កាលពីចុងឆ្នាំ២០២១កន្លងមក ក្រុមការងារធ្លាប់បានសម្អាតកំណកដីនៅតាមប្រព័ន្ធបង្ហូរទឹកជុំវិញរួតទី៣ ប្រាសាទបាយ័នម្តងរួចហើយ ប៉ុន្តែមួយឆ្នាំក្រោយមក យើងសង្កេតឃើញមានល្បាយដីខ្សាច់នៅតែបន្តហូរច្រោះចេញមកតាមជញ្ជាំងខឿនរួតទី៣ នៃប្រាសាទបាយ័នដដែល ដែលវាជាមូលហេតុចម្បងនាំឱ្យមានការពង្រឹងខឿនជ្រុងនិរតីនៃរួតទី៣នេះឡើងវិញ។

កញ្ញា ម៉េង សុវណ្ណលីលីន បានបន្តថា ក្រុមអ្នកជំនាញនៃអាជ្ញាធរជាតិអប្សរា បានសិក្សាស្រាវជ្រាវ ដើម្បីរកឱ្យឃើញថា មូលហេតុអ្វី ដែលបណ្ដាលឱ្យដីខ្សាច់ហូរច្រោះបែបនេះ។ ក្នុងនោះមានមូលហេតុសំខាន់ៗមួយចំនួន ដូចជា៖
ទី១.បញ្ហាឬសឈើកាលពីអតីតកាលបានដុះចាក់ចូលទៅក្នុងរចនាសម្ព័ន្ធធ្វើឱ្យថ្មមួយចំនួនរំកិលចេញពីទីតាំងដើម និងបង្កើតបានជាប្រហោងនៅតាមចន្លោះថ្ម។
ទី២.បញ្ហាទឹកហូរច្រោះចូលទៅតាមប្រហោងថ្ម ដែលអាចនាំល្បាយដីខ្សាច់ចេញមកក្រៅបាន
ទី៣.បាយអស៊ីម៉ងត៍ដែលបានបំពេញនៅតាមចន្លោះថ្មកម្រាលដោយអ្នកអភិរក្សជនជាតិបារាំងដល់បច្ចុប្បន្នអស់គុណភាព ដែលធ្វើឱ្យបរិមាណទឹកភ្លៀងហូរចូលទៅខាងក្នុងខឿនច្រើនលើសកម្រឹត។
ទី៤.ដីគ្រឹះខាងក្នុងជាប្រភេទដីខ្សាច់សុទ្ធ និងមានគ្រាប់រាងធំ កាលណាខ្សាច់មានគ្រាប់ធំពុំមានគ្រាប់ទំហំតូច គឺវាមិនសូវមានភាពស្អិតល្អទេ ពេលមានភ្លៀងម្តងៗទឹកងាយនឹងហូរនាំល្បាយដីខ្សាច់ចេញទៅតាមប្រហោងថ្ម។

កិច្ចការនេះ បានចាប់ផ្ដើមតាំងពីចុងឆ្នាំ២០២២មក ដោយធ្វើការរើថ្មដែលក្រៀកចេញរួចរៀបចូលទីតាំងវិញដើម និងការយកសំណាកដីផ្នែកខាងក្នុងខឿនទៅធ្វើការវិភាគ ដើម្បីឱ្យដឹងថា តើស្រទាប់ដីជម្រៅណាមានសភាពខ្សោយដែលត្រូវពង្រឹងឡើងវិញនោះ?
ជាច្រើនខែមកនេះ ក្រុមអ្នកជំនាញបានរើថ្មបង្កាន់ដៃនាគ ថ្មកម្រាល និងជញ្ជាំងខឿនមួយផ្នែកដែលក្រៀកចេញ ដើម្បីពិនិត្យមើលស្ថានភាពជញ្ជាំងថ្មបាយក្រៀមដោយរើ និងរៀបថ្មភក់ ថ្មបាយក្រៀម ដែលមួយផ្នែកឡើងវិញ រួចបិទបាយអនៅតាមចន្លោះថ្ម ដើម្បីការពារដីខាងក្នុងកុំឱ្យហូរចេញទៀត។

មកដល់បច្ចុប្បន្ន ជាផែនការបន្តក្រុមអ្នកជំនាញកំពុងត្រៀមធ្វើការបុកបង្ហាប់ដីខាងក្នុងឡើងវិញ រួចរៀបថ្មដែលបានរើចូលទីតាំងទៅតាមរចនាសម្ព័ន្ធវិញ និងការងារបិទបាយអនៅតាមចន្លោះថ្មកម្រាល ដើម្បីកាត់បន្ថយបរិមាណទឹកភ្លៀងហូរចូលទៅក្នុងគ្រឹះ ៕