ភ្នំពេញ៖ គណៈឃោសនាអប់រំគណៈកម្មាធិការកណ្តាល នាព្រឹកថ្ងៃទី ១៤ ខែសីហា ឆ្នាំ ២០២៣ បានបើកវគ្គអប់រំនយោបាយរបស់គណបក្សកម្រិត២ ជំនាន់ទី៣ ក្រោមអធិបតីភាព ឯកឧត្តមបណ្ឌិតសភាចារ្យ អ៊ុក រ៉ាប៊ុន សមាជិកគណៈអចិន្រ្តៃយ៍នៃគណៈកម្មាធិការកណ្តាល។ ដោយមានការអញ្ជើញចូលរួមពី ឯកឧត្តមជាប្រធាន អនុប្រធានគណៈជុំវិញគណៈកម្មាធិការកណ្តាល ដោយមានសិក្ខាកាមចូលរួម ចំនួន ១២៥នាក់ សុទ្ធសឹងជាមន្ត្រីរបស់គណបក្សមកពីក្រសួង ស្ថាប័ន រាជធានី ខេត្ត ក្រុង សុ្រក ខណ្ឌ។
មានប្រសាសន៍នាឱកាសនោះ ឯកឧត្តមបណ្ឌិតសភាចារ្យ អ៊ុក រ៉ាប៊ុន បានសម្តែងនូវសេចក្តីសោមនស្សរីករាយក្រៃលែង ដោយបានចូលរួមជាអធិបតីក្នុងពិធីបើកវគ្គអប់រំនយោបាយរបស់គណបក្សកម្រិត២ ជំនាន់ទី៣។
ឯកឧត្តមបណ្ឌិតសភាចារ្យ ក៏បានពាំនាំនូវការផ្តាំផ្ញើរសួរសុខទុក្ខ និងជូនពរពីសំណាក់សម្តេចប្រធានគណបក្ស សម្តេចប្រធានកិត្តិយសគណកប្ស និងថ្នាក់ដឹកនាំគណបក្ស ជូនចំពោះសិក្ខាកាម ក៏ដូចមន្ត្រីបម្រើការងារក្នុងវគ្គនេះ ប្រកបដោយសេចក្តីនឹករឭក និងស្រឡាញ់ដ៏ជ្រាលជ្រៅ។
ឯកឧត្តមបណ្ឌិតសភាចារ្យ មានប្រសាសន៍ថា វគ្គអប់រំនយោបាយរបស់គណបក្សកម្រិត២ ត្រូវបានរៀបចំឡើង ដើម្បីផ្តល់ឱកាសឲ្យមន្រ្តីដែលបានឆ្លងវគ្គកម្រិត១ រួចហើយ បានលើកកម្ពស់ការយល់ដឹងរបស់ខ្លួនមួយកម្រិតថែមទៀត។ ការងារកសាង និងពង្រឹងជួរមន្រ្តីគណបក្ស ជាការងារដ៏មានសារៈសំខាន់មួយដែលគណបក្សតែងតែយកចិត្តទុកដាក់តាំងពីដើមរៀងមក ជាពិសេសសម្រាប់បរិបទថ្មី ការងារនេះកាន់តែមានសារៈសំខាន់ ដើម្បីធានាជោគជ័យរបស់គណបក្សទាំងក្នុងពេលបច្ចុប្បន្ន ក៏ដូចទៅអនាគត។
ដូច្នេះការអប់រំនយោបាយដល់មន្រ្តីគណបក្ស ត្រូវតែប្រកាន់ខ្ជាប់នូវចរិតគណបក្ស ចរិតវិទ្យាសាស្រ្ត ចរិតឯកភាពរវាងទ្រឹស្តី និងភាពជាក់ស្តែង និងចរិតតស៊ូថែមទៀត ទើបការងារនេះទទួលបានលទ្ធផលឆ្លើយតបនឹងសំណូមពរនៃការអប់រំនយោបាយដល់មន្រ្តីគណបក្ស ជាពិសេសមន្រ្តីបន្តវេន។
ឯកឧត្តមបណ្ឌិតសភាចារ្យ បានមានប្រសាសន៍បន្តទៀតថា ថ្វីវគ្គអប់រំនយោបាយនៅពេលនេះ មានរយៈពខ្លី ប៉ុន្តែជាឱកាសមួយដ៏មានតម្លៃសម្រាប់សិក្ខាកាមគ្រប់ៗរូបបានរៀនសូត្រលើកកម្ពស់ការយល់ដឹង អំពីបញ្ហាសំខាន់ៗចាំបាច់មួយចំនួនសម្រាប់ធ្វើជាមូលដ្ឋាននៃការត្រិះរិះពិចារណា ការអនុវត្ត និងការផ្សព្វផ្សាយអប់រំបន្តដល់សមាជិកគណបក្ស និងប្រជាជន។ ព្រមជាមួយនេះ វគ្គអប់រំនយោបាយក៏ជាឱកាសដែលមន្រ្តីយើងមកពីក្រសួង ស្ថាប័ន រាជធានី ខេត្ត បានស្គាល់គ្នា បានផ្លាស់ប្តូរការយល់ដឹង និងបទពិសោធន៍ពីគ្នាទៅវិញទៅមក ព្រមទាំងរឹតចំណងសាមគ្គីភាពផ្ទៃក្នុងគណបក្សឲ្យកាន់តែរឹងមាំឡើងថែមទៀត។
ការបោះឆ្នោតជ្រើសតាំងតំណាងរាស្រ្តនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ កន្លងទៅនេះ ឯកឧត្តមបណ្ឌិតសភាចារ្យបណ្ឌិត បានលើកឡើងថា ជាការបោះឆ្នោតមួយដែលបានប្រព្រឹត្តទៅដោយជោគជ័យប្រកបដោយលក្ខណៈសេរី ត្រឹមត្រូវ និងយុត្តិធម៌។ ឆ្លងតាមលទ្ធផលនៃការបោះឆ្នោតនេះ បានបញ្ជាក់ថា ប្រជាជនដ៏ច្រើនលើសលុបនៅតែគាំទ្រការដឹកនាំដ៏ត្រឹមត្រូវរបស់គណបក្សប្រជាជនកម្ពុជា គាំទ្រសម្ដេចអគ្គមហាសេនាបតីតេជោ ហ៊ុន សែន និងគាំទ្រឯកឧត្តមបណ្ឌិត ហ៊ុន ម៉ាណែត អ្នកបន្តវេនដឹកនាំរបស់គណបក្សប្រជាជនកម្ពុជា ៕
