ឯកឧត្តម ឆាយ ថន ដឹកនាំកិច្ចប្រជុំបូកសរុបលទ្ធផលការបោះឆ្នោតជ្រើសតាំងតំណាងរាស្ត្រនីតិកាលទី៧ នៃរដ្ឋសភា ឆ្នាំ២០២៣ មណ្ឌលខេត្តកំពង់ស្ពឺ

ភ្នំពេញ៖ ឯកឧត្តមកិត្តិសេដ្ឋាបណ្ឌិត ឆាយ ថន ប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ នាព្រឹកថ្ងៃទី១២ ខែសីហា ឆ្នាំ២០២៣ បានអញ្ជើញដឹកនាំកិច្ចប្រជុំបូកសរុបលទ្ធផលការបោះឆ្នោតជ្រើសតាំងតំណាងរាស្ត្រនីតិកាលទី៧ នៃរដ្ឋសភា ឆ្នាំ២០២៣ មណ្ឌលខេត្តកំពង់ស្ពឺ។ ដោយមានការអញ្ជើញចូលរួមពី ឯកឧត្ដម ហ៊ុន ម៉ានី អនុប្រធានទី១ ក្រុមការងារគណបក្សចុះជួយខេត្ត ឯកឧត្តម វ៉ី សំណាង ប្រធានគណៈកម្មាធិការគណបក្សខេត្ត ឯកឧត្ដម លោកជំទាវ អនុប្រធាន ក្រុមការងារគណបក្សចុះមូលដ្ឋានខេត្ត ឯកឧត្តម លោកជំទាវ អនុប្រធាន គណៈកម្មាធិការគណបក្សខេត្ត ឯកឧត្តម លោកជំទាវ ប្រធាន អនុប្រធានទី១ អនុប្រធានក្រុមការងារគណបក្សចុះមូលដ្ឋាន ក្រុង ស្រុក ព្រមទាំងឯកឧត្តម លោកជំទាវ លោក លោកស្រី ប្រធានក្រុមការងារគណបក្សចុះមូលដ្ឋានឃុំ សង្កាត់ សរុបប្រមាណ៥០០នាក់។

ថ្លែងក្នុងកិច្ចប្រជុំឯកឧត្តមកិត្តិសេដ្ឋាបណ្ឌិត ឆាយ ថន បានមានប្រសាសន៍ថា ក្នុងនាមជាប្រធានក្រុមការងារគណបក្សចុះមូលដ្ឋានខេត្ត និងក្នុងនាមខ្លួនខ្ញុំផ្ទាល់ ខ្ញុំសូមសម្តែងនូវការកោតសរសើរ និងវាយតម្លៃខ្ពស់ ចំពោះឯកឧត្តម ហ៊ុន ម៉ានី អនុប្រធានទី១ ក្រុមការងារគណបក្សចុះជួយខេត្ត ឯកឧត្តម វ៉ី សំណាង ប្រធានគណៈកម្មាធិការគណបក្សខេត្ត ឯកឧត្តមលោកជំទាវ លោក លោកស្រី ជាថ្នាក់ដឹកនាំក្រុមការងារ និងថ្នាក់ដឹកនាំគណបក្សគ្រប់លំដាប់ថ្នាក់នៃខេត្តកំពង់ស្ពឺ ដែលបានខិតខំបំពេញការងារអស់ពីកម្លាំងកាយ និងស្មារតី ប្រកបដោយការទទួលខុសត្រូវខ្ពស់ ចូលរួមថែរក្សាបាននូវសុខសន្តិភាព សណ្តាប់ធ្នាប់សាធារណៈ និងសុវត្តិភាពសង្គមបានល្អប្រសើរ នៅគ្រប់ដំណាក់កាល ដូចបានកំណត់ក្នុងប្រតិទិនសម្រាប់អនុវត្តផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ជាពិសេសការដណ្តើមបាននូវជ័យជម្នះគួរជាទីមោទនៈជូនគណបក្សប្រជាជនកម្ពុជា ស្របតាមការប្តេជ្ញាចិត្តជាយុទ្ធសាស្ត្ររបស់បក្សដែលមាន ៦/៦អាសនៈ មានសំឡេងគាំទ្រគណបក្សប្រជាជនកម្ពុជា ៤៣៨,៧៤៣ សំឡេងស្មើនឹង ៨៤.៤៩% ធៀបនឹងសន្លឹកឆ្នោតបានការ ក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ ដែលទើបតែបានបញ្ចប់នាពេលថ្មីៗនេះ ដែលប្រព្រឹត្តទៅប្រកបដោយជោគជ័យ ក្រោមបរិយាកាសស្ងប់ស្ងាត់ សេរី យុត្តិធម៌និងគ្មានអំពើហិង្សា ដោយបានបង្ហាញដល់មជ្ឍដ្ឋានជាតិ និងអន្តរជាតិ ពីភាពកាន់តែចាស់ទុំ និងភាពជាម្ចាស់ការ របស់ព្រះរាជាណាចក្រកម្ពុជា ក្នុងការរៀបចំការបោះឆ្នោតដោយសេរី យុត្តិធម៌និងតម្លាភាព ស្របតាមការប្តេជ្ញាចិត្តយ៉ាងមុតមាំរបស់គណបក្សប្រជាជនកម្ពុជា ក្នុងការអនុវត្តគោលការណ៍នៃលទ្ធិប្រជាធិបតេយ្យ សេរី ពហុបក្ស ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា ៕