ពលរដ្ឋរងគ្រោះដោយខ្យល់កន្ត្រាក់ ២៤ គ្រួសារ ក្នុងស្រុកកំពង់សៀម និងស្រុកចំការលើ ទទួលបានការឆ្លើយតប ពី សាខាកាកបាទក្រហមកម្ពុជាខេត្តកំពង់ចាម

ភ្នំពេញ៖ កាលពីព្រឹកថ្ងៃទី១០ ខែសីហា ឆ្នាំ២០២៣ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានចាត់អោយលោកជំទាវ ប៉ាង ដានី អនុប្រធានអចិន្ត្រៃយ៍សាខា រួមដំណើរដោយ លោកនាយកប្រតិបត្តិសាខា លោក លោកស្រី ប្រធានអនុសាខាស្រុក ក្រុមកាកបាទក្រហមកម្ពុជាឃុំ និងអ្នកស្ម័គ្រចិត្ត បានអញ្ជើញចុះជួបសួរសុខទុក្ខ ប្រជាពលរដ្ឋរងគ្រោះដោយខ្យល់កន្ត្រាក់ចំនួន ២១គ្រួសារ នៅ ៣ឃុំ ក្នុងស្រុកកំពង់សៀម និង នៅ ឃុំបុសខ្នុរ ស្រុកចំការលើ ចំនួន ៣គ្រួសារ។

ហេតុការណ៍នេះ បានកើតឡើង កាលពីល្ងាច ថ្ងៃទី ៧ ខែសីហា ឆ្នាំ២០២៣ ខណ:ដែលភ្លៀងកំពុងធ្លាក់ ក៏ស្រាប់តែមានខ្យល់កន្ត្រាក់យ៉ាងខ្លាំង បក់គួចបំប៉ើង ធ្វើអោយផ្ទះ ៦៣ ខ្នង រងការខូចខាត ដោយមានការដួលរលំ របើកដំបូល សង្កសី និងរបើកក្បឿង ជាដើម។

ភ្លាមៗ នោះ ឯកឧត្តម អ៊ុន ចាន់ដា ប្រធានគណ:កម្មាធិការសាខា បានចាត់លោកនាយកសាខា ចុះសហការ ធ្វើការពិនិត្យវាយតម្លៃស្ថានភាពរងគ្រោះក្នុងបណ្តាឃុំពាក់ព័ន្ធនៃស្រុកទាំង ២ ឡើងវិញ ហើយចុងក្រោយ ក៏បានសម្រេចធ្វើការឆ្លើយតប ចំពោះពលរដ្ឋដែលរងគ្រោះកម្រិតធ្ងន់ ២គ្រួសារ និង មធ្យម ២២គ្រួសារ តាមរយៈ ការផ្តល់អំណោយជាគ្រឿងឧបភោគបរិភោគនិងថវិកាមួយចំនួន សម្រាប់សម្រួលដល់ការស្តារ និង ជួសជុលលំនៅដ្ឋាន បងប្អូន ឡើងវិញ ។ ក្រៅពីនេះ នៅមានពលរដ្ឋ ៣៩គ្រួសារទៀត ការខូចខាតមានកម្រិតស្រាល ដែលម្ចាស់ផ្ទះមានលទ្ធភាពជួសជុលខ្លួនឯងបាន។

លោកជំទាវ ប៉ាង ដានី បានចូលរួម សម្តែងការសោកស្តាយជា មួយ គ្រួសាររងគ្រោះ ចំពោះមហន្តរាយធម្មជាតិ ដែលកើតឡើងដោយស្មានមិនដល់នេះហើយ បានពាំនាំនូវប្រសាសន៍ផ្ដាំផ្ញើសួរសុខទុក្ខដោយក្តីអាណិតអាសូរ ពីសំណាក់ ឯកឧត្តម អ៊ុន ចាន់ដា ប្រធានគណ:កម្មាធិការសាខានិង ឯកឧត្តម ប៉ាន សូរស័ក្តិ ប្រធានកិត្តិយសសាខា ពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេច លោកតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋរងគ្រោះ និងងាយរងគ្រោះ ដោយមិនប្រកាន់វណ្ណៈ ជំនឿសាសនា ឬនិន្នាការនយោបាយអ្វីឡើយ ហើយលោក តែងបានចាត់តំណាង ចុះអន្តរាគមន៍ ផ្តល់ជំនួយសង្រ្គោះ ជួយសម្រាលទុក្ខលំបាក ទាន់ពេលវេលា តាមទិសស្លោក “ ទីណាមានទុក្ខលំបាក ទីនោះមានកាកបាទក្រហមកម្ពុជា ” និង ” មិនទុកនរណាម្នាក់ចោល ” ។

នៅគ្រប់កន្លែង និងតាមខ្នងផ្ទះ លោកជំទាវ អនុប្រធានអចិន្ត្រៃយ៍សាខា បានអំពាវនាវដល់ប្រជាពលរដ្ឋទាំងអស់ ត្រូវរក្សាអនាម័យស្អាត ៣យ៉ាង, កំចាត់ដង្កូវទឹក បំបាត់ជម្រកមូសខ្លា ដែលជាប្រភពចម្លងជម្ងឺគ្រុនឈីក គ្រុនឈាម ហើយបន្តអនុវត្តអោយបានខ្ជាប់ខ្ជួន តាមវិធានសុខាភិបាល ” ៣ការពារ ៣កុំ ” និង សូមចូលរួមចាក់វ៉ាក់សាំង ទាំងដូស មូលដ្ឋាន និងដូសជំរុញអោយបានគ្រប់ៗគ្នា ។

ពិនិត្យលើស្ថានភាពជាក់ស្តែង លោកជំទាវ ប៉ាង ដានី បានផ្តល់ជូនពលរដ្ឋ១៥គ្រួសារ ដែលរងគ្រោះផង ហើយមានជីវភាពខ្សត់ខ្សោយផង ក្នុង ១គ្រួសារ ទទួលបាន ៖ អង្ករ ២៥គីឡូក្រាម , មី ១កេស ,ទឹកត្រី ១យួរ ,ទឹកសុីអុីវ ១យួរ , ត្រីខ ១០កំប៉ុង, ឃីត ១ សម្រាប់, អាវយឺតចំនួន ៤ និង ថវិកាមួយចំនួន ។ ដោយឡែក ៩គ្រួសារទៀត ក៏បានជួយឧបត្ថម្ភ ជាថវិកា មួយចំនួន សម្រាប់ ជួសជុលដំបូលផ្ទះឡើងវិញ ។

លោកជំទាវអនុប្រធានអចិន្ត្រៃយ៍សាខា ក៏បានឆ្លៀតអញ្ជើញសួរសុខទុក្ខស្ត្រីម្ចាស់ផ្ទះរងគ្រោះម្នាក់ នៅភូមិ ១០មករាលើ ឃុំបុសខ្នុរ ដែលមានជម្ងឺរលាកខួរឆ្អឹងខ្នង ហើយបាន ១០០,០០០ រៀល ផងដែរ៕