ភ្នំពេញ៖ កាលពីល្ងាចថ្ងៃទី៨ ខែសីហា ឆ្នាំ២០២៣ មានករណីគ្រោះថ្នាក់ចរាចរណ៍មួយ កើតឡើងត្រង់ចំណុចភូមិភ្នំខ្លែង ឃុំព្រៃស្លឹក ស្រុកទ្រាំង ខេត្តតាកែវ រវាងរថយន្ត និងម៉ូតូបញ្ច្រាសទិសគ្នា។
រថយន្តមួយគ្រឿងម៉ាកហីយ៉ាន់ដាយ ពណ៌ខៀវ ស៊េរី. 1,5 ton ពាក់ស្លាកលេខតាកែវ2A-5897 បើកបរដោយឈ្មោះសា រ៉ាន់ភេទប្រុសអាយុ 24 ឆ្នាំមុខរបរបើកបររថយន្ត រស់នៅភូមិចុងថ្នល់ សង្កាត់រកាក្នុង ក្រុងដូនកែវ ខេត្តតាកែវ បានចុះរត់គេចខ្លួនបាត់។
មុនពេលកើតហេតុរថយន្តនេះបានបើកបរមកពីទិសខាងជើងទៅទិសខាងត្បូងពេលមកដល់ត្រង់ចំណុចកើតហេតុក៏បានបត់ឆ្វេងស្របពេលនោះក៏មានម៉ូតូមួយគ្រឿងបានបើកបរមកពីទិសខាងត្បូងមកទិសខាងជើងបានបុករថយន្តចំពីមុខពេញទំហឹងបណ្ដាលឲ្យអ្នកបើកបរម៉ូតូនោះខ្ទប់ទៅកញ្ចក់រថយន្តរួចក៏ធ្លាក់ទៅលើផ្លូវរងរបួសជាទម្ងន់។
ម៉ូតូម៉ាកហុងដាc125 ពណ៌ខ្មៅ ស៊េរី 2023 ពាក់ផ្លាកលេខភ្នំពេញ1kc-0387 បើកបរដោយឈ្មោះ ហ៊ន ប៊ុនហេង ភេទប្រុសអាយុ 30 ឆ្នាំមុខរបរ ជាងមាស រស់នៅភូមិកំពង់ជ្រៃ ឃុំស្មោង ស្រុកទ្រាំងខេត្តតាកែវ រងរបួសធ្ងន់ (មិនពាក់មួកសុវត្ថិភាព) អ្នករងរបួសត្រូវបានបងប្អូនសាច់ញាតិដឹកបញ្ជូន យកទៅសង្គ្រោះនៅមន្ទីរពេទ្យបង្អែកខេត្តតាកែវ។ រីឯវត្ថុតាងត្រូវបានយកមករក្សាទុកនៅអធិការដ្ឋាននគរបាលស្រុកទ្រាំងរងចាំកសាងសំណុំរឿងតាមនីតិវិធី ។
ចំពោះមូលហេតុ បណ្ដាលឲ្យមានគ្រោះថ្នាក់នេះកើតឡើង គឺមកពីរថយន្តបើកបរមិនប្រកាន់ស្ដាំ ។
