ឯកឧត្តមបណ្ឌិត ចែម វីឌ្យ៉ា ប្រាប់នាយកមូលនិធិ KAS ពីកិច្ចដំណើរការនៃបង្កើតរាជរដ្ឋាភិបាលកម្ពុជា អាណត្តិទី៧

ភ្នំពេញ៖ ឯកឧត្តមបណ្ឌិត ចែម វីឌ្យ៉ា រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៣ ខែសីហា ឆ្នាំ២០២៣ បានទទួលជួប លោក Jason Chumtong នាយកមូលនិធិ Konrad-Adenauer-Stiftung (KAS) ថ្មីប្រចាំកម្ពុជា សម្តែងការគួរសមនៅទីស្តីការក្រសួង។

ឯកឧត្តមបណ្ឌិត ចែម វីឌ្យ៉ា បានថ្លែងនូវអំណរអរគុណជូនអង្គការ KAS ដែលបានផ្តល់ជំនួយដ៏មានតម្លៃជូនប្រទេស កម្ពុជា តាំងពីឆ្នាំ ១៩៩៤មក ដែលផ្តោតលើយុវជន នីតិរដ្ឋ អភិបាលកិច្ច និងសារព័ត៌មាន ហើយថ្មីៗនេះ ផ្តោតលើការការពារបរិស្ថាន សេដ្ឋកិច្ចឌីជីថល និងទំនាក់ទំនងអន្តរជាតិ។

ឯកឧត្តមបណ្ឌិតក៏បានជម្រាបជូនភ្ញៀវបានជ្រាបអំពីលក្ខណៈប្រជាធិបតេយ្យនៃប្រព័ន្ធនយោបាយនៅកម្ពុជា ដែលបានឆ្លុះបញ្ចាំងតាមរយៈរដ្ឋធម្មនុញ្ញ និងការបោះឆ្នោតថ្នាក់ឃុំសង្កាត់ និងថ្នាក់ជាតិជាទៀងទាត់ ដោយរាប់បញ្ចូលទាំងការបោះឆ្នោតសកលកាលពីថ្ងៃអាទិត្យ ទី២៣ ខែកក្កដា ឆ្នាំ២០២៣ ហើយដែលបានប្រព្រឹត្តទៅដោយសុខសាន្ត មានតម្លាភាព លក្ខណៈសេរី និងយុត្តិធម៌។ ឯកឧត្តមក៏បានជម្រាបជូនពីកិច្ចដំណើរការនៃបង្កើតរាជ
រដ្ឋាភិបាលថ្មីផងដែរ។

លោក Jason Chumtong បានជម្រាបជូនអំពីសកម្មភាពរបស់មូលនិធិ KAS នៅកម្ពុជា និងបានបង្ហាញអំពីឆន្ទៈរបស់មូលនិធី KAS ក្នុងការធ្វើការជាមួយរដ្ឋាភិបាលថ្មី ដើម្បីពង្រឹងទំនាក់ទំនងរវាង កម្ពុជា និង អាល្លឺម៉ង់ បន្ថែមទៀត។

ភាគីទាំងពីរបានឯកភាពសហការគ្នា ធ្វើបទបង្ហាញស្តីពីបញ្ញាសិប្បនិម្មិត និងសេដ្ឋកិច្ចការទូតឌីជីថល។