ឯកឧត្តម សួន រស្មី អញ្ជេីញដឹកនាំកិច្ចប្រជុំផ្សព្វផ្សាយចែករំលែកស្តីពី”វិធីសាស្ត្រអធិការកិច្ច ការកសាងទម្រង់របាយការណ៍អធិការកិច្ច និងទម្រង់កំណត់ហេតុអធិការកិច្ច”
ភ្នំពេញ៖ ឯកឧត្តម សួន រស្មី អគ្គាធិការ នៃអគ្គាធិការដ្ឋានក្រសួងមុខងារសាធារណៈ នៅថ្ងៃទី២៧ ខែកក្កដា ឆ្នាំ២០២៣ បានអញ្ជេីញជាអធិបតីដឹកនាំកិច្ចប្រជុំផ្សព្វផ្សាយចែករំលែកស្តីពី”វិធីសាស្ត្រអធិការកិច្ច ការកសាងទម្រង់របាយការណ៍អធិការកិច្ច និងទម្រង់កំណត់ហេតុអធិការកិច្ច”។
កិច្ចប្រជុំផ្សព្វផ្សាយមានការចូលរួមពី ឯកឧត្តម លោក លោកស្រី ជាអគ្គាធិការរង ប្រធាននាយកដ្ឋាន អធិការ អនុប្រធាននាយកដ្ឋាន ប្រធានការិយាល័យ អនុប្រធានការិយាល័យ និងមន្ត្រីរាជការទាំងអស់ នៃអគ្គាធិការដ្ឋាន សរុប៦៤នាក់។
ជាកិច្ចដំបូង លោក ម៉ុត សារៈ ប្រធាននាយកដ្ឋានរដ្ឋបាល នៃអគ្គាធិការដ្ឋាន បានឡេីងអានរបាយការណ៍ពាក់ព័ន្ធនឹងវគ្គបណ្តុះបណ្តាល និងកម្មវិធីផ្សព្វផ្សាយចែករំលែកចំណេះដឹង។
ជាកិច្ចបន្ត ជាការធ្វេីបទបង្ហាញផ្សព្វផ្សាយចែករំលែកចំណេះដឹងពាក់ព័ន្ធនឹងប្រធានបទដូចជា:
១-វិធីសាស្ត្រអធិការកិច្ច ធ្វេីបទបង្ហាញដោយ លោក ភួង ពិទូ អគ្គាធិការរង
២-ការកសាងទម្រង់របាយការណ៍អធិការកិច្ច ធ្វេីបទបង្ហាញដោយ លោក អោ សំបូរ អនុប្រធាននាយកដ្ឋាន
៣-ទម្រង់កំណត់ហេតុអធិការកិច្ច ធ្វេីបទបង្ហាញដោយលោក ទី រ៉ាណាត អគ្គាធិការរង។
ក្នុងឱកាសនោះ ឯកឧត្តម សួន រស្មី អគ្គាធិការ បានមានមតិថ្លែងថា ការរៀបចំកិច្ចប្រជុំផ្សព្វផ្សាយចែករំលែកចំណេះដឹង និងពិសោធន៍នៅថ្ងៃនេះ ក្នុងគោលបំណងសម្រាប់ការសិក្សាស្រាវជ្រាវឱ្យយល់ដឹងកាន់តែច្បាស់ពីការងារអធិការកិច្ច ដែលជាមូលដ្ឋាននៃការកសាងលិខិតបទដ្ឋានពាក់ព័ន្ធការងារអធិការកិច្ចឱ្យមានលក្ខណៈគត់មត់ គ្រប់ជ្រុងជ្រោយ ជាពិសេសសម្រាប់ថ្នាក់ដឹកនាំ និងមន្ត្រីរាជការទាំងអស់នៃអគ្គាធិការដ្ឋាន ដែលជាកក្តាជំរុញអភិវឌ្ឍសមត្ថភាព និងបានជ្រួតជ្រាបស្វែងយល់កាន់តែច្បាស់ពីការអនុវត្តការងារអធិការកិច្ចមុខងារសាធារណៈ។
ទន្ទឹមនឹងនោះ ឯកឧត្តមអគ្គាធិការ បានថ្លែងការកោតសរសេីរចំពោះ ឯកឧត្តម លោក លោកស្រី ដែលបានឡេីងមកធ្វេីបទបង្ហាញចែករំលែកចំណេះដឹង ដល់ថ្នាក់ដឹកនាំ និងមន្ត្រីរាជការទាំងអស់នៃអគ្គាធិការដ្ឋាន។
មុននឹងបញ្ចប់ ឯកឧត្តមអគ្គាធិការ បានណែនាំ និងសំណូមពរ ដល់ មន្ត្រីរាជការទាំងអស់នៃអគ្គាធិការដ្ឋាន សូមបន្តខិតខំអនុវត្តការងារប្រកបដោយការទទួលខុសត្រូវខ្ពស់ សិក្សាស្រាវជ្រាវច្បាប់ និងលិខិតបទដ្ឋានគតិយុត្តពាក់ព័ន្ធជាធរមានដេីម្បីមានមូលដ្ឋានសម្រាប់កសាងលិខិតបទដ្ឋានគតិយុត្ត ពិសេសសម្រាប់អនុវត្តការងារអធិការកិច្ចមុខងារសាធារណៈ។
ជាចុងបញ្ចប់ ឯកឧត្តម សួន រស្មី អគ្គាធិការ បានប្រគល់លិខិតថ្លែងអំណរគុណចំពោះ លោក ទី រ៉ាណាត លោក ភួង ពិទូ និងលោក អោ សំបូរ ដែលបានធ្វេីបទបង្ហាញផ្សព្វផ្សាយយ៉ាងយកចិត្តទុកដាក់លេីប្រធានបទទាំងបីខាងលេី ៕
