ស្ថានីយប្រព្រឹត្តិកម្មទឹកកខ្វក់ទី៣ ដែលមានសមត្ថភាពចម្រោះទឹកកខ្វក់បានក្នុងមួយថ្ងៃចំនួន ២,០០០០ម៉ែត្រគីប សាងសង់សម្រេចបាន៩៨ភាគរយហើយ

ព្រះសីហនុ៖ កាលពីល្ងាចថ្ងៃទី១១ ខែកក្កដា ឆ្នាំ២០២៣ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញចុះពិនិត្យសមិទ្ធផលនៃការស្ថាបនាស្ថានីយប្រព្រឹត្តិកម្មទឹកកខ្វក់នៅក្នុងភូមិសាស្ត្រក្រុងព្រះសីហនុ ខេត្តព្រះសីហនុ អមដំណើរដោយអភិបាលរងខេត្ត លោកប្រធានមន្ទីរជំនាញពាក់ព័ន្ធ ក្រុមការងារជំនាញ និងក្រុហ៊ុនសាងសង់ ។

ឯកឧត្តម គួច ចំរើន អភិបាលខេត្តព្រះសីហនុបានអោយដឹងថាសមត្ថភាព នៃស្ថានីយប្រព្រឹត្តកម្មទី៣ មានសមត្ថភាពផលិតទឹកកខ្វក់បានក្នុងមួយថ្ងៃចំនួន ២,០០០០ម៉ែត្រគីប ហើយក៏ជាបច្ចេកវិទ្យាចុងក្រោយរបស់ប្រទេសអីស្រាអែល។ ទឹកកខ្វក់ដែលប្រមូលមកពីតាមគេហដ្ឋានប្រជាពលរដ្ឋ ផ្ទះសំណាក់ សណ្ឋាគារមួយផ្នែកដែលនៅជុំវិញស្ថានីយប្រព្រឹត្តិកម្មទី១ ដើម្បីធ្វើការបំលែងទៅជាទឹកមួយដែលមានគុណភាពមិនបំពុលបរិស្ថានហូរចូលទៅសមុទ្រ ទឹកដែលបានចម្រោះរួចយើងអាចយកទៅចិញ្ចឹមត្រីក្រឹមបានថែមទៀតផង។

សូមបញ្ជាក់ថា រាជរដ្ឋាភិបាលកម្ពុជា តាមរយៈគណៈកម្មាធិការជាតិអភិវឌ្ឍតំបន់ឆ្នេរសមុទ្រកម្ពុជា បានសាងសង់ស្ថានីយប្រព្រឹត្តកម្មទឹកកខ្វក់ចំនួនបីនៅក្នុងក្រុងព្រះសីហនុ បច្ចុប្បស្ថានិយ៍ប្រព្រឹត្តិកម្មចំនួនពីរបានដាក់ឱ្យដំណើរការក្នុងនោះ ស្ថានីយទី១ មានសមត្ថភាពផលិតទឹកកខ្វក់ក្នុងមួយថ្ងៃបានចំនួន ៥២០០ម៉ែត្រគីប ស្ថានីយទី២ ផលិតទឹកកខ្វក់បាន ៧២០០ម៉ែត្រគីប និងស្ថានីយទី៣ ២,០០០០ម៉ែត្រគីប ហើយស្ថានីយទី៣នេះ កំពុងដំណើការសាងសង់បាន៩៥ភាគរយ ជិតរួចរាល់ និងដាក់សម្ភោធសប្រើប្រាស់ខាងមុខ។

តាមការបញ្ជាក់របស់ លោក សេង វិបុល ជាប្រធានគ្រប់គ្រងការសាងសង់គម្រោងអាប្រព្រឹតិ្តកម្មទី៣ ដោយក្រុមហ៊ុន X-Water Technology Co.,Ltd (កូនខ្មែរ) ឲ្យដឹងថា ការសាងសង់គម្រោងស្ថានីយប្រព្រឹត្តិកម្មទឹកសំណល់ទី៣ នៅខេត្តព្រះសីហនុ សម្រេចបាន ៩៨ ភាគរយ ទាំងមេការនិច និងសំណង់ នៃគម្រោងសាងសង់សរុប គិតត្រឹមថ្ងៃទី១១ ខែកក្ដដា ឆ្នាម២០២៣ ហើយគ្រោងនឹងបញ្ចប់នៅចុងខែកក្តដា ឆ្នាំ២០២៣ ហើយស្ថានីយប្រព្រឹត្តិកម្មទឹកសំណល់ទី៣ មានទីតាំងនៅអូរប៉ោយឈើទាល មានសមត្ថភាពផលិតទឹកបាន២០,០០០ម៉ែត្រគូបក្នុងមួយថ្ងៃ ទំហំដី១ហិចតា។

ចំណែកស្ថានីយប្រតិកម្មទឹកកខ្វក់ទី១ មានសមត្ថភាពសម្អាតទឹកកខ្វក់ ក្នុងមួយថ្ងៃ បាន៥.២០០ម៉ែត្រគូប ក្នុងមួយថ្ងៃ។

ក្រុមហ៊ុនបានបញ្ជាក់ទៀតថា ការសាងសង់ស្ថានីយនេះ បានចាប់ផ្តើមបន្ទាប់ពីស្ថានីយប្រព្រឹត្តិកម្មទី ១ និងទី ២ ត្រូវបានដាក់ឱ្យដំណើរការ ហើយស្ថានីយប្រព្រឹត្តិកម្មនេះនឹងចម្រោះ និងធ្វើប្រព្រឹត្តិកម្មទឹក មុនពេលដែលវាត្រូវបានបង្ហូរចូលទៅក្នុងសមុទ្រ។ គម្រោងនេះត្រូវបានបង្កើតឡើងដោយគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា៕