អាល្លឺម៉ង់បញ្ជូនទ័ពទៅអូស្ត្រាលីជាលើកដំបូង ខណៈក្រុងប៊ែរឡាំងប្តូរការផ្តោតទៅឥណ្ឌូប៉ាស៊ីហ្វិក
ប៊ែរឡាំង៖ ជាលើកដំបូង អាល្លឺម៉ង់នឹងបញ្ជូនកងទ័ពទៅកាន់ប្រទេសអូស្ត្រាលី ដែលជាផ្នែកនៃសមយុទ្ធរួមគ្នាជាមួយសមាជិកសេវាកម្មប្រមាណ ៣០,០០០នាក់ មកពីប្រទេសចំនួន១២ផ្សេងទៀត ដោយគូសបញ្ជាក់អំពីការបង្កើនការយកចិត្តទុកដាក់របស់ទីក្រុងប៊ែរឡាំង លើឥណ្ឌូប៉ាស៊ីហ្វិក ចំពេលមានភាពតានតឹងកើនឡើងជាមួយប្រទេសចិនក្នុង តំបន់នេះ។
ក្នុងរយៈពេលប៉ុន្មានឆ្នាំចុងក្រោយនេះ អាល្លឺម៉ង់មានវត្តមានយោធាកាន់តែច្រើននៅក្នុងឥណ្ឌូប៉ាស៊ីហ្វិក បើទោះបីជានេះមានន័យថាការដើរខ្សែពួររវាងសន្តិសុខ និងផលប្រយោជន៍សេដ្ឋកិច្ចរបស់ខ្លួនក៏ដោយ។
ប្រមុខកងទ័ពលោក Alfons Mais បានប្រាប់រ៉យទ័រក្នុងបទសម្ភាសន៍មួយដែលបានចេញផ្សាយកាលពីថ្ងៃចន្ទថា វាគឺជាតំបន់ដែលមានសារៈសំខាន់ខ្លាំងសម្រាប់ពួកយើងនៅក្នុងប្រទេសអាល្លឺម៉ង់ ក៏ដូចជាសម្រាប់សហភាពអឺរ៉ុប ដោយសារភាពអាស្រ័យគ្នានៃសេដ្ឋកិច្ចអូស្ត្រាលី។
ប្រទេសចិនគឺជាដៃគូពាណិជ្ជកម្មដ៏សំខាន់បំផុតរបស់ទីក្រុងប៊ែរឡាំង ហើយ ៤០% នៃពាណិជ្ជកម្មបរទេសរបស់អឺរ៉ុបបានហូរកាត់សមុទ្រចិនខាងត្បូង ដែលជាផ្លូវទឹកដែលជាចំណុចបង្គោលសម្រាប់ជម្លោះទឹកដីនៅឥណ្ឌូប៉ាស៊ីហ្វិក។
នៅឆ្នាំ២០២១ នាវាចម្បាំងអាល្លឺម៉ង់បានបើកចូលទៅក្នុងសមុទ្រចិនខាងត្បូងជាលើកដំបូងក្នុងរយៈពេលជិត ២០ឆ្នាំ។ កាលពីឆ្នាំមុន ទីក្រុងប៊ែរឡាំងបានបញ្ជូនយន្តហោះយោធាចំនួន ១៣ គ្រឿងទៅធ្វើសមយុទ្ធរួមគ្នានៅក្នុងប្រទេសអូស្ត្រាលី ដែលជាការដាក់ពង្រាយពេលវេលាសន្តិភាពដ៏ធំបំផុតរបស់កងកម្លាំងអាកាស។
លោក Alfons Mais បានឲ្យដឹងថា ទាហានអាល្លឺម៉ង់រហូតដល់ ២៤០ នាក់ ក្នុងចំណោមនោះ ទាហានឆ័ត្រយោង ១៧០ នាក់ និងទាហានម៉ារីន ៤០ នាក់នឹងចូលរួមក្នុងសមយុទ្ធ Talisman Saber ចាប់ពីថ្ងៃទី២២ ខែកក្កដាដល់ថ្ងៃទី៤ ខែសីហា ដែលជាសមយុទ្ធដ៏ធំបំផុតរវាងអូស្ត្រាលី និងសហរដ្ឋអាមេរិក ដែលធ្វើឡើងរៀងរាល់ពីរឆ្នាំម្តង។
ជនជាតិអាល្លឺម៉ង់នឹងហ្វឹកហាត់ក្នុងសង្គ្រាមព្រៃ និងប្រតិបត្តិការចុះចតជាមួយទាហានមកពីប្រទេសដូចជា ឥណ្ឌូនេស៊ី ជប៉ុន កូរ៉េខាងត្បូង បារាំង និងអង់គ្លេស។
លោក Alfons Mais បានបន្តថា យើងមានបំណងបង្ហាញថាយើងជាដៃគូដែលអាចទុកចិត្តបាន និងមានសមត្ថភាពដែលរួមចំណែកដល់ស្ថេរភាពនៃសណ្តាប់ធ្នាប់ដែលផ្អែកលើច្បាប់នៅក្នុងតំបន់។
នៅពេលសួរថា តើសារអ្វីដែលការដាក់ពង្រាយទ័ពអាឡឺម៉ង់ជាលើកដំបូងទៅអូស្ត្រាលីគឺត្រូវផ្ញើទៅប្រទេសចិន លោកបានគូសបញ្ជាក់ថា ទីក្រុងប៊ែរឡាំងមិនមានគោលបំណងចង់បង្កជម្លោះជាមួយនរណាម្នាក់ឡើយ។
ឧត្តមសេនីយឯករូបនេះបានបញ្ជាក់ថា ជាទូទៅវាសមហេតុផលក្នុងការស្វែងយល់ពីទស្សនៈដែលអ្នកដទៃមានចំពោះពិភពលោក ដោយបន្ថែមថាបញ្ហាប្រឈមផ្នែកសន្តិសុខនាពេលបច្ចុប្បន្ននេះគឺមិនសូវច្បាស់ជាងមុនឆ្នាំ ១៩៩០ ទេ។
លោក Alfons Mais គ្រោងនឹងទៅសួរសុខទុក្ខកងទ័ពអាល្លឺម៉ង់នៅប្រទេសអូស្ត្រាលី និងរោងចក្រ Rheinmetall (RHMG.DE) ដែលដំឡើងរថពាសដែក Boxer សម្រាប់កងទ័ពទាំងពីរនៅពាក់កណ្តាលខែកក្កដា មុនពេលធ្វើដំណើរទៅកាន់ប្រទេសជប៉ុន និងសិង្ហបុរី។
លោកបានបន្តថា ប្រទេសជប៉ុនគឺជាដៃគូដែលមានសក្តានុពលជាច្រើនសម្រាប់ការពង្រឹងកិច្ចសហប្រតិបត្តិការយោធាទ្វេភាគីរបស់យើង។ ចំពោះ Talisman Sabre កងទ័ពអាល្លឺម៉ង់បានបញ្ជារួចហើយដើម្បីត្រឡប់ទៅអូស្ត្រាលីវិញសម្រាប់សមយុទ្ធបន្ទាប់នៅឆ្នាំ២០២៥។
ប្រភព៖ Reuters
ប្រែសម្រួលដោយ៖ {ឡាយ លីហួ}
