សិង្ហបុរី៖ ព្រឹត្តិការណ៍កីឡាអូឡាំពិក Esports Week (OEW) បានបិទបញ្ចប់ក្នុងប្រទេសសិង្ហបុរីកាលពីថ្ងៃអាទិត្យ ដែលជាការបញ្ចប់វគ្គផ្តាច់ព្រ័ត្រសម្រាប់ព្រឹត្តិការណ៍កីឡាអូឡាំពិកឆ្នាំ ២០២៣។
ការប្រកួតវគ្គផ្តាច់ព្រ័ត្រមានកីឡាករជាង ១០០ នាក់ចូលរួមប្រកួតក្នុងកីឡានិម្មិតចំនួន ១០ ដែលរួមមានកីឡាបាញ់ធ្នូ បេស្បល អុក ជិះកង់ រាំ ម៉ូតូ ទូកក្តោង បាញ់ប្រហារ តេក្វាន់ដូ និងវាយកូនបាល់។
Wu Jingyu ម្ចាស់ជើងឯកតេក្វាន់ដូអូឡាំពិករបស់ប្រទេសចិន គឺជាអ្នកចូលរួមដ៏គួរឱ្យកត់សម្គាល់នៅក្នុងព្រឹត្តិការណ៍នេះ ហើយទទួលបានចំណាត់ថ្នាក់លេខ ៣ ក្នុងការប្រកួតនិម្មិត។
លោក Ng Ser Miang អនុប្រធានគណៈកម្មាធិការអូឡាំពិកអន្តរជាតិ (IOC) បានមានប្រសាសន៍ថា ព្រឹត្តិការណ៍នេះតំណាងឱ្យព្រឹត្តិការណ៍ប្រវត្តិសាស្ត្រមួយ ដោយបានកសាងស្ពានរវាងពិភពរូបវន្ត និងនិម្មិតនៃកីឡា។
លោក Ng Ser Miang បានកត់សម្គាល់ថា អ្នកលេងមកពីគ្រប់ទិសទីនៃពិភពលោកបានទទួលយកគុណតម្លៃកីឡាអូឡាំពិកនៃឧត្តមភាព មិត្តភាព និងការគោរព។ ពួកគេបានប្រកួតប្រជែងជាមួយគ្នា គាំទ្រគ្នាទៅវិញទៅមក និងបង្កើតមិត្តភាពថ្មី។ យើងសង្ឃឹមថាចំណងមិត្តភាពទាំងនេះនឹងបន្តកើនឡើង។
OEW ត្រូវបានផ្តួចផ្តើមដោយ IOC ដោយសហការជាមួយក្រសួងវប្បធម៌ សហគមន៍ និងយុវជន កីឡាសិង្ហបុរី និងក្រុមប្រឹក្សាអូឡាំពិកជាតិសិង្ហបុរី។
ប្រភព៖ Xinhua
ប្រែសម្រួលដោយ៖ [ឡាយ លីហួ]
