ព្រះមហាក្សត្រ៖ កម្ពុជាមានការជឿនលឿន ប្រជាពលរដ្ឋមានសេចក្តីសុខ ក្រោមការដឹកនាំរបស់សម្តេចតេជោ
ភ្នំពេញ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានមានព្រះរាជបន្ទូលកោតសរសើរជាខ្លាំងចំពោះការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
ក្នុងព្រះរាជដំណើរយាងសួរសុខទុក្ខប្រជាពលរដ្ឋនៅខេត្តក្រចេះ នាព្រឹកថ្ងៃទី២៦ ខែមិថុនា ឆ្នាំ២០២៣ ព្រះករុណាជាអម្ចាស់ជីវិតតម្កល់លើត្បូង បានមានព្រះរាជបន្ទូលកត់សម្គាល់ថា ក្រោមការដឹកនាំរបស់សម្តេចតេជោ និងសម្តេចកិត្តិព្រឹទ្ធបណ្ឌិត បានធ្វើឱ្យជាតិកម្ពុជាមានការរីកចម្រើនជឿនលឿន ហើយប្រជាពលរដ្ឋរស់នៅក្នុងសេចក្តីសុខក្សេមក្សាន្ត។
ក្នុងឱកាសដ៏វិសេសវិសាលនោះ ព្រះមហាក្សត្រ ក៏បានមានព្រះរាជបន្ទូលកោតសរសើរដល់ថ្នាក់ដឹកនាំ និងអាជ្ញាធរខេត្តក្រចេះ ដែលបានប្រឹងប្រែងអស់កម្លាំងកាយចិត្តក្នុងការបម្រើប្រជាពលរដ្ឋ ក៏ដូចជាអភិវឌ្ឍន៍ឱ្យមានការរីកចម្រើនលូតលាស់។
សូមបញ្ជាក់ថា នាព្រឹកថ្ងៃទី២៦ ខែមិថុនា ព្រះមហាក្សត្រ បានសព្វព្រះរាជហឫទ័យស្តេចយាង សួរសុខទុក្ខ និងប្រោសព្រះរាជទានព្រះរាជអំណោយ ជូនប្រជាកសិករខ្មែរ (ជនជាតិដើមភាគតិច មាន ខ្មែរ, គួយ, ព្នង, ខោញ) ប្រកបរបរធ្វើស្រែចម្ការប្រមាណ ៤១០ គ្រួសារ ស្ថិតនៅភូមិទ្រាប-សណ្តាយ ឃុំថ្មី ស្រុកចិត្របុរី ខេត្តក្រចេះ។
ព្រះអង្គក៏បានសព្វព្រះរាជហឫទ័យស្តេចយាងសួរសុខទុក្ខ និងប្រោសព្រះរាជទាន អំណោយជូនដល់លោកគ្រូអ្នកគ្រូ និងសិស្សានុសិស្ស ចំនួន ១៥៧នាក់។
នៅក្នុងឱកាសនោះ ព្រះមហាក្សត្រ បានប្រោសព្រះរាជទានព្រះរាជអំណោយ ជូនប្រជារាស្ត្រ ក្នុងមួយគ្រួសារៗ ទទួលបាន៖ អង្ករចំនួន ០១បាវ, ឃីតចំនួន ០១កញ្ចប់ (មុង ០១, ភួយ ០១, ក្រមា ០១, សារុង ០១), មីចំនួន ០២កេស, ត្រីខចំនួន ០១យួរ, តង់កៅស៊ូចំនួន ០១, ស្បែកជើងផ្ទាត់ចំនួន ០១គូ, អាវយឺត មានផ្លាកព្រះរាជអំណោយ ព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ចំនួន ០១, អាវរងារចំនួន ០១ និងថវិកាចំនួន ២០មុឺនរៀល។
បន្ថែមពីលើនោះ លោកគ្រូអ្នកគ្រូ និងសិស្សានុសិស្ស បានក្រាបបង្គំទូលថ្វាយសំណើសូមសាលារៀនថ្មី សង់ពីបេតុងចំនួន ១ខ្នង ៥បន្ទប់ និងបន្ទប់ទឹកចំនួន ៤បន្ទប់ផងដែរ ៕
