លោកជំទាវ ជូ ប៊ុនអេង៖ គុណបំណាច់នៃការរួមចំណែករបស់និវត្តជន និងអតីតយុទ្ធជនក្នុងក្រុងកំពង់ឆ្នាំង ដែលបានតស៊ូធ្វើពលិកម្មក្នុងគ្រប់សម័យកាល ដើម្បីបុព្វហេតុសន្តិភាព ស្ថេរភាព ការបង្រួបបង្រួម និងការអភិវឌ្ឍលើគ្រប់វិស័យ

ភ្នំពេញ៖ លោកជំទាវ ជូ ប៊ុនអេង ប្រធានក្នុងការងារថ្នាក់កណ្តាលគណបក្សប្រជាជនកម្ពុជា ចុះជួយក្រុងកំពង់ឆ្នាំង នាព្រឹកថ្ងៃអាទិត្យ ៨កើត ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៥ ខែមិថុនា ឆ្នាំ២០២៣ បានអញ្ជើញជាអធិបតីក្នុងពិធីសំណេះសំណាលជាមួយលោកគ្រូ អ្នកគ្រូ បំពាក់ឥស្សរិយយសជូនយោធិនចូលនិវត្តន៍ និងនាំយកនៅសំលៀកបំពាក់ឈុត ជូនប្រជាការពារ ក្នុងក្រុងកំពង់ឆ្នាំង ខេត្ដកំពង់ឆ្នាំង។

ពិធីនេះក៏មានការអញ្ជើញចូលរួមពី លោកជំទាវ សឿ សុជាតា អនុប្រធានក្រុមការងារ លោកជំទាវ ទួន សាអ៊ីម អនុប្រធានក្រុមករងារ លោកជំទាវ ផាត សុផានី ឯកឧត្តម លោកជំទាវ ជាអនុប្រធានក្រុមការងារថ្នាក់កណ្តាល និងថ្នាក់ខេត្តចុះមូលដ្ឋានក្នុងក្រុងកំពង់ឆ្នាំង ក្រុមប្រឹក្សាខេត្ត អភិបាលរងខេត្ត អភិបាលក្រុង និងមន្រ្តីរាជការ ពីមន្ទីរ ស្ថាប័ននានា ក្នុងក្រុងកំពង់ឆ្នាំង លោកគ្រូ អ្នកគ្រូ យោធិនចូលនិវត្តន៍ ប្រជាការពារ សរុបចំនួន ១,២២៣នាក់ នៅសាលប្រជុំមន្ទីរគណបក្សខេត្ត។

អញ្ជើញមានប្រសាសន៍សំណេះសំណាលនាឱកាសនោះ ក្នុងនាមរាជរដ្ឋាភិបាលកម្ពុជាក្រោមការដឹកនាំប្រកប ដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចចៅហ្វាវាំង គង់ សំអុល ប្រធានក្នុងការងារថ្នាក់ជាតិគណបក្សប្រជាជនកម្ពុជាចុះមូលដ្ឋានខេត្តកំពង់ឆ្នាំង លោកជំទាវបានថ្លែងអំណរគុណ និងកោតសរសើរ ចំពោះសាស្រ្ដចារ្យ លោកគ្រូ អ្នកគ្រូ ក្នុងក្រុងកំពង់ឆ្នាំង ដែលខិតខំបំពេញតួនាទី និងភារកិច្ចសម្រេចបានសមទ្ធផលថ្មីៗជាបន្តបន្ទាប់ និងប្រជាការពារក្នុងចូលរួមរក្សាបាននៅសន្តិសុខនៅតាមមូលដ្ឋាន រួមចំណែកធ្វើឱ្យសម្រេចបានជោគជ័យនូវគោលនយោបាយភូមិឃុំមានសុវត្ថិភាពរបស់ក្រសួងមហាផ្ទៃ ក៏ដូចជាការអនុវត្តគោលនយោបាយរបស់រាជរដ្ឋាភិបាលកម្ពុជា ក្នុងនីតិកាលទី៦នេះ។

ទន្ទឹមនឹងគ្នានោះដែរ លោកជំទាវប្រធានក្រុមការងារ ក៏បានគូសបញ្ជាក់អំពីគុណបំណាច់នៃការរួមចំណែករបស់និវត្តជន និងអតីតយុទ្ធជនក្នុងក្រុងកំពង់ឆ្នាំង ដែលបានតស៊ូធ្វើពលិកម្មក្នុងគ្រប់សម័យកាល ដើម្បីបុព្វហេតុសន្តិភាព ស្ថេរភាព ការបង្រួបបង្រួម និងការអភិវឌ្ឍលើគ្រប់វិស័យ ដែលថ្នាក់ដឹកនាំ និងមន្រ្តីរាជការជំនាន់ក្រោយបានចងចាំ និងកត់ត្រាទុកជាប្រវត្តិសាស្រ្ត ព្រមទាំងប្ដេជ្ញាបន្តពូនជ្រំការអភិវឌ្ឍជាតិឱ្យកាន់តែរីកចម្រើនសម្រាប់អ្នកជំនាន់ក្រោយ ៕