កម្លាំងជំនាញ នៃស្នងការខេត្តព្រះសីហនុ ចុះបង្ក្រាបករណីប៉ុនប៉ងមនុស្សឃាត (ប្រើកាំបិតកាប់បុរសជនជាតិចិន ០៣នាក់ ឲ្យរងរបួសធ្ងន់)

ភ្នំពេញ៖ នៅថ្ងៃទី១៧ ខែមិថុនា ឆ្នាំ២០២៣ វេលាម៉ោង ២០និង០០នាទី កម្លាំងជំនាញ នៃស្នងការដ្ឋាននគរបាលខេត្តព្រះសីហនុ បានទទួលព័ត៌មានថា នៅសណ្ឋាគារ ហ្សឺចៃជីង មានទីតាំងស្ថិតនៅ ភូមិ២ សង្កាត់២ ក្រុងព្រះសីហនុ ខេត្តព្រះសីហនុ មានករណីជនជាតិចិនមួយក្រុមមានគ្នាប្រហែលជាង ១០នាក់ បានធ្វើសកម្មភាព ដោយប្រើកាំបិត កាប់ទៅលើបុរសជនជាតិចិន ០៣នាក់ បណ្តាលឲ្យរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីពេទ្យចិន ថៃខាង ហើយក្នុងចំណោមជនរងគ្រោះទាំង ០៣នាក់ ដោយ ០១នាក់ រងរបួសផ្នែកក្បាលធ្ងន់ធ្ងរជាងគេ ទើបបញ្ជូនបន្តទៅសង្គ្រោះនៅមន្ទីពេទ្យរាជធានីភ្នំពេញ។

បន្ទាប់ពីទទួលបានព័ត៌មាននេះភ្លាម កម្លាំងការិយាល័យនគរបាលព្រហ្មទណ្ឌកម្រិតស្រាល សហការណ៍ជាមួយកម្លាំងជំនាញ និងអធិការដ្ឋាននគរបាលក្រុងព្រះសីហនុ ចុះទៅដល់ទីតាំងកើតហេតុ ដើម្បីធ្វើការស្រាវជ្រាវ រហូតដឹងថា បន្ទាប់ពីក្រុមជនសង្ស័យបានធ្វើសកម្មភាព កាប់ទៅលើជនរងគ្រោះទាំង ០៣នាក់រួច ក្រុមជនសង្ស័យបានជិះរថយន្តចំនួន ០៣គ្រឿង៖
ទី១.ម៉ាក MUSTANG ពណ៌ក្រហម ពាក់ផ្លាកលេខ ភ្នំពេញ 2BS-6371
ទី២.ម៉ាក STAREX ពណ៌ស ពាក់ផ្លាកលេខ ភ្នំពេញ 2AD-6901
ទី៣.ម៉ាក TUNDRA ពណ៌ខ្មៅ ពាក់ផ្លាកលេខ ភ្នំពេញ 2BG-6980 រត់គេចខ្លួនបាត់។

កម្លាំងសមត្ថកិច្ចយើងបានបន្តស្រាវជ្រាវរហូតស្វែងរកឃើញ រថយន្តចំនួន ០២គ្រឿង៖ ទី១.ម៉ាក MUSTANG ពណ៌ក្រហម និងទី២.ម៉ាក STAREX ពណ៌ស ចតទុកនៅមុខអគារ ១កន្លែង ស្ថិតនៅភូមិ៣ សង្កាត់៤ ក្រុងព្រះសីហនុ ខេត្តព្រះសីហនុ។

ដោយមានការដឹកនាំបញ្ជាពីសំណាក់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ និងដោយមានការសម្របសម្រួលនីតិវិធីពីឯកឧត្តម សៀង សុខ ព្រះរាជអាជ្ញា នៃអយ្យការអមសាលាដំបូងខេត្តព្រះសីហនុ កម្លាំងសមត្ថកិច្ចយើងបានចុះទៅធ្វើរដ្ឋបាលឆែកឆេរនៅក្នុងអគារ ដើម្បីស្វែងរកជនសង្ស័យ ជាលទ្ធផលក្នុងកិច្ចប្រតិបត្តិការនេះ កម្លាំងសមត្ថកិច្ចយើង ឃាត់ខ្លួនបានជនសង្ស័យដែលពាក់ព័ន្ធក្នុងករណីនេះចំនួន ០៧នាក់ ភេទប្រុស ជនជាតិចិន យកមកធ្វើការសាកសួរ និងបាននាំយកមនុស្សដែលធ្វើការនៅក្នុងអគារនោះ ចំនួន ០៦នាក់ ភេទប្រុស (ជនជាតិចិនចំនួន ០៤ និងជនជាតិខ្មែរចំនួន ០២នាក់) យកមកធ្វើការសាកសួរតាមនិតិវិធីជំនាញ។

ចំពោះករណីខាងលើនេះកម្លាំងការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធី និងកំពុងបន្តការស្រាវជ្រាវតាមចាប់ខ្លួនជនសង្ស័យដែលនៅសេសសល់កំពុងរត់គេចខ្លួន ៕