ភ្នំពេញ៖ ក្រុមបាល់ទាត់ជម្រើសជាតិកម្ពុជា នឹងជួបប្រកួតជាមួយបង់ក្លាដែល នៃជំនួបមិត្តភាពអន្តរជាតិ នាយប់ ថ្ងៃទី១៥ ខែមិថុនា ឆ្នាំ២០២៣នេះ នៅពហុកីឡដ្ឋានជាតិអូឡាំពិក នាវេលាម៉ោង ៧៖០០នាទី។
គ្រូបង្វឹកក្រុមជម្រើសជាតិកម្ពុជាលោក Felix Dalmas ថ្លែងក្នុងសន្និសីទសារព័ត៌មាន បានបង្ហាញសុទិដ្ឋិនិយម ចំពោះកូនក្រុមថា មានភាពរីកចម្រើនជាងមុន ក្រោយប្រមូលផ្ដុំហ្វឹកហាត់ជាមួយគ្នាជិត ១សប្ដាហ៍មកនេះ ប៉ុន្ដែលោកថា ការប្រកួតមិត្តភាពអន្ដរជាតិជាមួយក្រុមជម្រើសជាតិបង់ក្លាដែសស្អែកនេះ នឹងត្រូវប្រើប្រាស់កម្លាំងខ្លាំង ហើយក៏ជំនួបដ៏តានតឹងផងដែរ។
លោក Felix បានលើកឡើងថា បន្ទាប់ពីការខំប្រឹងជាខ្លាំង កំឡុងការប្រកួតស៊ីហ្គេម នេះគឺជាការចាប់ផ្ដើមទំព័រថ្មីមួយទៀត ពិសេសសម្រាប់ការវិលត្រឡប់មកដឹកនាំក្រុមគោព្រៃកម្ពុជាជាថ្មី ដែលត្រូវមានការរៀបចំថ្មីជាច្រើន ដូចជាកលល្បិច យុទ្ធសាស្ដ្រ និងតាក់ទិចជាដើម។ យ៉ាងណាមិញលោកសង្ឃឹមថា នឹងប្រើពេលតិចជាងមុន ក្នុងការរៀបចំក្រុមឲ្យបានល្អប្រសើរ។
សូមបញ្ជាក់ថា ក្រុមជម្រើសជាតិកម្ពុជា ស្ថិតក្នុងរជ្ជកាលសម្រាប់លោក Felix ក៏ដូចជាកាលពីលោក Keisuke Honda ដឹកនាំក្រុមកម្ពុជា ក៏ធ្លាប់បានជួបប្រកួតមិត្តភាពអន្ដរជាតិ ជាមួយក្រុមភ្ញៀវ បង់ក្លាដែស ចំនួន ២លើកមកហើយ ដោយលទ្ធផលចាញ់បង់ក្លាដែស ១-០ ទាំង២ប្រកួត៕
