សម្ដេចតេជោ ឲ្យអ្នកលេងហ្វេសបុកឈ្មោះ រាជ្យបុត្រ សូរ្យកាយ្យ រៀបចំខ្លួនមកស្រុកកំណើតវិញ បន្ទាប់ពីចេញវីដេអូសុំទោសសម្ដេច

ភ្នំពេញ៖ យុវជន ទឹម សុជា ដែលជាអ្នកលេងហ្វេសប៊ុកឈ្មោះ « រាជ្យបុត្រ សូរ្យកាយ្យ» បានចេញវីដេអូសុំទោសសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ចំពោះកំហុសគ្រប់យ៉ាង ដែលខ្លួនធ្លាប់បានវាយប្រហារ និងរិះគន់មកលើសម្តេច ​និងរាជរដ្ឋាភិបាល។ ជាការឆ្លើយតប សម្តេចតេជោ បានស្វាគមន៍ និងឲ្យយុវជនរូបនេះរៀបចំខ្លួនមកស្រុកកំណើតវិញ។

សម្តេចតេជោ ហ៊ុន សែន បានបញ្ជាក់តាមបណ្ដាញសង្គមតេឡេក្រាមនៅថ្ងៃនេះថា «កូន ទឹម សុជា ដែលជាអ្នកលេងហ្វេសបុក Facebook ឈ្មោះ រាជ្យបុត្រ សូរ្យកាយ្យ បានធ្វើវីដេអូសម្តែងការសោកស្តាយ និងសុំទោសចំពោះកំហុសដែលបាន កើតកន្លងមក។ កូនប្រុសពុកសូមស្វាគមន៍ការវិលត្រឡប់របស់កូន។ សម្រាប់រឿងអតីតកាលទុកវាដោយឡែកទៅចុះ។ កូនរៀបចំខ្លួនមកនៅស្រុកយើងវិញដែលទឹកដីនេះក៏ជារបស់កូនម្នាក់ដែរ។ មាតុភូមិកម្ពុជាជារបស់ប្រជាជនកម្ពុជាគ្រប់រូប» ៕