បុរសម្នាក់ជិះម៉ូតូមិនប្រយ័ត្ន ជ្រុលទៅបុករថយន្តស៊េរីទំនើបកំពុងបត់ចូលបុរីប៉េងហួត បណ្ដាលឲ្យរងរបួស
ភ្នំពេញ៖ បុរសម្នាក់ជិះម៉ូតូក្នុងល្បឿនលឿន មិនបានប្រយ័ត្នក៏ជ្រុលទៅបុក រថយន្តស៊េរីទំនើបមួយគ្រឿង ពេញទំហឹង បណ្ដាលឲ្យរងរបួសស្រាល បង្ករឲ្យមានការភ្ញាក់ផ្អេីល កាលវេលាម៉ោង១០និង៣០នាទីយប់ថ្ងៃទី១០ ខែ មិថុនា ឆ្នាំ ២០២៣នៅចំណុចច្រកចូលបុរីប៉េងហួត តាមផ្លូវ៦០ម៉ែត្រ សង្កាត់ ចាក់អង្រែក្រោម ខណ្ឌមានជ័យ ។
បើតាមប្រភពព័ត៍មាន បានឲ្យដឹងថា នៅមុនពេលកើតហេតុ គេបានឃើញ នារីម្នាក់បើករថយន្តស៊េរីទំនើបមួយគ្រឿងម៉ាក MG ពណ៍ស ពាក់ស្លាកលេខ ភ្នំពេញ 2BK-8822 ធ្វើដំណើរក្នុងទិសដៅពីជើងទៅត្បូង ខណះមកដល់ចំណុចកើតហេតុខាង បានបត់ឆ្វេងចូលទៅក្នុងបុរី ប៉េងហួត មិនទាន់ផុតផង ស្រាប់តែមាន បុរសម្នាក់ជិះម៉ូតូមួយគ្រឿងម៉ាក ហុងដា ឃ្លីក ពណ៍ស 1HF-1772 ធ្វើដំណើរក្នុងល្បឿនលឿន ទិសដៅស្របគ្នា មិនបានប្រយ័ត្នក៏ជ្រុលទៅបុក ចំកាងក្រោយរថយន្ត ពេញទំហឹង សំណាងល្អគ្រាន់តែ រងរបួសស្រាលតែប៉ុណ្ណោះ ។
ចំណែកឯរថយន្ត ធ្លាក់កាងខាងក្រោយ និងម៉ូតូរងការខូចខាតយ៉ាងដំណំ ។
ក្រោយពេលកើតហេតុ អ្នកជិះម៉ូតូ បានតវ៉ាជាមួយអ្នកបើករថយន្ត ថា ពេលបត់ចូលបុរី អត់មានស៊ីញ៉ូ ទើបគាត់ជ្រុលទៅបុក បណ្ដាលឲ្យរងការខូចខាតបែបនេះ មួយសន្ទុះក្រោយមក ដោយភាគីខាង រថយន្តមិនចង់វែងឆ្ងាយក៏ព្រមចេញថ្លៃជួសជុលទៅឲ្យភាគីខាងម៉ូតូ ចំនួន ៣០០$ ដើម្បី បញ្ចប់រឿង ៕
