សម្តេចតេជោ ហ៊ុន សែន៖ ភូមិសាស្រ្តនយោបាយ តំបន់អាស៊ី កំពុងក្លាយជាគោលដៅ នៃបញ្ហាប្រឈមដ៏គ្រោះថ្នាក់

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា បញ្ហាភូមិសាស្ត្រនយោបាយបានក្លាយជាប្រធានបទក្ដៅគគុក សម្រាប់ពិភពលោក វាមិនមែនសម្រាប់តែរវាងរុស្ស៉ី និងអ៊ុយក្រែនទេ តែឥឡូវនេះតំបន់អាស៊ីរបស់យើង កំពុងជាគោលដៅនៃបញ្ហាប្រឈមដ៏គ្រោះថ្នាក់ ។

ក្នុងឱកាសអញ្ជើញប្រគល់សញ្ញាបត្រជូននិស្សិតបញ្ចប់​ការ​សិក្សាពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច នាថ្ងៃ​ទី​៥ ខែមិថុនា ឆ្នាំ២០២៣ សម្ដេចតេជោ ហ៊ុន សែន មានប្រសាសន៍ថា តួយ៉ាងសម្ពន្ធយោធាណាតូ ដែលធ្លាប់តែនៅតំបន់អឺរ៉ុប ឥឡូវហាក់ដូចជាឆ្ពោះមកតំបន់អាស៊ីប៉ាស៊ីហ្វិក ក្រោមរូបភាពផ្សេងៗ ដែលជាកង្វល់របស់អាស៊ានទាំងមូល។

សម្ដេចតេជោគូសបញ្ជាក់ថា មកទល់ពេលនេះ ប្រទេសមួយចំនួនបានប្រកាសបញ្ជូននាវាចូលមកកាន់តែកៀកភូមិសាស្ត្រអាស៊ីអាគ្នេយ៍ ហើយតម្រង់ឆ្ពោះទៅរកសមុទ្រចិនខាងត្បូង។ បន្ថែមលើនោះ សម្ព័ន្ធភាពខ្នាតតូចដែលប្រើប្រាស់នាវាមុជទឹក ដើរដោយថាមពលនុយក្លេអ៊ែរ ដែលមានសហរដ្ឋអាមេរិក ចក្រភពអង់គ្លេស និងអូស្ត្រាលី ក៏កំពុងក្លាយទៅជាកង្វល់របស់អាស៊ាន និងបណ្ដាប្រទេសនៅក្នុងតំបន់ ព្រោះថា អាស៊ានមានចំណុចពិសេសរបស់ខ្លួន គឺជាតំបន់គ្មានអាវុធនុយក្លេអ៊ែរ ហើយប្រឆាំងនឹងការរីកសាយអាវុធនុយក្លេអ៊ែរ។ ប៉ុន្តែប្រសិនជាមិនមានហានិភ័យអ្វី ក៏វាជាចំណុចចាប់ផ្ដើមនៃការរត់ប្រណាំងសព្វាវុធដ៏មានគ្រោះថ្នាក់។

សម្ដេចតេជោយល់ថា ប្រសិនជាបន្តស្ថានភាពនេះតទៅទៀត ពិភពលោកកាន់តែប្រឈមនឹងគ្រោះថ្នាក់កាន់តែធំ​ ក៏ប៉ុន្តែកម្ពុជានៅតែមានសុទិដ្ឋិនិយមថា ពិភពលោកនឹងស្វែងរកភាពស្រុះស្រួលគ្នាមួយ ដើម្បីគ្រប់គ្រងទំនាក់ទំនងដោយសន្តិវិធី ជាពិសេសភាពតានតឹងរវាងអាមេរិក និងចិន ដើម្បីសម្រួលស្ថានការណ៍ឱ្យធូរស្រាលឡើងវិញ ៕