ឯកឧត្តម នេត្រ ភក្រ្តា៖ មជ្ឈមណ្ឌលអង្គរសម្រាប់អភិរក្សជីវៈចម្រុះ ជាមជ្ឈមណ្ឌលមួយដើរតួនាទីសំខាន់ ក្នុងការការពារ និងអភិរក្សសត្វព្រៃ

ភ្នំពេញ៖ ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន និងជាអ្នកដឹកនាំយុទ្ធនាការអន្ទាក់សូន្យ បានលើកឡើងថា មជ្ឈមណ្ឌលអង្គរសម្រាប់អភិរក្សជីវៈចម្រុះ​ ដែលហៅកាត់ថា (ABBC) គឺជាមជ្ឈមណ្ឌលមួយដែលបានដើរតួនាទីសំខាន់នៅក្នុងការចូលរួមការពារ និងការអភីរក្សសត្វព្រៃ ជាពិសេសសត្វព្រៃដែលកម្រ និងផុតពូជ។

ក្នុងដំណើរទស្សនកិច្ចនៅមជ្ឈមណ្ឌលអង្គរអភិរក្សជីវៈចម្រុះ ស្ថិតក្នុងបរិវេណរមណីយ៍ដ្ឋានក្បាលស្ពាននៃស្រុកបន្ទាយស្រី ខេត្តសៀមរាប នៅថ្ងៃទី១ ខែមិថុនា ឆ្នាំ២០២៣ ឯកឧត្តម នេត្រ ភក្រ្តា មានប្រសាសន៍ថា យើងឃើញថានៅក្នុងមជ្ឈមណ្ឌលនេះទន្ទឹមនឹងការផ្ដល់នូវការថែរក្សា ការព្យាបាលទៅដល់សត្វដែលរងរបួសដោយសារការដាក់អន្ទាក់ និងកត្តាផ្សេងៗ។

ឯកឧត្តមរដ្ឋលេខាធិការ មានបន្តថា​ នៅកន្លែងនេះគឺជាមជ្ឈមណ្ឌលមួយដែលបង្កាត់ពូជសត្វក្រៅចម្រុះធម្មជាតិ ដែលជាផ្នែកមួយនៃការធ្វើកិច្ចការដើម្បីបង្កើនចំនួនវិទ្យាសាស្រ្តសត្វកម្រៗនៅក្នុងដែនជម្រកកម្ពុជារបស់យើង។ ហើយនៅកន្លែងនេះយើងឃើញមានប្រភេទសត្វមួយចំនួនដែលបានបន្តពូជ ហើយនៅក្នុងមានដូចជា៖ សត្វខ្សឹប ដែលជាប្រភេទសត្វកម្រ ដែលនៅលើពិភពលោកនេះគឺមានចំនួនតិចតួច ក្នុងនោះកម្ពុជារបស់យើងគឺមានចំនួនប្រមាណជាជាង ៥០០ក្បាលប៉ុណ្ណោះ។ ហើយឥឡូវនេះយើងមានមជ្ឈមណ្ឌលប្រកាត់សត្វខ្សឹបជាប្រភេទសត្វកម្រហើយទទួលបានលទ្ធផលជោគជ័យ ហើយនេះជាមជ្ឈមណ្ឌលទី១ ដែលទទួលបានជោគជ័យក្នុងការបង្កាត់សត្វខ្សឹប។

ឯកឧត្តមរដ្ឋលេខាធិការ បានបន្ថែមថា យើងជឿជាក់ថាជាមួយនឹងកិច្ចការងាររបស់មជ្ឈមណ្ឌលអង្គរអភិរក្សជីវៈចម្រុះនេះនិងចូលរួមបន្ថែមទៀតនៅក្នុងការប្កាត់ពូជប្រភេទសត្វកម្រៗដើម្បីបង្កើនចំនួនសត្វនៅក្នុងធម្មជាតិ។

សូមជម្រាបថានៅក្នុងប្រទេសកម្ពុជារបស់យើងប្រភេទសត្វមួយចំនួនបានធ្វើការបង្កាត់ពូជ ហើយលែងទៅក្នុងជម្រកធម្មជាតិដើម្បីឲ្យវាកើនចំនួនគឺមានដូចជា៖ សត្វខ្សឹប អណ្ដើកហ្លួង ក្រពើភ្នំ និងកន្ធាយក្បាលកង្កែប។

ឯកឧត្តមរដ្ឋលេខាធិការ បានបញ្ជាក់បន្ថែមថាឯកឧត្តមចង់ឲ្យមានការសិក្សាបន្ថែមទៀតទៅលើការបង្កាត់ពូជសត្វដែលកម្រៗដើម្បីបង្កើនចំនួនវិទ្យាសាស្រ្តនៃសត្វមក្រទាំងនោះនៅក្នុងជម្រកនៃប្រទេសកម្ពុជារបស់យើង ហើយសត្វទាំងនោះមានដូចជា៖ សត្វត្មាត សត្វក្រាល សត្វត្រយ៉ងចង្កំកស សត្វត្រយ៉ងយក្ស សត្វត្រដក់តូច ត្រដក់ធំ ជាដើម ៕