ឧបនាយករដ្ឋមន្រ្តី កែ គឹមយ៉ាន៖ កម្ពុជាក្រោមការដឹកនាំរបស់ សម្តេចតេជោ ហ៊ុន សែន កសាងបាននូវសន្តិភាពពេញលេញ

ភ្នំពេញ៖ ឯកឧត្តមឧបនាយករដ្ឋមន្រ្តី កែ គឹមយ៉ាន សមាជិកគណៈអចិន្ត្រៃយ៍ នៃគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្ស ចុះមូលដ្ឋានខេត្តបន្ទាយមានជ័យ បានលើកឡើងថា ប្រទេសកម្ពុជាក្រោមការដឹកនាំប្រកប ដោយគតិបណ្ឌិត និងភាពឈ្លាសវៃបំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងជាប្រធានគណបក្សប្រជាជនកម្ពុជា កសាងបាននូវសន្តិភាពពេញលេញ ស្ថិរភាព នយោបាយ និងការអភិវឌ្ឍប្រកបដោយចីរភាពលើគ្រប់វិស័យតាមរយៈមាគ៌ានយោបាយដឹកនាំដ៏ត្រឹមត្រូវរបស់គណបក្សប្រជាជនកម្ពុជា។

ការថ្លែងយ៉ាងដូច្នេះរបស់ឯកឧត្តមឧបនាយករដ្ឋមន្ត្រី កែ គឹមយ៉ាន បានធ្វើឡើងក្នុងកិច្ច ប្រជុំត្រួតពិនិត្យការងារគណបក្ស ឆ្ពោះទៅកាន់ការបោះឆ្នោតជ្រើសតាំងតំណាងរាស្រ្ត នីតិកាលទី៧ របស់គណៈកម្មាធិការគណបក្សខេត្តបន្ទាយមានជ័យកាលពីព្រឹកថ្ងៃអង្គារ ទី២៣ ខែឧសភា ឆ្នាំ២០២៣នេះ នៅសាលប្រជុំគណបក្សខេត្ត ដែលមានសមាជិកសមាជិកា ចូលរួមយ៉ាងច្រើនកុះករ។

ក្នុងឱកាសនោះ ឯកឧត្តម ឧបនាយករដ្ឋមន្រ្តី បានថ្លែងកោតសរសើរ និងអំណរគុណ ដល់សមាជិកសមាជិកាគណបក្ស និងអង្គភាពពាក់ព័ន្ធទាំងអស់ដែលបានខិតខំអនុវត្តន៍ គោលនយោបាយរាជរដ្ឋាភិបាល និងគណបក្សបានដោយជោគជ័យ ជាពិសេសការ ចូលរួមការពារសន្តិសុខសណ្តាប់ធ្នាប់សាធារណៈ នៅក្នុងឱកាសព្រឹត្តិការណ៍កីឡាស៊ីហ្គេម លើកទី៣២ ដែលទើបបានបញ្ចប់ទៅថ្មីៗនេះបានយ៉ាងជោគជ័យនៅក្នុងព្រះរាជាណា ចក្រកម្ពុជា។

ឯកឧត្តមឧបនាយករដ្ឋមន្រ្តីបានលើកឡើងថា មូលដ្ឋានគ្រឹះនៃសុខសន្តិភាព បានធ្វើឱ្យប្រជាជនកម្ពុជាមានជីវភាពរស់នៅកាន់តែល្អប្រសើរ និងទទួលបាននូវផ្លែផ្កា សេដ្ឋកិច្ច និងនយោបាយរបស់រាជរដ្ឋាភិបាលកម្ពុជា។

ឯកឧត្តម ឧបនាយករដ្ឋមន្រ្តី បានបន្តថា សន្តិភាព ស្ថិរភាពនយោបាយ និងការអភិវឌ្ឍ ទាំងអស់នេះ គឺជាការរួមចំណែកដ៏សំខាន់របស់សមាជិក សមាជិកាគណបក្ស មន្រ្តីរាជការ កងកម្លាំងប្រដាប់អាវុធគ្រប់ប្រភេទ និងជនរួមជាតិទាំងអស់ដែលបានយល់ច្បាស់ពី គុណតម្លៃនៃសន្តិភាព។

ជាមួយនោះឯកឧត្តមឧបនាយករដ្ឋមន្រ្តីបានពិនិត្យ និងវាយតម្លៃខ្ពស់ចំពោះការងារ ដែលគណបក្សខេត្តសម្រេចបានកន្លងមក ព្រមទាំងបានគាំទ្រទិសដៅ ចំពោះមុខដែលបានដាក់ចេញ និងសូមធ្វើការណែនាំបន្ថែមទៀតដល់សមាជិក សមាជិកា គ្រប់ថ្នាក់គ្រប់ផ្នែកទាំងអស់ ត្រូវបន្តរួមគ្នាការពារថែរក្សាសន្តិភាព ពង្រឹងការងារសន្តិសុខ សណ្តាប់ធ្នាប់សាធារណៈ ការលុបបំបាត់នូវចោរកម្ម បញ្ហាគ្រឿងញៀន ល្បែងស៊ីសង ខុសច្បាប់ គ្រោះថ្នាក់ចរាចរណ៍ ការផ្តល់សេវាសាធារណៈ ដោះស្រាយនូវសំណូមពរ ប្រជាពលរដ្ឋមូលដ្ឋាន និងអំពាវនាវអ្នកដែលមានឈ្មោះបោះឆ្នោតត្រូវត្រៀមខ្លួនទៅ បោះឆ្នោតជ្រើសតាំងតំណាងរាស្ត្រនីតិកាលទី៧ នៅពេលខាងមុខនេះឱ្យបានគ្រប់ៗគ្នា៕