ប្រធានក្រុមប្រឹក្សាខេត្តកំពង់ចាម ដឹកនាំមន្រ្តីរាជការ និងអាជ្ញាធរមូលដ្ឋាន ប្រារព្ធទិវាជាតិ នៃការចងចាំ ២០ ឧសភា នៅមណ្ឌលឧក្រិដ្ឋកម្ម ភ្នំប្រុស ស្ថិតក្នុងឃុំក្រឡា ស្រុកកំពង់សៀម
ភ្នំពេញ៖ ឯកឧត្តម ខ្លូត ផន ប្រធានក្រុមប្រឹក្សា ខេត្តកំពង់ចាម នាព្រឹកថ្ងៃ២០ ខែឧសភា ឆ្នាំ២០២៣ បានដឹកនាំ មន្រ្តីរាជការ និងអាជ្ញាធរមូលដ្ឋាន ប្រារព្ធទិវាជាតិ នៃការចងចាំ ២០ ឧសភា នៅមណ្ឌលឧក្រិដ្ឋកម្មភ្នំប្រុស ឃុំក្រឡា ស្រុកកំពង់សៀម ខេត្តកំពង់ចាម ដោយមានការអញ្ជើញចូលពី លោក លោកស្រី ជាប្រធាន អនុប្រធានមន្ទីរ អង្គភាព កងកម្លាំងទាំង ៣ ព្រះសង្ឃ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស ជាច្រើននាក់ផងដែរ។
គូសបញ្ជាក់ថា ពិធីខាងលើនេះ ក៏បានរៀបចំជាក្បួនដង្ហែរគូរោន និងបាច់ផ្កា តំកល់នៅចេតីយ៍អដ្ឋិធាតុ ដោយបាននិមន្តព្រះសង្ឃ ចំនួន ៧៩អង្គ ស្វាធ្យាយជយន្តោ បង្សូកូល និងរាប់បាត្រ ឧទ្ទិសផលបុណ្យកុសល ជូនចំពោះ ប្រជាពលរដ្ឋស្លូតត្រង់ ដែលបានស្លាប់បាត់បង់ជីវិត ដោយសាររបបប្រល័យពូជសាសន៍ ប៉ុល ពត ផងដែរ។
នាឱកាសនោះដែរ ឯកឧត្តម ខ្លូត ផន ប្រធានក្រុមប្រឹក្សាខេត្ត មានប្រសាសន៍ ដោយបានកោតសសើរ ចំពោះ ក្រុមប្រឹក្សាក្រុង-ស្រុក គណៈអភិបាលក្រុង ស្រុក ក្រុមប្រឹក្សាឃុំ សង្កាត់ ព្រមទាំង មន្ត្រីរាជការ កងកំលាំងប្រដាប់អាវុធ សមាជិកគណបក្ស និងបងប្អូនប្រជាពលរដ្ឋនៅក្នុងក្រុង ស្រុក ដែលរយៈកាល ៤១ឆ្នាំ កន្លងទៅ បានយកអស់កម្លាំងកាយ ចិត្ត ប្រាជ្ញា ស្មារតី តស៊ូ ជំនះ នូវគ្រប់ឧបសគ្គ ទាំងតូចធំរាប់រយពាន់ជំពូក រហូតសម្រេចបានស្នាដៃយ៉ាងធំធេង ក្នុងកិច្ចការពារ និងការអភិវឌ្ឍប្រទេសជាតិ ពិសេស ក្នុងកិច្ចការពារ និងកសាងភូមិ ឃុំ ឲ្យមានការរីកចម្រើន ដែលក្រោយថ្ងៃរំដោះ ៧ មករា ១៩៧៩ មានតែបាតដៃទទេ បាក់កំលាំង នៅសេសសល់តែខោអាវមួយចង្កេះ ខ្វះសព្វខ្វះគ្រប់ ជាប្រទេសក្រីក្រ តោកយ៉ាក់ដែលមកដល់ ពេលនេះប្រទេសកម្ពុជានៃយើង បានក្លាយជាប្រទេសដែលមានសុខសន្តិភាពពេញលេញ ជាប្រទេសដែលមានចំណូលមធ្យមកំរិតទាប ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ជានាយរដ្ឋមន្ត្រីនៃព្រះរាជាណាចក្រកម្ពុជា។
ដូច្នេះ តាមរយៈនេះ សូមឲ្យគ្រប់ថ្នាក់ គ្រប់ផ្នែក ត្រូវខិតខំធ្វើអំពើល្អ និងដោះស្រាយការថ្នាំងថ្នាក់របស់ប្រជាជនឲ្យបានទាន់ពេលវេលា រួមនឹងការផ្តល់សេវានានា ឲ្យបានល្អជាងមុន និងលឿនជាងមុន។ លុបបំបាត់ភាពអសកម្ម ដោយបន្តការកែទម្រង់ស៊ីជម្រៅតាមអភិក្រមទាំង ៥ គឺ៖ ឆ្លុះកញ្ចក់ ងូតទឹក ដុះក្អែល ព្យាបាល និងវះកាត់ និងបាវចនាទាំងពីរគឺ កែទម្រង់ ផ្ទៃក្នុង និងបង្កើនមិត្តខាងក្រៅ ក្នុងស្មារតីឯករាជ្យ និងជំរុញការអភិវឌ្ឍមូលដ្ឋាន ឲ្យមានការរីកចំរើនឈានឡើង ដើម្បីកាត់បន្ថយនូវភាពក្រីក្រ របស់ប្រជាជន។
ដោយឡែកផ្សាភ្ជាប់ជាមួយនឹងពិធីខាងលើនោះដែរថា ឯកឧត្ដម ខ្លូត ផន ប្រធានក្រុមប្រឹក្សា ខេត្ត ក៏បានដឹកនាំ មន្រ្តីរាជការ និងអាជ្ញាធរមូលដ្ឋាន លោក លោកស្រី ជាថ្នាក់ដឹកនាំមន្ទីរ អង្គភាព កងកម្លាំងទាំង ៣ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស អញ្ជើញរាប់បាត្រ ដើម្បី ឧទ្ទិសកុលសល ទៅដល់ដួងវិញ្ញាណក្ខ័ន្ធ ប្រជាពលរដ្ឋស្លូតត្រង់ ក៏ដូចជា វិញ្ញាណក្ខ័ន្ធអ្នកស្នេហាជាតិទាំងឡាយ ដែលបានពលីជីវិត ដើម្បី បុព្វហេតុជាតិមាតុភូមិ នាសម័យសង្គ្រាម ជាពិសេស ក្នុងរបបប្រល័យពូជសាសន៍ ប៉ុល ពត ដោយបាននិមន្ត ព្រះសង្ឃ ចំនួន ៧៩អង្គ គោចរបិណ្ឌបាត្រ ផងដែរ ៕
