អ្នកឧកញ៉ា គិត ម៉េង៖ កម្ពុជា ជាទីផ្សារដ៏មានសក្តានុពល និងជាដៃគូធុរកិច្ច វិនិយោគដ៏ធំមួយរបស់ឥណ្ឌូនេស៊ី
ភ្នំពេញ៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នៅថ្ងៃទី៤ ខែមេសា ឆ្នាំ២០២៣នេះ បានទទួលជួបសម្តែងការគួរសមនិងពិភាក្សាការងារជាមួយគណៈប្រតិភូក្រុមប្រឹក្សាពិគ្រោះយោបល់ធុរកិច្ចអាស៊ានឥណ្ឌូនេស៊ីដឹកនាំដោយ លោក អាសាដ រ៉ាសស៊ីដ (Arsjad Rasjid) ប្រធានក្រុមប្រឹក្សាពិគ្រោះយោបល់ធុរកិច្ចអាស៊ានឆ្នាំ២០២៣ និងជាប្រធានសភាពាណិជ្ជកម្មនិងឧស្សាហកម្មឥណ្ឌូនេស៊ី។
កិច្ចពិភាក្សានេះ ផ្តោតជាសំខាន់ទៅលើការជួយគាំទ្រ និងជំរុញចំនុចអាទិភាពនានារបស់ក្រុមប្រឹក្សាពិគ្រោះយោបល់ធុរកិច្ចអាស៊ានដែលឥណ្ឌូនេស៊ីធ្វើជាប្រធានសម្រាប់ឆ្នាំ ២០២៣។ ក្រៅពីនេះ ភាគីទាំងពីរ ក៏បានពិភាក្សាគ្នាផងដែរអំពីកិច្ចសហប្រតិបត្តិការរវាងសភាពាណិជ្ជកម្មទាំងពីរ ដើម្បីជំរុញទំនាក់ទំនងសេដ្ឋកិច្ចកម្ពុជា-ឥណ្ឌូនេស៊ី។
អ្នកឧកញ៉ា គិត ម៉េង បានស្វាគមន៍យ៉ាងកក់ក្តៅចំពោះ ដំណើរទស្សនកិច្ចធុរកិច្ចរបស់គណៈប្រតិភូក្រុមប្រឹក្សាពិគ្រោះយោបល់ធុរកិច្ចអាស៊ាន ដែលអញ្ជើញមកបំពេញទស្សនកិច្ចនៅកម្ពុជា ក្នុងគោលបំណងជំរុញធុរកិច្ចនិងវិនិយោគរវាងបណ្តាប្រទេសក្នុងតំបន់អាស៊ាន។ អ្នកឧកញ៉ា បានឯកភាពគាំទ្រជាគោលការណ៍ទៅលើខ្លឹមសារ និងចំនុចអាទិភាពនានារបស់ក្រុមប្រឹក្សាពិគ្រោះយោបល់ធុរកិច្ចអាស៊ាន ដែលមានឥណ្ឌូនេស៊ីជាប្រធាន ដើម្បីប្រយោជន៍រួមរបស់អាស៊ានទាំងមូល។
ទន្ទឹមនឹងនេះ អ្នកឧកញ៉ាគាំទ្រដល់គំនិតផ្តួចផ្តើមរបស់ក្រុមប្រឹក្សាពិគ្រោះយោបល់ធុរកិច្ចអាស៊ាន-ឥណ្ឌូនេស៊ី ក្នុងការជំរុញពាណិជ្ជកម្ម និងវិនិយោគក្នុងតំបន់អាស៊ាន ជាពិសេស ការជំរុញទំនាក់ទំនងសេដ្ឋកិច្ចកម្ពុជា-ឥណ្ឌូនេស៊ី។ អ្នកឧកញ៉ា គិត ម៉េង បានគូសបញ្ជាក់ថាកម្ពុជាគឺជាទីផ្សារដ៏មានសក្តានុពលរបស់ឥណ្ឌូនេស៊ី ហើយក៏ជាដៃគូធុរកិច្ចនិងវិនិយោគដ៏ធំមួយរបស់ឥណ្ឌូនេស៊ីផងដែរ។
ហេតុនេះ សភាពាណិជ្ជកម្មទាំងពីរ នឹងសហការរៀបចំព្រឹត្តិការណ៍រួមគ្នាដើម្បីជំរុញទំនាក់ទំនងសេដ្ឋកិច្ចប្រទេសទាំងពីរ។ លោក អាសាដ រ៉ាសស៊ីដ (Arsjad Rasjid) ប្រធានក្រុមប្រឹក្សាពិគ្រោះយោបល់ធុរកិច្ចអាស៊ានឆ្នាំ២០២៣ និងជាប្រធានសភាពាណិជ្ជកម្មនិងឧស្សាហកម្មឥណ្ឌូនេស៊ី មានប្រសាសន៍ថ្លែងអំណរយ៉ាងជ្រាលជ្រៅចំពោះ អ្នកឧកញ៉ា គិត ម៉េង ដែលបានទទួលស្វាគមន៍ និងជួបពិភាក្សាការងារជាមួយគណៈប្រតិភូក្រុមប្រឹក្សាពិគ្រោះយោបល់ធុរកិច្ចអាស៊ាន-ឥណ្ឌូនេស៊ី។ លោកប្រធានក៏បានអបអរសាទរចំពោះ សភាពាណិជ្ជកម្មកម្ពុជា ក៏ដូចជា ក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា ដែលបានរៀបចំប្រកបដោយជោគជ័យនូវកិច្ចបប្រជុំកំពូលធុរកិច្ចនិងវិនិយោគអាស៊ានឆ្នាំ២០២២ និងកិច្ចប្រជុំកំពូលពាក់ព័ន្ធ។
លោកប្រធានស្នើសុំការគាំទ្រពី អ្នកឧកញ៉ា គិត ម៉េង និងក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា ចំពោះចំនុចអាទិភាពនានាដែលដាក់ចេញដោយក្រុមប្រឹក្សាពិគ្រោះយោបល់ធុរកិច្ចអាស៊ាន-ឥណ្ឌូនេស៊ី រួមមាន៖ បរិវត្តកម្មឌីជីថល ការអភិវឌ្ឍន៍ប្រកបដោយចីរភាព ភាពធន់នឹងវិបត្តិសុខភាព សន្តិសុខស្បៀង និងកិច្ចសម្រួលពាណិជ្ជកម្ម។
លោកបានធ្វើបទបង្ហាញលម្អិតជូនអង្គប្រជុំអំពីគំនិតផ្តួចផ្តើមនិងគម្រោងទាំងឡាយដែលនឹងត្រូវអនុវត្តន៍ ក្នុងអំឡុងពេលឥណ្ឌូនេស៊ីធ្វើជាប្រធាន និងបន្តអនុវត្តន៍នៅឆ្នាំក្រោយៗទៀតនៅក្នុងតំបន់អាស៊ានទាំងមូល។ ក្នុងនាមជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានឆ្នាំ២០២៣ លោកស្នើសុំ អ្នកឧកញ៉ាប្រធាន ជួយគាំទ្រដល់ការរៀបចំកិច្ចប្រជុំកំពូលធុរកិច្ចនិងវិនិយោគអាស៊ានឆ្នាំ២០២៣ ដែលនឹងប្រព្រឹត្តទៅនៅទីក្រុងចាកាតា នៃប្រទេសឥណ្ឌូនេស៊ី នៅខាងកញ្ញា ឆ្នាំ២០២៣ ខាងមុខ។
ក្រៅពីនេះ លោកប្រធានស្នើរៀបចំកិច្ចពិភាក្សាតុមូល ស្តីពីធុរកិច្ចនិងវិនិយោគទ្វេភាគីរវាងកម្ពុជានិងឥណ្ឌូនេស៊ីផងដែរក្នុងអំឡុងពេលនៃកិច្ចប្រជុំកំពូលខាងលើ។ កិច្ចប្រជុំ បានប្រព្រឹត្តទៅប្រកបដោយជោគជ័យក្នុងបរិយាកាសស្និទ្ធស្នាលជាភាតរៈ៕
