អភិបាលខេត្តកណ្ដាល៖ ក្នុងមួយឆ្នាំៗ ខេត្តអាចស្រូបចំណូលពីវិស័យការងារ បានប្រមាណជាង ៤៣៤លានដុល្លារ

ភ្នំពេញ៖ ថ្លែងនៅក្នុងសន្និសីទសារព័ត៌មានស្តីពី ភាពជោគជ័យក្នុងរយៈពេល៥ឆ្នាំ របស់រដ្ឋបាលខេត្តកណ្ដាល នៅថ្ងៃទី៣០ ខែមីនា ឆ្នាំ២០២៣ ឯកឧត្តម គង់ សោភ័ណ្ឌ អភិបាលខេត្តកណ្ដាល បានថ្លែងថា នៅក្នុងមួយឆ្នាំៗ ខេត្តកណ្ដាលអាចស្រូបចំណូលពីវិស័យការងារ ក្នុងនោះមានរោងចក្រ សហគ្រាស បានប្រមាណជាង ៤៣៤លានដុល្លារ ។

ឯកឧត្តមអភិបាលខេត្ត មានប្រសាសន៍ថា បច្ចុប្បន្ននៅខេត្តកណ្ដាល មានរោងចក្រ សហគ្រាសចំនួន ៤៨៣ទីតាំង បានផ្ដល់ការងារ ដល់កម្មករនិយោជិត ប្រមាណជាង ១៥ម៉ឺននាក់ (ស្រីជាង ១២ម៉ឺននាក់) ដែលក្នុងនោះមានរោងចក្រកាត់ដេរ សំលៀកបំពាក់ ផលិតស្បែកជើង និងផលិតផលធ្វើដំណើរ កាបូប មានចំនួន១៧១ទីតាំង ដែលផ្ដល់ការងារដល់កម្មករនិយោជិកត រហូតដល់ជាង ១៣ម៉ឺននាក់ (ស្រីជាង ១១ម៉ឺននាក់) ។

ឯកឧត្តមបន្តថា ចំណូលបានពីវិស័យការងារ ក្នុងមួយខែ ទទួលបានជាង ៣៦លានដុល្លារ ដោយសរុបក្នុងមួយឆ្នាំបានប្រមាណជាង ៤៣៤លានដុល្លារអាមេរិក ជាមួយនេះក៏សូម អំពាវនាវដល់អ្នកវិនិយោគ បន្តធ្វើការវិនិយោគបន្ថែមទៀត ក្នុងខេត្តកណ្ដាល ដើម្បីបង្កើតជាឱកាសការងារបន្ថែមទៀតដល់ប្រជាពលរដ្ឋ ខណៈខេត្តកណ្ដាល នៅឆ្នាំ២០២៣នេះ ត្រូវបានប្រកាសជាខេត្តអស់មីនផងដែរ ។

ឯកឧត្តម គង់ សោភ័ណ្ឌ បានបន្ថែមថា ក្នុងរយៈពេល ៥ឆ្នាំចុងក្រោយនេះ សាខាបេឡាជាតិ សន្តិសុខសង្គមខេត្តកណ្ដាល (ប.ស.ស) បានអនុវត្តការងារបង់វិភាគទាន ផ្នែកហានិភ័យការងារ សម្រាប់កម្មករនិយោជិតជាង១៤ម៉ឺននាក់, ផ្នែកថែទាំសុខភាព ចំនួនជាង១៤ម៉ឺននាក់, កម្មករនិយោជិតក្រៅប្រព័ន្ធមានចំនួនជាង ៦០០នាក់ ។

អភិបាលខេត្ត បញ្ជាកថា ពាក់ព័ន្ធនឹងវិស័យការងារ វិជ្ជាជីវៈនេះ ខេត្តមានមជ្ឈមណ្ឌលវិជ្ជាជីវៈក្នុង ក្រុងតាខ្មៅ ក្នុងការជួយបំប៉នសមត្ថភាព តម្រង់ទិសដៅដល់ពលរដ្ឋ ដើម្បីឈានជើងចូល ទីផ្សារការងារ ដោយបានបណ្ដុះបណ្ដាលជំនាញវិជ្ជាជីវៈ ចំនួន៧កន្លែង ក្នុងនោះមានជំនាញអគ្គិសនី បរិក្ខាម៉ានស៊ីត្រជាក់ សំណង់ស៊ីវិល ព័ត៌មានវិទ្យា ជំនាញជួសជុលរថយន្ត ជំនាញភាសាអង់គ្លេស ដែលគិតមកដល់ពេលនេះ សិស្សដែលបានបញ្ចប់ការសិក្សាមានចំនួន ២៣០នាក់ ហើយក្នុងឆ្នាំសិក្សាថ្មី ២០២២-២០២៣ កំពុងបណ្ដុះបណ្ដាលនិស្សិតថ្នាក់បរិញ្ញាបត្ររង ចំនួនជាង ១៤០នាក់ រយៈពេល២ឆ្នាំ៕