ភ្នំពេញ៖ ឯកឧត្ដម Justin Whyatt ឯកអគ្គរដ្ឋទូតប្រទេសអូស្ត្រាលីប្រចាំកម្ពុជា បានគូសបញ្ជាក់ថា រដ្ឋាភិបាលអូស្ដ្រាលី បានសម្រេចក្នុងការផ្ដល់មូលនិធិបន្ថែមក្នុងការទិញវ៉ាក់សាំងកូវីដ១៩ តាមរយៈអង្គការយូនីសេហ្វ ដើម្បីផ្ដល់ជូនមកកម្ពុជា។
ការថ្លែងដូច្នេះរបស់ឯកឧត្ដម Justin Whyatt ក្នុងឱកាសចូលជួបពិភាក្សាការងារ និងសម្ដែងការគួរសម ជាមួយរដ្ឋមន្ដ្រីក្រសួងសុខាភិបាល ឯកឧត្ដមសាស្ដ្រាចារ្យ ម៉ម ប៊ុនហេង នៅថ្ងៃទី៣០ ខែមីនា ឆ្នាំ២០២៣នេះ នាទីស្ដីការក្រសួងសុខាភិបាល ក្នុងឱកាសដែលលោកត្រូវបានតែងតាំងជាឯកអគ្គរដ្ឋទូតអូស្ត្រាលីប្រចាំកម្ពុជា។
ឯកឧត្ដមឯកអគ្គរដ្ឋទូតប្រទេសអូស្ត្រាលី ក៏បានថ្លែងអបអរសាទរ និងកោតសរសើររាជរដ្ឋាភិបាលកម្ពុជា និងក្រសួងសុខាភិបាល ក្នុងកិច្ចខិតខំប្រឹងប្រែងគ្រប់គ្រង ទប់ស្កាត់ ការរីករាលដាលជំងឺកូវីដ១៩ នៅកម្ពុជា ក្នុង រយៈពេលជាង២ឆ្នាំ កន្លងមកនេះទទួលបានជោគជ័យ ក្រោមការដឹកនាំចង្អុលបង្ហាញផ្ទាល់ដ៏ឈ្លាសវៃ ប្រកបដោយគតិបណ្ឌិតរបស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ដែលអាចឱ្យកម្ពុជាបើកដំណើរការប្រទេស ទាំងសកម្មភាពសេដ្ឋកិច្ច និងសង្គមឡើងវិញតាំងពីខែវិច្ឆិកា ឆ្នាំ២០២១។
ជាមួយគ្នានោះ ឯកឧត្ដម Justin Whyatt បានកត់សម្គាល់ថា ឆ្នាំ២០២៣ គឺជាខួបអនុស្សាវរីយ៍លើកទី៧១ នៃទំនាក់ទំនងការទូតរវាងកម្ពុជា-អូស្ត្រាលី។ លោកឯកអគ្គរដ្ឋទូតក៏បានថ្លែងអំណរគុណ ចំពោះក្រសួងសុខាភិបាល ដែលបានសហការសម្របសម្រួល និងគាំទ្រអង្គការជាដៃគូរបស់អូស្ត្រាលី ក្នុងការអនុវត្តគម្រោងនានា ជាពិសេសគម្រោងលើកកម្ពស់គុណភាព និងសមធម៌សុខាភិបាល។
ជាការឆ្លើយតប ឯកឧត្ដមសាស្ត្រាចារ្យ ម៉ម ប៊ុនហេង បានសម្ដែងមនោសញ្ចេតនាស្វាគមន៍យ៉ាងកក់ក្ដៅចំពោះ ឯកអគ្គរដ្ឋទូតប្រទេសអូស្ត្រាលីថ្មី និងថ្លែងអំណរគុណចំពោះរដ្ឋាភិបាល និងប្រជាជនអូស្ត្រាលី ដែលបានគាំទ្រវិស័យសុខាភិបាល ចាប់តាំងពីឆ្នាំ១៩៩៣ ដែលមានថវិកាសរុបប្រមាណ ១៨៣លានដុល្លារអូស្ត្រាលី តាមរយៈគម្រោងផ្សេងៗជាច្រើន រួមមាន៖
*គម្រោងសមធម៌ និងកែលម្អគុណភាពសេវាសុខាភិបាលកម្ពុជា ដំណាក់កាលទី១ និងកំពុងបន្តដំណាក់កាលទី២
*គម្រោងទ្រទ្រង់វិស័យសុខាភិបាលជំហានទី២
*គម្រោង Partnering to Save Live: Reproductive Health and MCH
*គម្រោងកំណត់អត្តសញ្ញាណគ្រួសារក្រីក្រ
*គម្រោងអាហារូបត្ថម្ភនៅកម្ពុជា
*តាមរយៈមូលនិធិសកលបានចូលរួម៖ The Global Alliance for Vaccines and Immunizations (GAVI) និងគម្រោងប្រយុទ្ធនឹងជំងឺអេដស៍ របេង និងគ្រុនចាញ់
*តាមរយៈ Australia’s Indo-Pacific Centre for Health Security’s regional programs: ការកសាងសមត្ថភាពមន្ត្រីសុខាភិបាល លើផ្នែកនិយ័តកម្មធ្វើតេស្តឱសថ និងផលិតផលវេជ្ជសាស្ត្រ។
ឯកឧត្ដមរដ្ឋមន្រ្តី ម៉ម ប៊ុនហេង បានលើកឡើងបន្តថា ក្នុងកាលៈទេសៈដែលកម្ពុជា និងពិភពលោកទាំងមូលបាន ប្រឈមនឹងការរីករាលដាលនៃជំងឺកូវីដ-១៩ ប្រទេសអូស្ត្រាលីបានផ្ដល់ជំនួយបន្ទាន់សម្រាប់ឆ្លើយតប ទប់ស្កាត់ ជំងឺកូវីដ១៩ រួមមាន៖
*ផ្តល់វ៉ាក់សាំងប្រភេទ Pfizer សម្រាប់មនុស្សចាស់ និងកុមារ សរុបចំនួន ២,៨០០,០០០ដូស
*ផ្គត់ផ្គង់ទូបង្កកត្រជាក់ខ្លាំង ចំនួន៣៣គ្រឿង ទូទឹកកករក្សាវ៉ាក់សាំង ចំនួន ១០០គ្រឿង និងបរិក្ខារប្រព័ន្ធត្រជាក់ដទៃទៀត
*គំនិតផ្តួចផ្តើមបង្កើតនូវ Cambodia COVID-19 Development Response Plan (2020-2021 & 2021-2022) គឺជាផែនការអភិវឌ្ឍសម្រាប់ឆ្លើយតបនឹងកូវីដ១៩ ដែលផ្តោតលើសុខភាព ស្ថេរភាព និងការងើប ឡើងវិញនៃសេដ្ឋកិច្ច ដែលវិស័យសុខាភិបាលអូស្ត្រាលីជួយដល់កម្មវិធី៣ គឺ១៖ ការកសាងសមត្ថភាព ផ្នែកសន្តិសុខសុខភាព រួមមានការពង្រឹងសមត្ថភាពមន្ទីរពិសោធន៍ អេពីដេមីសាស្ត្រ ប្រព័ន្ធផ្តល់ថ្នាំបង្ការ, ២៖ គម្រោងពង្រឹងប្រព័ន្ធសុខភាពសាធារណៈ និងការចូលរួមរបស់សហគមន៍ក្នុងការផ្តល់សេវាថែទាំសុខភាព និង៣៖ គម្រោងធ្វើឱ្យប្រសើរឡើងអនាម័យ និងអាហារូបត្ថម្ភដល់ស្ត្រី កុមារ និងគ្រួសារ។
*ជំនួយឆ្លើយតបការរីករាលដាលនៃជំងឺកូវីដ១៩ តាមរយៈអង្គការ Population Services International (PSI) ចំនួន២លានដុល្លារអូស្ត្រាលី និងមូលនិធិ Mérieux ចំនួន ៤,៤លានដុល្លារអូស្ត្រាលី។
ឯកឧត្ដមរដ្ឋមន្ត្រីសុខាភិបាល បានសម្តែងអំណរគុណយ៉ាងជ្រាលជ្រៅជាថ្មីម្តងទៀត ចំពោះការជួយឧបត្ថម្ភគាំទ្ររបស់រដ្ឋាភិបាល និងប្រជាជនអូស្ត្រាលីទាំងថវិកា និងបច្ចេកទេស ក្នុងស្មារតីសាមគ្គីភាព មិត្តភាព និងកិច្ចសហប្រតិបត្តិការលើវិស័យសុខាភិបាល រវាងប្រទេសទាំងពីរ កម្ពុជា-អូស្ត្រាលី ៕
