សម្តេចតេជោ កោតសរសើរក្រសួងចំនួន៤ ដែលពិនិត្យបានល្អលើលិខិតរបស់ខ្លួន មុនដាក់មកកាន់នាយករដ្ឋមន្ត្រី
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានកោតសរសើរក្រសួងចំនួន៤ ដែលពិនិត្យបានល្អលើលិខិតរបស់ខ្លួន មុនដាក់មកកាន់នាយករដ្ឋមន្ត្រី។
ការកោតសរសើររបស់សម្ដេចបានធ្វើឡើង នៅក្នុងឱកាសដែលសម្តេចអញ្ជើញចែកសញ្ញាបត្រជូននិស្សិតសាកលវិទ្យាល័យបៀលប្រាយជាង ៤ពាន់នាក់ នាព្រឹកថ្ងៃទី១៦ ខែមីនា ឆ្នាំ២០២៣។
ទន្ទឹមនិងនោះសម្តេចនាយករដ្ឋមន្ត្រីក៏បានសង្កេតឃើញកំហុសក្រសួង២ផ្សេងទៀតដែរ ដែលជាញឹកញយមិនបានដាក់កាលបរិច្ឆេទត្រឹមត្រូវ ក្នុងនោះក៏មានក្រសួងព័ត៌មាន និងក្រសួងការបរទេស និងសហប្រតិបត្តិការអន្តរជាតិផងដែរ។
បន្ថែមពីនេះ សម្តេចបានរិះគន់ លោកទេសរដ្ឋមន្ត្រី លី ធុច ដែលរាយការណ៍មិនបានច្បាស់លាស់ច្របូកច្របល់ ហើយបែរជាស្នើសុំមតិដឹកនាំ ដែលជារឿងលំបាកសម្រាប់សម្តេចទៅវិញ។
សម្តេចបានអំពាវនាវឱ្យរដ្ឋមន្ត្រីទាំងនោះ បន្តរៀនសូត្រថែមទៀត នូវអ្វីដែលជាចំណុចខ្វះខាតរបស់ខ្លួន។
ទោះជាយ៉ាងនេះក្តី សម្តេចតេជោ ក៏បានកោតសរសើរដល់ក្រសួងចំនួន៤ផងដែរ ដែលតែងបានពិនិត្យពិច័យបានល្អលើលិខិតរបស់ខ្លួន ពេលដាក់មកកាន់នាយករដ្ឋមន្ត្រី ក្នុងនោះមាន ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងវប្បធម៌ និងវិចិត្រសិល្បៈ និងក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ចជាដើម៕
