ឯកឧត្ដម ហ៊ុន ម៉ាណែត ថ្លែងអំណរគុណចំពោះការជ្រើសរើសចូលជាសមាជិកគណបក្សប្រជាជនកម្ពុជា របស់បងប្អូនក្នុងវិស័យសេដ្ឋកិច្ចក្រៅប្រព័ន្ធ

ភ្នំពេញ៖ ឯកឧត្តម បណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍នៃគណៈកម្មាធិការកណ្តាល និងជាប្រធានយុវជនគណបក្សប្រជាជនកម្ពុជាថ្នាក់កណ្តាល បានថ្លែងអំណរគុណចំពោះការជ្រើសរើស ចូលជាសមាជិកគណបក្ស ប្រជាជនកម្ពុជា របស់បងប្អូនក្នុងវិស័យសេដ្ឋកិច្ចក្រៅប្រព័ន្ធ។

នៅក្នុងឳកាសអញ្ជើញសំណេះសំណាលជាមួយសកម្មជនយុវជន គណបក្សប្រជាជន កម្ពុជាក្នុងវិស័យ សេដ្ឋកិច្ចក្រៅប្រព័ន្ធ ក្នុងរាជធានីភ្នំពេញ នៅថ្ងៃទី១១ ខែមីនា ឆ្នាំ២០២៣ ឯកឧត្តម បណ្ឌិត ហ៊ុន ម៉ាណែត បាន អរគុណចំពោះការជ្រើសរើសចូលជាសមាជិកគណបក្ស ប្រជាជនកម្ពុជាប្រកបដោយក្តីស្រឡាញ់ និងជំនឿជឿជាក់មកលើបុព្វហេតុដ៏ត្រឹមត្រូវរបស់គណបក្ស។

ឯកឧត្តម បណ្ឌិត បន្ថែមថា ពិតណាស់ ពាក្យក្នុង ឬក្រៅប្រព័ន្ធ គឺគ្រាន់តែជាការកំណត់និយមន័យ ជាលក្ខណៈបច្ចេកទេស សេដ្ឋកិច្ចតែប៉ុណ្ណោះ ប៉ុន្តែសម្រាប់គណបក្សប្រជាជនកម្ពុជាវិញ គឺវិនិយោគិន, ពាណិជ្ជករ, អាជីវករ, សិប្បករ, កម្មករ-និយោជិត និងសហគ្រិនទាំងក្នុងប្រព័ន្ធ និងក្រៅប្រព័ន្ធ គឺសុទ្ធសឹងជាប្រជាពលរដ្ឋខ្មែរ ដូចគ្នាទាំងអស់ និងជាសមាជិក-សកម្មជនគណបក្ស ដែលមានសិទ្ធិ និងការទទួលខុសត្រូវតែមួយ ហើយក៏ទទួលបាននូវការយកចិត្តទុកដាក់គិតគូរ ជួយទំនុកបម្រុងគាំពារ ដូចគ្នាផងដែរ ស្របទៅតាម គោលនយោបាយចំពោះវិស័យនីមួយៗ៕