ភ្នំពេញ៖ ឯកឧត្តម REMP LAWRENCE ALAN នៅថ្ងៃទី៥ ខែមីនា ឆ្នាំ២០២៣ បាននាំយកទេះរុញជនពិការពិភពលោក ចំនួន ១៦០រទេះ ថ្នាំពេទ្យ និងវ៉ែនតា អំណោយរបស់សមាគមរទេះរុញជនពិការពិភពលោក បរិច្ចាគជូនបញ្ជាការដ្ឋានកងទ័ពជើងគោក ដើម្បីជួយសម្រួលដល់យោធិនពិការរបស់បញ្ជាការដ្ឋានដែលធ្លាក់ខ្លួនពិការ ។
ឧត្តមសេនីយ៍ឯក ខឹមជា សាឃឿន មេបញ្ជាការរង នាយសេនាធិការកងទ័ពជើងគោក តំណាងដ៏ខ្ពង់ខ្ពស់របស់ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានសម្តែងនូវមោទនភាព និងការថ្លែងអំណរគុណយ៉ាងជ្រាលជ្រៅដល់សមាគមរទេះរុញជនពិការពិភពលោក ឯកឧត្តម REMP LAWRENCE ALAN ព្រមទាំងសហការីទាំងអស់ ចំពោះទឹកចិត្ត និងការរួមចំណែកដ៏ថ្លៃថ្លានេះ បាននាំយករទេះរុញ ថ្នាំពេទ្យ និងវ៉ែនតា ។
ការចូលរួមចំណែកនេះ ពិតជាបានបង្ហាញនូវទឹកចិត្តរបស់សប្បុរសជន ជាទឹកចិត្តដ៏សប្បុរស និងជាការចែករំលែកដ៏មានសារៈសំខាន់ដល់កងទ័ពជើងគោក នៃកងយោធពលខេមភូមិន្ទ ។
សូមបញ្ជាក់ថា៖ សមាគមរទេះរុញជនពិការពិភពលោក បានជួយឧត្ថម្ភរទេះរុញដល់កងទ័ពជើងគោកចំនួន ០២លើក លើកទី១នៅឆ្នាំ២០១៩ ជូនដល់មណ្ឌលអភិវឌ្ឍន៏ ៣១៧តេជោភ្នំឆត្រ ខេត្តបន្ទាយមានជ័យ ៕
