ប្រធានអង្គការ JICA អញ្ជើញថ្នាក់ដឹកនាំក្រសួងសង្គមកិច្ច ធ្វើទស្សនកិច្ចមណ្ឌលថែទាំមនុស្សចាស់នៅជប៉ុន ដើម្បីដកស្រង់បទពិសោធន៍គ្នាទៅវិញទៅមក

ភ្នំពេញ៖ ឯកឧត្ដម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានអនុញ្ញាតឱ្យលោក ហ្វូមីអូ យ៉ាម៉ាដា ប្រធានអង្គការសមាគមសហប្រតិបត្តិការ កម្ពុជា-ជប៉ុន (JICA) ចូលជួបសម្តែងការគួរសម និងពិភាក្សាការងារលើវិស័យសុខុមាលភាព មនុស្សចាស់នៅកម្ពុជា នាថ្ងៃទី២៨ ខែកុម្ភៈ ឆ្នាំ២០២៣ នាទីស្តីការក្រសួងសង្គមកិច្ច។

ក្នុងជំនួបនោះ ឯកឧត្ដមរដ្ឋមន្រ្តី វង សូត បានសម្តែងនូវការស្វាគមន៍យ៉ាងកក់ក្តៅ ចំពោះលោកប្រធានអង្គការ ព្រមទាំងបានកោតសរសើរ និងវាយតម្លៃខ្ពស់ ចំពោះកិច្ចសហការរបស់អង្គការ JCIA ដែលកន្លងមកតែងតែជួយឧបត្ថម្ភគាំទ្រ វិស័យសុខុមាលភាព មនុស្សចាស់ និងវិស័យផ្សេងៗទៀត ។

ឯកឧត្ដមបានគូសបញ្ជាក់ថា ក្នុងអំឡុងពេលនៃការរីករាលដាលជម្ងឺកូវីដ-១៩ រាជរដ្ឋាភិបាលកម្ពុជា បានគិតគូរយកចិត្តទុកដាក់ជាខ្លាំងចំពោះប្រជាជនក្រីក្ររងផលប៉ះពាល់ដោយសារជម្ងឺកូវីដ-១៩ ជាពិសេសផ្តោតសំខាន់លើមនុស្សវ័យចាស់ដែលបានអាយុចាប់ពី៦០ឆ្នាំឡើងទៅ តាមរយៈកម្មវិធីជំនួយសង្គមនានា ដើម្បីទ្រទង់ជីវភាពប្រចាំខែផងដែរ។

ឯកឧត្ដម ហ្វូមីអូ យ៉ាម៉ាដា មានប្រសាសន៍ថា ក្នុងអំឡុងពេលការរាតត្បាតជម្ងឺកូវីដ-១៩ មណ្ឌលថែទាំមនុស្សចាស់នៅជប៉ុនមិនមានដំណើរការទាំងស្រុងទេ អស់រយៈពេល៣ឆ្នាំមកហើយ។

ឯកឧត្ដម ហ្វូមីអូ យ៉ាម៉ាដា​ បានបន្ថែមថា ពេលនេះទើបអាចដាក់ឱ្យដំណើរការឡើងវិញ ស្របតាមផែនការដែលបានគ្រោងទុក។ ឯកឧត្ដមរំពឹងថា នាពេលឆាប់ៗខាងមុខ នឹងបញ្ជូនមន្រ្តីទៅសិក្សាបណ្តុះបណ្តាលផ្នែកថែទាំមនុស្សចាស់នៅមណ្ឌល ប្រទេសជប៉ុនផ្ទាល់តែម្តង និងត្រលប់មកធ្វើជាគ្រូបង្គោលនៅប្រទេសកម្ពុជាវិញលើជំនាញថែទាំមនុស្សវ័យចាស់ផងដែរ។

ជាមួយគ្នានេះ ឯកឧត្ដមប្រធានអង្គការ ក៏បានស្នើសុំរដ្ឋមន្រ្តី វង សូត និងសហការី អញ្ជើញធ្វើទស្សនកិច្ចមណ្ឌលថែទាំមនុស្សចាស់នៅប្រទេសជប៉ុន ដើម្បីដកស្រង់បទពិសោធន៍គ្នាទៅវិញទៅមករវាងប្រទេសទាំងពីរ។

ជាការឆ្លើយតប ឯកឧត្ដម វង សូត ក៏យល់ព្រមនូវសំណើរបស់លោកប្រធានអង្គការ និងរកពេលវេលាសមស្របណាមួយដឹកនាំគណៈប្រតិភូទៅធ្វើទស្សនៈកិច្ចដល់មណ្ឌលថែទាំមនុស្សចាស់ផ្ទាល់ ដើម្បីទទួលបាននូវបទពិសោធន៍ល្អៗសំដៅធានាដល់ការអភិវឌ្ឍវិស័យសុខុមាលមនុស្សចាស់នៅកម្ពុជា៕