ឯកឧត្តម សួស យ៉ារ៉ា ដឹកនាំគណៈប្រតិភូបំពេញទស្សនកិច្ចនៅទីស្នាក់ការថ្មីរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)
ភ្នំពេញ៖ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា នាព្រឹកថ្ងៃទី១០ ខែកុម្ភៈ ឆ្នាំ២០២៣ បានអញ្ជើញដឹកនាំគណៈប្រតិភូបំពេញទស្សនកិច្ចនៅទីស្នាក់ការថ្មីរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ។
ឯកឧត្តម ក្រាញ់ តូនី នាយកស្តីទីការិយាល័យរដ្ឋបាល លោក ឃ្នុត រ៉ូហ្សិនហក នាយករងការិយាល័យរដ្ឋបាល និងមន្ដ្រីជាន់ខ្ពស់របស់ (អ.វ.ត.ក) បានទទួលស្វាគមន៍យ៉ាងរាក់ទាក់ និងបានធ្វើបទបង្ហាញជូនគណៈប្រតិភូអំពីសមិទ្ធផលដែលសម្រេចបានដោយជោគជ័យរបស់ (អ.វ.ត.ក) ក្នុងការជំនុំជម្រះក្ដីលើអតីតមេដឹកនាំខ្មែរក្រហមអស់រយៈពេល ១៦ ឆ្នាំមកនេះ ដោយបានរួមចំណែកដល់ការរក្សាបាននូវសន្ដិភាព ការផ្សះផ្សារ ការមិនសងសឹកនិងចងគំនុំគ្នាក្នុងសង្គមជាតិ និងការបំបាត់បាននូវវប្បធម៌និទណ្ឌភាពនៅកម្ពុជា។ មន្ត្រីជាន់ខ្ពស់ (អ.វ.ត.ក) បានជម្រាបជូនអំពីសកម្មភាពការងារ ដែលត្រូវអនុវត្តបន្តក្រោយអង្គជំនុំជម្រះត្រូវបានបិទបញ្ចប់ជាស្ថាពរ ពោលគឺការអនុវត្តក្នុងអំឡុងពេលបីឆ្នាំទៅមុខ គិតចាប់ពីឆ្នាំ២០២៣ ដល់ឆ្នាំ២០២៥។
ឯកឧត្តម សួស យ៉ារ៉ា បានសម្តែងការកោតសរសើរលើសមទ្ធិផលរបស់ (អ.វ.ត.ក) និងបានបញ្ជាក់ថាសមទ្ធិផលនេះមានសារៈសំខាន់ណាស់សម្រាប់ការអប់រំ និងសន្ដិភាពរបស់ប្រជាជាតិទាំងមូល។ ឯកឧត្តមបន្ថែមថា ឯកឧត្តម គាំទ្រទាំងស្រុងនូវសកម្មភាពរបស់ (អ.វ.ត.ក) ដែលត្រូវបំពេញក្នុងអំឡុងពេលបីឆ្នាំខាងមុខនេះ ហើយឯកឧត្តមសង្ឃឹមថា នឹងមានកិច្ចសហប្រតិបត្តិការរវាង (អ.វ.ត.ក) និងរដ្ឋសភានៃព្រះរាជាណាចក្រកម្ពុជា។ ភាគីទាំងពីរក៏បានពិភាក្សាគ្នាលើគម្រោងសហប្រតិបត្តការរួមគ្នា ក្នុងការលើកកម្ពស់ការងារអប់រំផ្នែកគតិយុត្តិ ការចែករំលែកយុទ្ធសាស្រ្តល្អៗរបស់ (អ.វ.ត.ក) នៅថ្នាក់តំបន់និងអន្តរជាតិ តាមរយៈការបង្កើតឱ្យមានបណ្ណាល័យច្បាប់ឌីជីថល ការចូលរួមរបស់ស្ថាប័នស្រាវជ្រាវ និងការងារផ្សព្វផ្សាយដល់សាធារណជនឱ្យបានទូលំទូលាយផងដែរ ៕
