ឯកឧត្ដម ហុីង ប៊ុនហៀង៖ ដើម្បីរក្សាសុខសន្តិភាព លទ្ធិប្រជាធិប្បតេយ្យ និងការអភិវឌ្ឍនៅកម្ពុជា សូមបងប្អូនទៅបោះឆ្នោតជ្រើសរើសគណបក្សប្រជាជនកម្ពុជា
ភ្នំពេញ៖ ឯកឧត្ដមកិត្តិបណ្ឌិត ហុីង ប៊ុនហៀង មានប្រសាសន៍ថាដើម្បីរក្សាសុខសន្តិភាពដំណើរការលទ្ធិប្រជាធិប្បតេយ្យបានរលូន និងការអភិវឌ្ឍនៅកម្ពុជាសូមបងប្អូនប្រជាពលរដ្ឋទាំងអស់អញ្ចើញទៅបោះឆ្នោតជ្រើសរើសតំណាងរាស្រ្តអណត្តិទី៧ ឱ្យបានគ្រប់ៗគ្នាជូនគណបក្សប្រជាជនកម្ពុជានៅថ្ងៃទី២៣ ខែកក្កដា ឆ្នាំ២០២៣ខាងមុខនេះ។
ឯកឧត្ដមកិត្តិបណ្ឌិត ហ៊ីង ប៊ុនហៀង បានលើកឡើងក្នុងពិធីសំណេះសំណាលជាមួយប្រជាពលរដ្ឋ និងមន្ត្រីបក្សឃុំព្រែញាតិ ស្រុកគង់ពិសី ខេត្តកំពង់ស្ពឺ នាព្រឹកថ្ងៃទី០៤ ខែកុម្ភៈ ឆ្នាំ២០២៣។
ឯកឧត្ដមកិត្តិបណ្ឌិត ហ៊ីង ប៊ុនហៀង បានបន្តថា ប្រជាពលរដ្ឋគ្រប់រូបមានកាតព្វកិច្ចមានសិទ្ធិពេញលេញក្នុងការចូលរួមបោះឆ្នោតជ្រើសរើសតំណាងរាស្រ្តនៅគ្រប់ៗអណត្តិតាមច្បាប់រដ្ឋធម្មនុញ្ញនៃព្រះរាជាណាចក្រកម្ពុជា។
ឯកឧត្តមកិត្តិបណ្ឌិត បានអំពាវនាវដល់មន្រ្តីបក្សជួយជម្រុញប្រជាពលរដ្ឋ សូមអញ្ជើញទៅចូលរួមបោះឆ្នោតជូនគណៈបក្សប្រជាជនកម្ពុជាឱ្យបានគ្រប់ៗគ្នាដើម្បីបន្តការគាំទ្រសម្ដេចតេជោ ហ៊ុនសែន ជានាយករដ្ឋមន្រ្តីបន្តទៅមុខទៀត ដើម្បីការពារសន្តិភាពបន្តការអភិវឌ្ឍប្រទេសជាតិឱ្យឆាប់បានរីកចំរើនដូចប្រទេសអភិវឌ្ឍន៍នានាលើពិភពលោកជាពិសេសឆ្លើយតប និងគុណបំណាច់ធំធេងរបស់គណៈបក្សប្រជាជនកម្ពុជាដែលបានរំដោះប្រទេសជាតិ និងប្រជាជនឱ្យរួចផុតពីការកាប់សំលាប់ក្នុងរបបប៉ុលពត និងការខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជាក្នុងការកសាង និងអភិវឌ្ឍន៍ប្រទេសតាំងពីបាតដៃទទេរហូតដល់មានអ្វីៗគ្រប់បែបយ៉ាងដូចសព្វថ្ងៃនេះ។ក្នុងឱកាសនោះដែរឯកឧត្ដម បាននែនាំដល់មន្រ្តីបក្សស្រុកគង់ពិសី ខេត្តកំពង់ស្ពឺ បន្តធ្វើអំពើល្អបំរើសេវាសាធារណៈសេវាតម្រូវការជូនប្រជាពលរដ្ឋឱ្យបានល្អត្រឹមត្រូវត្រូវបន្តអនុវត្តន៍គោលនយោបាយដ៍ត្រឹមត្រូវរបស់គណៈបក្សប្រជាជនកម្ពុជាឱ្យបានល្អនិងដោយស្មោះត្រង់ កុំធ្វើជាមន្រ្តីជើង១០ត្រូវធ្វើជាមន្រ្តីជើង២ចុះសួរសុខទុក្ខជាមួយប្រជាពលរដ្ឋនៅតាមមូលដ្ឋានជាប្រចាំដើម្បីឱ្យដឹងពីសុខទុក្ខ និងការលំបាករបស់ប្រជាពលរដ្ឋដោះស្រាយឱ្យបានទាន់ពេលវេលា។ ត្រូវរក្សាការពារតម្លៃសុខសន្តិភាពដែលមាននាបច្ចុប្បន្ននេះឱ្យបានដាច់ខាត ទោះបីក្នុងតម្លៃណាក៏ដោយ ត្រូវប្រឆាំងដាច់ខាតនូវរាល់សកម្មភាពបដិវត្តពណ៌នៅកម្ពុជាត្រូវប្រឆាំងដាច់ខាតរាល់ការញុះញង់របស់ជនអគតិមួយចំនួនដែលប៉ះពាល់ដល់ដំណើរការបោះឆ្នោតប្រជាធិប្បតេយ្យនៅកម្ពុជាខាងមុខ ចូលរួមថែរក្សាសមិទ្ធផលនានាក្នុងសង្គមជាតិដែលមាននាសព្វថ្ងៃនេះ ។
ក្នុងឱកាសនោះដែរ ឯកឧត្ដមកិត្តិបណ្ឌិត បាននាំយកអំណោយដ៏ថ្លៃថ្លារបស់ស្ដេចតេជោ និងសម្ដេចកិត្តិព្រឹទ្ធបណ្ឌិត ផ្ដល់ជូនយាយជីតាជីក្រណាត់ស និងថវិកា២មុឺនរៀល, ក្រុមប្រឹក្សាឃុំចំនួន១៧៤ ក្នុងម្នាក់ៗទទួលបានថវិកា៥មុឺនរៀល, សាលាឃុំព្រែញាតិអង្ករ៣តោន និងថវិការ៥០មុឺងរៀល, ឃុំព្រះនិព្វានអង្គរ២តោន និងថវិកា៥០ម៉ឺនរៀល និងសាលាស្រុកគង់ពិសី ទទួលបានថវិកា២លានរៀលផងដែរ ៕
