នាយឧត្តមសេនីយ៍ កែ គឺមយ៉ាន ដឹកនាំកិច្ចប្រជុំឆ្លងរបាយការណ៍ត្រួតពិនិត្យគ្រឿងញៀនឆ្នាំ២០២២ និងលើកទិសដៅការងារឆ្នាំ២០២៣

ភ្នំពេញ៖ ឯកឧត្តម នាយឧត្តមសេនីយ៍ កែ គឺមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន នាព្រឹកថ្ងៃពុធ ទី០១ ខែកុម្ភៈ ឆ្នាំ២០២៣ បានអញ្ជើញដឹកនាំកិច្ចប្រជុំឆ្លងរបាយការណ៍ត្រួតពិនិត្យគ្រឿងញៀនឆ្នាំ២០២២ និងលើកទិសដៅការងារឆ្នាំ២០២៣ នៅអគារមិត្តភាព ទីស្តីការគណៈរដ្ឋមន្រ្តី។

បន្ទាប់ពីបានស្តាប់នូវសេចក្តីរាយការណ៍របស់ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ អាជ្ញាធរជាតិប្រយុទ្ធប្រឆាំងគ្រឿងញៀនរួចមក ឯកឧត្តម ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានផ្តល់អនុសាសន៍សំខាន់ៗបន្ថែមទៀត ដើម្បីឲ្យអង្គប្រជុំពិនិត្យ និងបញ្ចូលក្នុងរបាយការណ៍ ឲ្យបានកាន់តែគ្រប់ជ្រុងជ្រោយ ស្របតាមស្ថានការណ៍ បញ្ហាប្រឈម និងកិច្ចខិតខំប្រឹងប្រែងរបស់ក្រសួង ស្ថាប័ន ជាសមាជិកអាជ្ញាធរជាតិប្រយុទ្ធប្រឆាំងគ្រឿងញៀន និងអង្គភាពនានា ដែលតែងតែបានខិតខំយកចិត្តទុកដាក់ លើការងារប្រយុទ្ធប្រឆាំងគ្រឿងញៀន។

បន្ថែមពីខ្លឹមសារក្នុងរបាយការណ៍ ឯកឧត្តម ឧបនាយករដ្ឋមន្រ្តី បានបន្ត ដាសតឿនយ៉ាងដាច់ខាតត្រូវអនុវត្តនូវគោលនយោបាយភូមិ ឃុំ មានសុវត្ថិភាព និងការផ្សព្វផ្សាយឲ្យបានកាន់តែទូលំទូលាយនូវទិសស្លោកជាតិ ៣កុំ និង១រាយការណ៍គឺ៖ កុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍ ផ្តល់ព័ត៌មានដល់សមត្ថកិច្ចគ្រប់ករណីបទល្មើសគ្រឿងញៀន ៕