យើងទាំងអស់គ្នាបានដឹងហើយថា របបប្រល័យពូជសាសន៍ប៉ុលពត គឺឃោរឃៅមិនអាចទ្រាំទ្ររស់នៅបានទេ ដូច្នេះកាតព្វកិច្ចអាទិភាពបំផុត គឺធ្វើយ៉ាងណាប្រមែប្រមូលកម្លាំង ពីគ្រប់គោលដៅគ្រប់តំបន់ ដោយមិនគិតពីនិន្នាការខាងណាឡើយ។
ទោះបីមានពិការភាពក៏ដោយគឺត្រូវតែរួបរួមប្រមូលផ្ដុំដើម្បីវាយផ្ដួលរំលំរបបប្រល័យពូជសាសន៍ប៉ុលពតឱ្យខាងតែបាន! ដូច្នេះហើយបានជារណសិរ្សសាមគ្គី សង្គ្រោះជាតិកម្ពុជាអាចបង្កើតឡើង ដោយឈរលើមូលដ្ឋានកម្លាំង៥ ប៉ុន្តែក្នុងចំណោមទាំង៥នោះ មិនអាចជួបជុំគ្នាគ្រប់កូរ៉ុមនោះទេ។
ដោយសារតែកម្លាំងដែលដឹកនាំដោយសមមិត្ត សាយ ភូថង និងសមមិត្ត ទៀ បាញ់ ស្ថិតនៅក្នុងប្រទេសថៃដែលត្រូវលាក់ការ ទើបមិនអាចបង្ហាញមុខនៅថ្ងៃបង្កើតរណសិរ្ស។ ពោលគឺថ្ងៃទី២ ធ្នូ ១៩៧៨ ដែលបានបង្ហាញមុខត្រឹមតែ៤កម្លាំងប៉ុណ្ណោះ និងដែលបានត្រឹមតែទាក់ទងផ្ទៃក្នុងរួបរួមគ្នា ជាធ្លុងមួយដើម្បីផ្ដួលរំលំរបបដ៏យង់ឃ្នងនេះ ពីគ្រប់ទិសទីក្នុងប្រទេសកម្ពុជា។
កម្លាំងមូលដ្ឋានដ៏សំខាន់ទាំង៥រួមមាន៖
– ភាគីទី១ មានមូលដ្ឋាននៅភូមិភាគបូព៌ាដឹកនាំដោយសមមិត្ត ហេង សំរិន និងសមមិត្ត ជា ស៊ីម
– ភាគីទី២ មានមូលដ្ឋានភូមិភាគឦសាន្តដឹកនាំដោយសមមិត្ត ប៊ូ ថង ក្រោកឡើងបះបោរនៅឆ្នាំ ១៩៧៥
– ភាគីទី៣ ជាក្រុមកុម្មុយនិស្តដឹកនាំដោយបញ្ញវន្តធ្លាប់ទទួលការបណ្ដុះបណ្ដាលនៅទីក្រុងហាណូយមាន សមមិត្ត ចាន់ ស៊ី និងអ្នកដទៃទៀតដូចជា សមមិត្តប៉ែន សុវណ្ណ និងសមមិត្ត ជា សុទ្ធ
– ភាគីទី៤ ជាកម្លាំងថ្មីបង្កើតឡើងដោយ សមមិត្ត ហ៊ុន សែន
– ភាគីទី៥ មានមូលដ្ឋាននៅភូមិភាគនិរតីដឹកនាំដោយសមមិត្ត សាយ ភូថង និងសមមិត្ត ទៀ បាញ់ ជាក្រុមចលនាប្រឆាំងខ្មែរក្រហមក្នុងទឹកដីថៃ។
ស្មារតី២ធ្នូនៃកម្លាំងរណសិរ្សកាន់តែស្រួចស្រាលត្របាញ់ចូលគ្នាដើរតាមខ្សែបន្ទាត់តែមួយ គោលដៅតែមួយ និងបុព្វហេតុតែមួយ។ ជាក់ស្តែងរចនាសម្ព័ន្ធដឹកនាំរបស់ “រណសិរ្សសាមគ្គីសង្គ្រោះជាតិកម្ពុជា” វិញមានចំនួន៨ក្បាលម៉ាស៊ីន ដូចខាងក្រោម៖
១. សមមិត្ត ហេង សំរិន
២. សមមិត្ត ជា ស៊ីម
៣. សមមិត្ត ហ៊ុន សែន
៤. សមមិត្ត ប៉ែន សុវណ្ណ
៥. សមមិត្ត រស់ សម័យ
៦. សមមិត្ត ប៊ូ ថង
៧. សមមិត្ត ប៊ុន មី
៨. សមមិត្ត ស៊ើយ កែវ។
ក្រោយការរៀបចំកម្លាំងរណសិរ្ស គឺបានចំណាយពេលត្រឹម២៨ថ្ងៃប៉ុណ្ណោះ ដើម្បីរំដោះបានខេត្តដំបូងនៅក្នុងប្រទេស នៅថ្ងៃទី៣០ ខែធ្នូ ឆ្នាំ១៩៧៨ ពោលគឺខេត្តក្រចេះតែម្តង។ នៅថ្ងៃទី៣១ កងកម្លាំងរណសិរ្សក៏រំដោះខេត្តរតនគិរីបាន ហើយវាឆ្ពោះទៅក្រុងភ្នំពេញ និងបានយករដ្ឋធានីនេះទាំងស្រុង នៅថ្ងៃទី៧ មករា ១៩៧៩ ដែលជាទីតាំងរដ្ឋបាលដ៏សំខាន់ និងជាបេះដូងរបស់ប្រទេសទាំងមូល។ ហើយបានកំណត់ជា ជ័យជម្នះនិងជាថ្ងៃកំណើតទី២ នៃប្រជាជាតិខ្មែរទាំងមូល ៕
