សាខាកាកបាទក្រហមកម្ពុជា រាជធានីភ្នំពេញ រៀបចំប្រារព្ធទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២២ ក្រោមប្រធានបទ «ធ្វេីឱ្យមានសមភាព»
ភ្នំពេញ៖ សាខាកាកបាទក្រហមកម្ពុជា រាជធានីភ្នំពេញ នៅល្ងាចថ្ងៃទី ២៩ ខែ ធ្នូ ឆ្នាំ ២០២២នេះ បានរៀបចំប្រារព្ធទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២២ ក្រោមប្រធានបទ «ធ្វេីឱ្យមានសមភាព» ក្រោមអធិបតីភាព លោក ជិន ប៊ុនធឿន នាយកប្រតិបត្តិសាខា តំណាងឯកឧត្តម ឃួង ស្រេង ប្រធានគណៈកម្មាធិការសាខា និងជាប្រធានក្រុមការងារឥស្សរជនឆ្នេីមថ្នាក់ជាតិ ថ្នាក់សាខារាជធានីភ្នំពេញ ។
ទិវានេះមានការអញ្ជេីញចូលរួមពីលោក លោកស្រីជាមន្ត្រីប្រតិបត្តិសាខា អនុសាខាខណ្ឌសែនសុខ ចំនួន៣០នាក់ ព្រមទាំងក្មួយៗកុមារផ្ទុកមេរោគអេដស៍-ជំងឺអេដស៍ និងកុមាររងផលប៉ះពាល់ អ្នកថែទាំកុមារ ចំនួន២៥០នាក់ ។
តាមរបាយការណ៍ស្វាគមន៍របស់ លោកស្រី ហង្ស ណាវី ប្រធានការិយាល័យសុខភាព និងជានាយិកាអគារផ្កាម្លិះគាំទ្រចិត្តសាស្រ្តសង្គម បានឱ្យដឹងថា៖ រយៈពេលកន្លងទៅនេះ អគារផ្កាម្លិះបានទទួលកុមារសរុបចំនួន៥៦៣នាក់ ក្នុងនោះកុមារផ្ទុកមេរោគអេដស៍-ជំងឺអេដស៍មានចំនួន៤០២នាក់ និងកុមាររងផលប៉ះពាល់ដោយមេរោគអេដស៍មានចំនួន១៦១នាក់ ដែលសហការជាមួយមណ្ឌលកុមារកំព្រាចំនួន៧ក្នុងរាជធានីភ្នំពេញ និងមួយចំនួនទៀតមកពីតាមសហគមន៍ ។ នៅចំពោះមុខអគារផ្កាម្លិះនៅតែបន្តសកម្មភាពស្នូលរបស់ខ្លួនជាប់ជាប្រចាំរួមមាន អប់រំចិត្តសាស្រ្ត អប់រំសុខភាព ពង្រឹងការប្រើប្រាស់ថ្នាំប្រឆាំងនឹងមេរោគឱ្យបានត្រឹមត្រូវ និងទៀងទាត់ពេលវេលា បង្រៀនភាសាខ្មែរ បង្រៀនភាសាអង់គ្លេស បង្រៀនកុំព្យូទ័រ គូរគំនូរ និងសកម្មភាពបន្ទាប់បន្សំមួយចំនួនទៀត។ ក្រៅពីការងារទាំងអស់នេះ អគារផ្កាម្លិះនៅតែបន្តសហការជាមួយមន្ទីរសង្គមកិច្ចរាជធានីភ្នំពេញ មន្ទីរពេទ្យកុមារជាតិ និងអង្គការដៃគូមួយចំនួនក្នុងការស្វែងរកដំណោះផ្សេងៗ ទាក់ទងទៅនឹងស្ថានភាពជំងឺរបស់កុមារ ព្រមទាំងមានការជួយព្យាបាលជំងឺភ្នែក ត្រចៀក មាត់ ធ្មេញ ដែលជាសំណូមពរ និងតម្រូវការរបស់កុមារផងដែរ ។ ជារៀងរាល់ខែអគារផ្កាម្លិះគាំទ្រចិត្តសាស្ត្រសង្គម បានការជួយឧបត្ថម្ភជាអង្ករចំនួន១តោន និងថវិកាចំនួន៣លានរៀល ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយនិងសាខាកាកបាទក្រហមកម្ពុជា រាជធានីភ្នំពេញ ក្នុងការរៀបចំអាហារ៣ពេលសម្រាប់កុមារ និងដើម្បីបន្តនិរន្តភាពការងារ ក្នុងការចូលរួមចំណែកគាំទ្រទៅនឹងសកម្មភាពដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្រ្តី និងកុមារ ។
មានមតិនាឱកាសនោះ ក្នុងនាម ឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ លោក ជិន ប៊ុនធឿន បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិតប្រធាន ប៊ុន រ៉ានី ហ៊ុនសែន ជូនដល់អង្គពិធីទាំងមូល ជាពិសេសក្មួយៗកុមារទាំងអស់ ប្រកបដោយក្តីនឹករលឹក ។
លោកនាយកប្រតិបត្តិសាខា ក៏បានផ្សព្វផ្សាយពីសារលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលក្នុងនោះបានអំពាវនាវដល់បងប្អូនជនរួមជាតិ សូមចូលរួមអនុវត្តទាំងអស់គ្នា នូវផែនការយុទ្ធសាស្ត្ររាជរដ្ឋាភិបាល ដើម្បីសម្រេចបានការបញ្ចប់អេដស៍នៅឆ្នាំ២០២៥ និង «ការធ្វើឱ្យមានសមភាព» តាមរយៈសកម្មភាពសំខាន់ៗដូចខាងក្រោម៖
១- សូមបងប្អូនជនរួមជាតិ, វិស័យឯកជន, អង្គការជាតិ-អន្តរជាតិទាំងអស់ចូលរួមជាកម្លាំងក្នុងចរន្តជាតិតែមួយ, ទប់ស្កាត់ជំងឺឆ្លងនានា ដើម្បីបញ្ចប់ជំងឺអេដស៍នៅឆ្នាំ ២០២៥ ជាមួយនឹងការធ្វើឱ្យមានសមភាពនៅក្នុងសង្គមជាតិ
២- សូមបងប្អូនជនរួមជាតិ ជាពិសេសក្មួយៗ យុវជន-យុវនារី ត្រូវស្វែងយល់ជាប្រចាំនូវចំណេះដឹងថ្មីៗ ស្តីពីការបង្ការការចម្លងមេរោគអេដស៍ និងការរាលដាលនៃមេរោគអេដស៍ ដើម្បីបង្ការខ្លួនយើង, គ្រួសារយើង, សហគមន៍យើង និងសង្គមជាតិយើង
៣- សូមប្រជាពលរដ្ឋ ដែលបានប្រព្រឹត្ត ឬសង្ស័យបានប្រឈមនឹងការឆ្លងមេរោគអេដស៍, ត្រូវស្វែងរក សេវាផ្តល់ប្រឹក្សា និងធ្វើតេស្តឈាមរកមេរោគអេដស៍ ដោយរក្សា ការសម្ងាត់នៅតាមសេវាសាធារណៈ, សេវាអង្គការសង្គមស៊ីវិល, សេវាឯកជន។ល។ ដើម្បីអាចសម្រេចចិត្តទៅទទួលសេវាថែទាំ និងព្យាបាលបន្តបានទាន់ពេលវេលា
៤- សូមស្ត្រីមានផ្ទៃពោះទាំងឡាយ ត្រូវស្វែងរកសេវាថែទាំ និងពិនិត្យផ្ទៃពោះ ឱ្យបានយ៉ាងតិច ៤ដង និងទៀងទាត់ តាមការណែនាំរបស់បុគ្គលិកពេទ្យ ដើម្បីសុខភាពមាតា និងទារក ជាពិសេសអាចជួយទប់ស្កាត់ការចម្លងមេរោគអេដស៍ និងមេរោគស្វាយពីម្តាយទៅទារក
៥- សូមបងប្អូនប្រជាពលរដ្ឋបញ្ឈប់ការរើសអើង ទៅលើអ្នកផ្ទុកមេរោគអេដស៍ និងជំងឺអេដស៍ ដែលជាអំពើផ្ទុយទៅនឹងច្បាប់ស្តីពីការបង្ការ និងទប់ស្កាត់ការរីករាលដាលមេរោគអេដស៍ និងជំងឺអេដស៍នៅកម្ពុជា
