ឧត្តមសេនីយ៍ត្រី អ៊ុំ សុភា អញ្ជើញសំណេះសំណាល ជាមួយក្រុមការងារ កា៩០ យោធភូមិភាគទី៩ នៃកងទ័ពប្រជាជនវៀតណាម

ភ្នំពេញ៖ លោកឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នាថ្ងៃទី២០ ខែធ្នូ ឆ្នាំ២០២២ បានអញ្ជើញជួបសំណេះសំណាលជាមួយក្រុមការងារk90 យោធភូមិភាគទី៩ នៃកងទ័ពប្រជាជនវៀតណាម ដែលមកបំពេញការងារ ស្រាវជ្រាវ រុករក ជីកលើក និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីគ្រប់សម័យសង្គ្រាម ក្នុងភូមិសាស្ត្រខេត្តកំពង់ឆ្នាំង នៅទីបញ្ជាការផ្នែកសឹករងកំពង់ត្រឡាច ។

ស្ថិតក្នុងឱកាសនោះ លោកមេបញ្ជាការ បានមានប្រសាសន៍ថ្លែងអំណរគុណចំពោះកងទ័ពស្ម័គ្រចិត្តវៀតណាម ដែលបានពលីជីវិតក្នុងបុព្វហេតុចូលរួមរំដោះប្រទេសកម្ពុជា និយាយរួមនិយាយដោយឡែក ខេត្តកំពង់ឆ្នាំង ពីរបបប្រល័យពូជសាសន៍ ប៉ុល ពត រហូតទទួលបានជ័យជំនះ នៅថ្ងៃទី០៧ ខែមករា ឆ្នាំ១៩៧៩ ដែលជាថ្ងៃកំណើតទី២ របស់ប្រជាជនកម្ពុជាទូទាំងប្រទេស ។

លោកមេបញ្ជាការ បានបន្តថា ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ នាយករដ្ឋមន្ត្រី ប្រទេសកម្ពុជាមានទំនាក់ទំនងយ៉ាងល្អជាមួយគ្រប់បណ្តាប្រទេសជាមិត្ត ក៏ដូចជាប្រទេសវៀតណាម ដោយឡែកអង្គភាពតំបន់ប្រតិបត្តិការសឹករងកំពង់ឆ្នាំង ជាមួយបញ្ជាការដ្ឋាន យោធភូមិភាគទី៩ នៃកងទ័ពប្រជាជនវៀតណាម ក៏បានចងសម្ព័ន្ធមេត្រីភាពយ៉ាងជិតស្និទផងដែរ ។ លោកបានប្តេជ្ញាសហការជួយសម្រួលគ្រប់ការងាររបស់ក្រុមជំនាញk90 ក្នុងកិច្ចប្រតិបត្តិការស្រាវជ្រាវ រុករក ជីកលើក អដ្ឋិធាតុ កងទ័ពស្ម័គ្រចិត្តវៀតណាម ឲ្យសម្រេចបានលទ្ធផលល្អប្រសើរ នាពេលនេះ ។

ក្នុងឱកាសនេះដែរ ឧត្តមសេនីយ៍ត្រី អ៊ុំ សុភា ក៏បាននាំយកអំណោយរបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ក្នុងនោះមាន អង្ករ ១២៥គីឡូក្រាម និងគ្រឿងឧបភោគបរិភោគ មួយចំនួន ឧបត្ថម្ភដល់ក្រុមការងាររុករក ជីកលើក និងធ្វើមាតុភូមិនិវត្តន៍អដ្ឋិធាតុកងទ័ពស័្មគ្រចិត្ត និងជំនាញការវៀតណាម និងបានចូលរួមពិសារអាហារសាមគ្គី ដែលបញ្ជាក់អំពីទំនាក់ទំនងយ៉ាងស្អិតរមួតរវាងអង្គភាពទាំងពីរ តំបន់់ប្រតិបត្តិការសឹករងកំពង់ឆ្នាំង និង ជំនាញK90 យោធភូមិភាគទី៩ នៃកងទ័ពប្រជាជនវៀតណាម ។

ចុងបញ្ចប់ លោកមេបញ្ជាការ បានជូនពរដល់ក្រុមការងារទាំងអស់ សូមប្រកបបានសុខភាពល្អបរិបូណ៌ ជួបប្រទះនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសម្រេចជោគជ័យគ្រប់ភារកិច្ចដែលថ្នាក់លើបានដាក់ឲ្យ ។

គួរបញ្ជាក់ផងដែរថា ចាប់ពីជំហ៊ានទី១ រដូវប្រាំងឆ្នាំ២០០២-២០០៣ រហូតដល់ជំហ៊ានទី២១ រដូវប្រាំងឆ្នាំ២០២១-២០២២ ក្រុមការងារជំនាញខេត្តកំពង់ឆ្នាំង សហការជាមួយក្រុមជំនាញK90 ស្រាវជ្រាវ រុករក ជីកលើក និងធ្វើមាតុភូមិនិវត្តន៍ អដ្ឋិធាតុកងទ័ពស្ម័គ្រចិត្ត និងជំនាញការវៀតណាម បានចំនួន៣៦៣សព ដោយឡែក ជំហ៊ានទី២២ រដូវប្រាំងឆ្នាំ២០២២-២០២៣នេះ ក្រុមការងារ ជីកលើកបាន ០១សព និងកំពុងរុករកជាបន្តទៀត ៕