ក្រុមការងារអនុសាខាកាកបាទក្រហមកម្ពុជា ខណ្ឌសែនសុខ ចុះសួរសុខទុក្ខ និងយកអំណោយមនុស្សធម៌ឧបត្ថម្ភជូនពលរដ្ឋជួបការលំបាក និងមានជំងឺ ៥គ្រួសារ រស់នៅសង្កាត់ភ្នំពេញថ្មី
ភ្នំពេញ៖ ក្រុមការងារអនុសាខាកាកបាទក្រហមកម្ពុជា ខណ្ឌសែនសុខ ដឹកនាំដោយលោកស្រី ហេង ថុល អនុប្រធានគណៈកម្មាធិការអនុសាខា តំណាងលោក ម៉ូវ មានិត ប្រធានកិត្តិយសអនុសាខា កាលពីល្ងាចថ្ងៃទី ១៤ ខែ ធ្នូ ឆ្នាំ ២០២២ បានចុះសាកសួរសុខទុក្ខ និងនាំយកអំណោយមនុស្សធម៌ទៅជួយឧបត្ថម្ភជូនដល់ប្រជាពលរដ្ឋជួបការលំបាក និងមានជំងឺ ចំនួន៥គ្រួសារ រស់នៅសង្កាត់ភ្នំពេញថ្មី ។
នាឱកាសនោះ លោកស្រីអនុប្រធានគណៈកម្មាធិការអនុសាខា បានលេីកឡេីងពីសកម្មភាពការងារមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ក្នុងការយកចិត្តទុកកដាក់គិតគូរជួយដល់ប្រជាពលរដ្ឋដែលរងគ្រោះ និងងាយរងគ្រោះគ្រប់ប្រភេទដោយមិនប្រកាន់ពីនិន្នាការនយោបាយ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ពោល “ទីណាមានការលំបាក ទីនោះមានកាកបាទក្រហមកម្ពុជា” ។
លោកស្រីក៏បានលេីកទឹកចិត្តដល់គ្រួសារដែលមានជំងឺឱ្យបន្តយកចិត្តទុកដាក់មេីលថែព្យាបាលជំងឺ ដោយស្តាប់តាមការណែនាំរបស់គ្រូពេទ្យ ដើម្បីឆាប់បានជាសះស្បេីយ ។
អំណោយមនុស្សធម៌ដែលនាំយកមកប្រគល់ជូនក្នុង១គ្រួសារៗរួមមាន៖ អង្ករ២៥គីឡូក្រាម ទឹកផ្លែឈេី៦កំប៉ុង ទឹកសុទ្ធ១កេស មី១កេស ទឹកសុីអុីវ១យួរ ត្រីខ៥កំប៉ុង ស្ករស១គីឡូក្រាម ទឹកដោះគោខាប់២កំប៉ុង ម៉ាស១កញ្ចប់ និងថវិកាចំនួន៥មុឺនរៀល៕
