ឯកឧត្តមបណ្ឌិត ញឹម ខេមរា អញ្ជើញបើកវគ្គបណ្តុះបណ្តាលស្តីពី «ការទូតអាហារ Culinary Diplomacy»
ភ្នំពេញ៖ ឯកឧត្តមបណ្ឌិត ញឹម ខេមរា រដ្ឋលេខាធិការ និងជាប្រធានក្រុមការងារសម្របសម្រួលការទូតសេដ្ឋកិច្ច តំណាងដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នាថ្ងៃទី១២ ខែធ្នូ ឆ្នាំ២០២២ បានអញ្ជើញជាអធិបតីភាពដ៏ខ្ពង់ខ្ពស់ ក្នុងកម្មវិធីបើកវគ្គបណ្តុះបណ្តាលស្តីពី «ការទូតអាហារ Culinary Diplomacy» នៅវិទ្យាស្ថានជាតិការទូត និងទំនាក់ទំនងអន្តរជាតិ ដោយមានការអញ្ជើញចូលរួមពីសហព័ទ្ធឯកអគ្គរាជទូតកម្ពុជា ដែលទើបទទួលការតែងតាំងថ្មី និងចុងភៅប្រចាំស្ថានតំណាងកម្ពុជានៅបរទេស សរុបប្រមាណ ៣០នាក់។
ស្របតាមយុទ្ធសាស្ត្រការទូតសេដ្ឋកិច្ចឆ្នាំ២០២១-២០២៣ វគ្គបណ្តុះបណ្តាលនេះធ្វើឡើងក្នុងគោលបំណងចែករំលែកចំណេះដឹងឱ្យកាន់តែច្បាស់ពីការទូតម្ហូបអាហារ ដែលជាឧបករណ៍ការទូតដ៏មានឥទ្ធិពលមួយ ក្នុងការបង្កើនចំណងមិត្តភាពរវាងប្រទេស និងក្នុងន័យលើកកម្ពស់វិស័យទេសចរណ៍ និងវប្បធម៌ជាតិ រួមទាំងម្ហូបខ្មែរលើឆាកអន្តរជាតិ។
