សម្តេចតេជោ ហ៊ុន សែន៖ បញ្ហាប្រទេសមីយ៉ាន់ម៉ា ត្រូវការពេលយ៉ាងតិចបំផុត ៥ឆ្នាំទៀត ដើម្បីដោះស្រាយ
បែលហ្សិត៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា បញ្ហាដ៏ស្មុគស្មាញរបស់ប្រទេសមីយ៉ាន់ម៉ា ត្រូវការពេលយ៉ាងតិច ៥ឆ្នាំទៀតឯណោះ ដើម្បីដោះស្រាយ។
សម្ដេចថ្លែងនាពេលជួបសំណេះសំណាលជាមួយប្រជាពលរដ្ឋកំពុងរស់នៅអឹរ៉ុប នៅថ្ងៃទី១២ ខែធ្នូ ឆ្នាំ២០២២ សម្តេចតេជោ ហ៊ុន សែន ក៏បានគូសបញ្ជាក់ឲ្យដឹងទៀតថា បេសកជនពិសេសរបស់ប្រធានអាស៊ាន ឆ្នាំ២០២២ នឹងមិនទៅធ្វើទស្សនកិច្ចលើកទី៣ នៅមីយ៉ាន់ម៉ា នោះទេ។
សម្តេចតេជោនាយករដ្ឋមន្ត្រី លោកមានប្រសាសន៍បញ្ជាក់បែបនេះ[សម្ដេចលោកអាចនឹងទាយបានថា មីយ៉ាន់ម៉ា តិចបំផុត ៥ឆ្នាំទៀត។ អ្នកណាជើងខ្លាំង ទៅដោះរឿងផ្ទៃក្នុងគេទៅ។ បេសកជនរបស់ប្រធានអាស៊ាន មិនអាចធ្វើដំណើរទៅមីយ៉ាន់ម៉ា តទៅទៀតនោះទេ]។
ប្រទេសកម្ពុជាក្នុងនាមជាប្រធានអាស៊ាន បានខំប្រឹងប្រែងយ៉ាងខ្លាំងចាប់តាំងពីទទួលបានញញួរអាស៊ានកាលពីដើមឆ្នាំ២០២២ ដើម្បីជួយដោះស្រាយវិបត្តិនយោបាយរបស់ប្រទេសមីយ៉ាន់ម៉ា។ ក្នុងពេលនោះសម្តេចតេជោ ហ៊ុន សែន ក៏បានអញ្ជើញទៅដល់ប្រទេសមីយ៉ាន់ម៉ាលើកទីមួយ ហើយឯកឧត្ដមឧបនាយករដ្ឋមន្ត្រី ប្រាក់ សុខុន ក្នុងនាមជាបេសកជនពិសេសរបស់អាស៊ាន បានធ្វើដំណើរទៅមីយ៉ាន់ម៉ាពីរលើកមកហើយ។
របបយោធាប្រទេសមីយ៉ាន់ម៉ា កាលពីថ្ងៃទី១៦ ខែវិច្ឆិកា ឆ្នាំ២០២២ បានប្រកាសពីការដោះលែងអ្នកទោសជាង ៦.០០០នាក់ ដើម្បីអបអរសាទរថ្ងៃបុណ្យជាតិរបស់ខ្លួន។
ក្នុងការដោះលែងអ្នកទោសទ្រង់ទ្រាយធំរបស់របបយោធាមីយ៉ាន់ម៉ានាពេលនេះ ត្រូវបានគេចាត់ទុកថា គឺជាការវិវឌ្ឍជាវិជ្ជមានមួយ ដើម្បីឈានទៅរកដំណោះស្រាយនៅប្រទេសមីយ៉ាន់ម៉ា ដែលជាក្តីសង្ឃឹមក្នុងការនាំមីយ៉ាន់ម៉ាមកកាន់វេទិកាអាស៊ានជាថ្មីឡើងវិញ។។
