ប៊ែលហ្ស៉ិក៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកបានថ្លែងគូសបញ្ជាក់ថា នៅពេលខាងមុខរាជរដ្ឋាភិបាលកម្ពុជា ត្រូវសាងសង់ស្ពានចំនួន ៣បន្ថែម ដើម្បីពន្លឿនក្នុងការកសាងហេដ្ឋារចនាសម្ព័ន្ធ ជំរុញនូវការអភិវឌ្ឍន៍សេដ្ឋកិច្ចជាតិ។
ការថ្លែងរបស់សម្តេចតេជោ ធ្វើឡើងនាឱកាសអញ្ជើញជួបសំណេះសំណាលជាមួយ បងប្អូនខ្មែរជាង២ពាន់នាក់ នៅទ្វីបអឺរ៉ុប នៅយប់ថ្ងៃទី១២ ខែធ្នូ ឆ្នាំ២០២២។
សម្តេចតេជោលោកបានគូសបញ្ជាក់ថា ស្ពានទាំង៣ ដែលត្រូវសាងសង់បន្ថែមនេះរួមមានគឺ៖
១/ស្ពានទី១. នឹងបើកការដ្ឋាននាដើមខែមករា ឆ្នាំ២០២៣ ដែលឆ្លងកាត់ទន្លេមេគង្គ ត្រង់ខេត្តក្រចេះ។ ស្ពាននេះមានការចាំបាច់សម្រាប់តភ្ជាប់ពីខេត្តក្រចេះ ឆ្ពោះទៅខេត្តកំពង់ធំ ដោយកាត់បន្ថយការធ្វើដំណើររបស់ប្រជាពលរដ្ឋ ដែលកន្លងមកត្រូវធ្វើដំណើរទៅខេត្តកំពង់ធំ ត្រូវឆ្លងចូលមកខេត្តត្បូងឃ្មុំ និងកំពុងចាម ប៉ុន្តែនៅពេលស្ពានថ្មីនេះសាងសង់រួច គឺធ្វើដំណើរពីក្រចេះទៅកំពង់ធំបានដែរម្តង។
២/ស្ពានទី២. នៅឯរាជធានីភ្នំពេញវិញ គឺជាស្ពានមិត្តភាពកម្ពុជា.សាធារណរដ្ឋកូរ៉េ ដែលភ្ជាប់ពីផ្សាររាត្រី.ជ្រោយចង្វារ និងពីជ្រោយចង្វារ.អរិយក្សត្រ ដែលបានចុះហត្ថលេខាទទួលឥណទានពីប្រទេសកូរ៉េ នូវទឹកប្រាក់ប្រមាណជិត ២៥០លានដុល្លារ។ ស្ពាននេះត្រូវបានសាងសង់ស្ពានចំនួន២ ដែលទី១ ឆ្លងកាត់ទន្លេសាប .ចាប់ផ្តើមពីចំណុចម្តុំសួនផ្សាររាត្រី {ផ្សារចាស់} ឆ្លងកាត់ទៅត្រើយម្ខាងជ្រោយចង្វារ និងទី២ ឆ្លងកាត់ទន្លេមេគង្គ ចាប់ផ្តើមពីចំណុចត្រើយម្ខាងជ្រោយចង្វារ [ក្បែរសណ្ឋាគារសុខា] ឆ្ពោះទៅឃុំអរិយក្សត្រ [ស្រុកល្វាឯម.ខេត្តកណ្តាល]។
៣/ស្ពានទី៣. នៅឯរាជធានីភ្នំពេញផងដែរ គឺភ្ជាប់ពីផ្លូវជាតិលេខ១ ទៅកាន់ស្រុកល្វាឯម ខេត្តកណ្តាល ដែលរាជរដ្ឋាភិបាលត្រូវចំណាយទឹកប្រាក់ប្រមាណ ២០០លានដុល្លារ។ ស្ពាននេះមានតួនាទីសំខាន់ ក្នុងការតភ្ជាប់ជាមួយផ្លូវល្បឿនលឿន ពីរាជធានីភ្នំពេញទៅក្រុងបាវិត ខេត្តស្វាយរៀង។ ក្នុងការឆ្លងកាត់ស្ពាននេះ មិនតម្រូវឲ្យបង់ប្រាក់នោះឡើយ លើកលែងតែឆ្លងកាត់ផ្លូវល្បឿនលឿនប៉ុណ្ណោះ ដែលត្រូវតែបង់ប្រាក់។។
