ក្រុមសភាជាតិកម្ពុជា នៃអ្នកនយោបាយស្ត្រី រៀបចំកម្មវិធី “យុទ្ធនាការនារីវ័យក្មេង ឆ្ពោះទៅភាពជាអ្នកដឹកនាំ #Girl2Leader” នៅខេត្តកំពង់ចាម

ភ្នំពេញ៖ “យុទ្ធនាការនារីវ័យក្មេងឆ្ពោះទៅភាពជាអ្នកដឹកនាំ #Girl2Leader” នាពេលនេះ ក្រុមសភាជាតិកម្ពុជានៃអ្នកនយោបាយស្ត្រី បានរៀបចំធ្វើឡើងនៅក្នុងសាលប្រជុំសាលាខេត្តកំពង់ចាម នាព្រឹកថ្ងៃទី១២ ខែធ្នូ ឆ្នាំ២០២២ ក្រោមអធិបតីរបស់ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា និងជាអនុប្រធានក្រុមសភាជាតិកម្ពុជានៃអ្នកនយោបាយសភាស្ត្រី។

ថ្លែងនៅក្នុងយុទ្ធនាការ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា បានមានប្រសាសន៍ថា​ យុទ្ធនាការនេះធ្វើឡើងក្នុងគោលបំណងផ្តល់ការណែនាំអំពីជីវិតនយោបាយផ្ទាល់ខ្លួនរបស់សមាជិកាសភាជាស្ត្រីទៅដល់នារីវ័យក្មេង និងបង្ហាញនារីវ័យក្មេងថា នយោបាយគឺជាការងាររបស់ស្ត្រី និងជម្រុញឱ្យនារីវ័យក្មេងពិចារណាអនាគតក្នុងភាពជាអ្នកដឹកនាំ ដើម្បីឱ្យនារីវ័យក្មេងចូលរួមក្នុងនយោបាយកាន់តែច្រើន ដើម្បីសម្រេចបាននូវសមភាពយេនឌ័រ សំដៅជំរុញឱ្យនារីវ័យក្មេងអាចកសាងទំនុកចិត្តលើខ្លួនឯងកាន់តែខ្ពស់ មានក្តីសុបិន្តធំ នឹងយកគម្រូតាមអ្នកនយោបាយជាស្ត្រី។

យុទ្ធនាការនេះ មានការអញ្ជើញចូលរួមពី លោកជំទាវ កុល ធារិន សមាជិកាគណៈកម្មការទី២ នៃរដ្ឋសភា និងជាតំណាងរាស្ត្រមណ្ឌលខេត្តកំពង់ចាម លោកជំទាវ ស្រី គឹមឆយ សមាជិកាគណៈកម្មការទី១ នៃរដ្ឋសភា និងជាអ្នកតំណាងរាស្រ្តមណ្ឌលខេត្តកំពង់ចាម លោកជំទាវ ខុង ស៊ុនអេង សមាជិកាគណៈកម្មការទី៤ នៃរដ្ឋសភា និងជាអ្នកតំណាងរាស្រ្តមណ្ឌលខេត្តកំពង់ចាម លោកជំទាវ ស៊ី វណ្ណថា សមាជិកាគណៈកម្មការទី៩ នៃព្រឹទ្ធសភា និងជាសមាជិកាក្រុមសភាជាតិកម្ពុជា នៃអ្នកនយោបាយសភាស្ត្រី ថ្នាក់ដឹកនាំរដ្ឋបាលខេត្តកំពង់ចាម​ ព្រមទាំងមន្ត្រីនៃអគ្គលេខាធិការដ្ឋានរដ្ឋសភា ក្រុមការងារមជ្ឈមណ្ឌលសភាអាស៊ី ស្ត្រីនៅមូលដ្ឋានធ្វើការអំពីសមភាពយេនឌ័រ អង្គភាពពាក់ព័ន្ធមួយចំនួនជុំវិញខេត្ត លោកគ្រូ អ្នកគ្រូ សិស្សានុសិស្ស នៅក្នុងទីរួមខេត្តកំពង់ចាម ប្រមាណជាង ២២០នាក់ ៕