ថ្នាក់ដឹកនាំខេត្តបន្ទាយមានជ័យ ចូលរួមចែកអំណោយមនុស្សធម៌ជូនពលរដ្ឋក្រីក្រ ១០០គ្រួសារ និងសម្ភារសិក្សា ដល់សិស្សានុសិស្ស
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោកជំទាវ នាថ្ងៃទី១១ ធ្នូ បានអញ្ជើញចូលរួមជាមួយលោកស្រី យី គឹមអួ ព្រមទាំងក្រុមគ្រួសារ (មកពីសហរដ្ឋអាមេរិក) បានផ្តល់អំណោយមនុស្សធម៌ដល់គ្រួសារក្រីក្រចំនួន ១០០គ្រួសារ និងសម្ភារសិក្សាកាបូប សម្លៀកបំពាក់ កុំព្យូទ័រថវិកា ដល់សិស្សានុសិស្ស សាលារៀនអនុវិទ្យាល័យ-បឋមសិក្សា និងកុំព្យូទ័រដល់រដ្ឋបាលឃុំចង្ហា ក្នុងឃុំចង្ហា ស្រុកអូរជ្រៅ ខេត្តបន្ទាយមានជ័យ ។
ប្រជាពលរដ្ឋក្រីក្រចំនួន ១០០គ្រួសារ ដោយគ្រួសារនីមួយៗទទួលបាន-អង្ករ២០គីឡូក្រាម, ប៊ីចេង ១គីឡូក្រាម, អំបិល ១គីឡូក្រាម, ស្ករស ១គីឡូក្រាម, ត្រីខ ១យួរ, មី ១កេ, ខ្លាញ់ ១លីត្រ, ទឹកស៊ីអ៊ីវ ១យួ, ទឹកត្រី ១យួរ និងថវិកាមួយចំនួន ដោយឡែកសិស្សក្រីក្រចំនួន ៣០នាក់ ក្នុងម្នាក់ៗទទួលបាន កាបូប សម្លៀកបំពាក់ ១កំប្លេ
សៀវភៅ ១០ក្បាល់ ប៊ិច ១០ដើម បន្ទាត់ ១ឈុត និងថវិកាមួយចំនួន។ រដ្ឋបាលឃុំ កុំព្យូទ័រចំនួន ២៥គ្រឿង និងស្លាយ ២គ្រឿង សម្រាប់ធ្វើការបែងចែកបន្តដល់អង្គភាបចំណុះសាលារៀន មណ្ឌលសុខភាព។
ថ្លែងសំណេះសំណាលជាមួយពុកម៉ែបងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្ស ឯកឧត្តម អ៊ុំ រាត្រី បានគូសបញ្ជាក់ថា ដោយការគិតគូរពីសុខទុក្ខលំបាករបស់បងប្អូនប្រជាពលរដ្ឋ និងក្តីស្រលាញ់នឹករលឹកដល់បងប្អូននៅឃុំចង្ហា លោកស្រី យី គឹមអួ ព្រមទាំងក្រុមគ្រួសារ បច្ចុប្បន្នរស់នៅសហរដ្ឋអាមេរិក លោកស្រី ព្រមទាំងកូនចៅ ធ្លាប់បានមករស់នៅលើទឹកដី នៃឃុំចង្ហានេះ។ កម្មវិធីផ្តល់អំណោយមនុស្សធម៌ និងសម្ភារៈសិក្សានាពេលនេះមិនមែនជាលើកទី១នោះទេ ជាច្រើនមកហើយជារៀងរាល់ឆ្នាំ លោកស្រី តែងផ្តល់មកជូនគ្រួសារជួបការលំបាក។
ឯកឧត្តមអភិបាលខេត្ត បានបន្ថែមថា ការផ្តល់អំណោយនេះ ជាការចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងដោះស្រាយជីវភាពប្រជាពលរដ្ឋដែលជួបការលំបាក៕
