លោកXi Jinpingប្រធានរដ្ឋចិនអញ្ជើញចូលរួមកិច្ចប្រជុំកំពូលចិន-ក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស ព្រមទាំងថ្លែងសុន្ទរកថាគន្លឹះ

រសៀលថ្ងៃទី៩ ខែធ្នូ តាមម៉ោងក្នុងតំបន់ កិច្ចប្រជុំកំពូលចិន-ក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្សបានបើកធ្វើនៅក្រុងរីយ៉ាត។កិច្ចប្រជុំបានសម្រេចថា បង្កើតនិងបង្កើនទំនាក់ទំនងភាពជាដៃគូយុទ្ធសាស្ត្ររវាងចិននិងបណ្ដាប្រទេសអារ៉ាប់ជាប់ឈូងសមុទ្រពែក្ស។
លោកXi Jinpingប្រធានរដ្ឋចិនបានថ្លែងសុន្ទរកថាគន្លឹះក្រោមប្រធានបទ «បន្តអតីតកាលឆ្ពោះទៅអនាគត ពួតដៃគ្នា ដើម្បីរួមគ្នាត្រួតត្រាយអនាគតដ៏ល្អបវរនៃទំនាក់ទំនងរវាងចិននិងបណ្ដាប្រទេសអារ៉ាប់ជាប់ឈូងសមុទ្រពែក្ស»។លោកXi Jinpingបានលើកឡើងថា យើងគួរបន្តប្រពៃណីដ៏មេត្រីភាពរវាងចិននិងបណ្ដាប្រទេសអារ៉ាប់ជាប់ឈូងសមុទ្រពែក្ស ចាត់ទុកការបង្កើតទំនាក់ទំនងភាពជាដៃគូយុទ្ធសាស្ត្ររវាងចិននិងបណ្ដាប្រទេសអារ៉ាប់ជាប់ឈូងសមុទ្រពែក្សជាកាលានុវត្តភាព បន្ថែមបំពេញខ្លឹមសារខាងយុទ្ធសាស្ត្រចូលទៅក្នុងទំនាក់ទំនងរវាងចិននិងបណ្ដាប្រទេសអារ៉ាប់ជាប់ឈូងសមុទ្រពែក្ស។ លោកបានសង្កត់ធ្ងន់ថា ៣ដល់៥ឆ្នាំខាងមុខ ប្រទេសចិនរីករាយជាមួយប្រទេសនៃក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្សខិតខំប្រឹងប្រែងលើវិស័យកិច្ចសហប្រតិបត្តិការសំខាន់ៗ៖ទី១ កសាងនិម្មាបនកម្មថ្មីនៃកិច្ចសហប្រតិបត្តិការថាមពលបីវិមាត្រ។ទី២ ជំរុញការវិនិយោគនិងកិច្ចសហប្រតិបត្តិការផ្នែកហិរញ្ញវត្ថុទទួលបានវឌ្ឍនភាពថ្មី។ទី៣ ត្រួសត្រាយវិស័យថ្មីនៃកិច្ចសហប្រតិបត្តិការខាងការឆ្នៃប្រឌិតបច្ចេកវិទ្យា។ទី៤ សម្រេចបានការវាយទម្លុះថ្មីនៃកិច្ចសហប្រតិបត្តិការខាងអវកាស។ទី៥ បង្កើតចំណុចសំខាន់ថ្មីក្នុងកិច្ចសហប្រតិបត្តិការផ្នែកភាសានិងវប្បធម៌។
កិច្ចប្រជុំបានចេញផ្សាយ«សេចក្តីថ្លែងការណ៍រួមនៃសាធារណរដ្ឋប្រជាមានិតចិននិងក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស» និងអនុម័តលើ«ផែនការប្រតិបត្តិការពីឆ្នាំ២០២៣ដល់ឆ្នាំ២០២៧ស្តីពីកិច្ចសន្ទនាយុទ្ធសាស្ត្ររវាងសាធារណរដ្ឋប្រជាមានិតចិននិងក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស» ដែលបានគ្រោងផែនការចំពោះកិច្ចសហប្រតិបត្តិការគ្រប់វិស័យរវាងចិននិងបណ្តាប្រទេសនៃក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស៕