សម្តេចតេជោ ហ៊ុន សែន៖ កត្តាសំខាន់បំផុតនាំឱ្យក្រុមហ៊ុនទាំងអស់ អាចបន្តវិនិយោគនៅកម្ពុជា គឺត្រូវការចាំបាច់បំផុត គឺសុខសន្តិភាព និងស្ថេរភាពនយោបាយ

ភ្នំពេញ៖ សម្តេចតេជោ ហ៊ុន សែន នាយកករដ្ឋមន្ត្រីនៃកម្ពុជា បានថ្លែងថា កត្តាសំខាន់បំផុតដែលនាំឱ្យក្រុមហ៊ុនទាំងអស់អាចបន្តវិនិយោគនៅកម្ពុជា គឺត្រូវការចាំបាច់បំផុត គឺសុខសន្តិភាព និងស្ថេរភាពនយោបាយ។

ក្នុងឱកាសអញ្ជើញជាអធិបតីប្រារព្ធពិធីអបអរសាទរខួប១១ឆ្នាំ នៃប្រតិបត្តិការរបស់ក្រុមហ៊ុនមីនេបៀ Minebea (Cambodia) របស់ជប៉ុន នៅកម្ពុជា នាថ្ងៃទី១ ធ្នូនេះ សម្ដេចតេជោ ហ៊ុន សែន បានមានប្រសាសន៍ថា ជំនឿចិត្ត ជាចំណុចពិសេសនៃការរីកលូតលាស់របស់ក្រុមមីនេបៀ របស់ជប៉ុននៅកម្ពុជា។ សម្តេចតេជោបានមានប្រសាសន៍ទៀតថា គោលនយោបាយវិនិយោគរបស់កម្ពុជាគឺ «ត្រីណាមកមុនចាប់យកមុន » គឺមិនប្រកាន់ត្រីតូច ឬត្រីធំនោះទេ។

សម្តេចតេជោបានរំលឹកថា កន្លងមកនេះ មានក្រុមហ៊ុនមួយបានស្នើអោយ សម្តេចបញ្ឈប់ការវិនិយោគរបស់ក្រុមហ៊ុនមីនេបៀនៅកម្ពុជា កាលពីឆ្នាំ២០១០ តែត្រូវបានសម្តេចបញ្ជាក់ទៅវិញថា សម្តេចមិនអាចបំពានការសម្រេច របស់សម្តេចបាននោះឡើយ។ សម្តេចតេជោបានបង្ហាញនូវក្តីរីករាយ ដែលបានរួមចំណែកឱ្យក្រុមហ៊ុនមីនេបៀនៅកម្ពុជា មានការរីកចម្រើនជាមួយនឹងទុនកើនដល់ ៦០០លានដុល្លារ និងមានមានកម្មករបម្រើការងាររហូតដល់ ៦ពាន់នាក់នេះ។

សម្តេចតេជោក៏បានថ្លែងកោតសរសើរ ភាពសុខដុមរវាងរោងចក្រមីនេបៀ និងកម្មកររោងចក្រ ដោយមិនដែលមានផ្ទុះបាតុភាព អ្វីទាំងអស់ជាមួយកម្មករ។ សម្តេចតេជោ ហ៊ុន សែន បានកត់សម្គាល់ថា ភាពសុខដុមនៅក្រុមហ៊ុនមីនេបៀ ជាពិសោធន៍ល្អនៃការគ្រប់គ្រង។ សម្តេចតេជោ បានណែនាំរោងចក្រនានា យកពិសោធន៍គ្រប់គ្រងពីក្រុមហ៊ុនមីនេបៀ។

សម្ដេចតេជោក៏បានផ្ដល់ជូនដល់កម្មករកម្មការិនី ដែលបម្រើការងារនៅក្រុមហ៊ុនមីនេបៀ ប្រមាណជាង៦ពាន់នាក់ដោយម្នាក់ៗ ទទួលបាន៥ម៉ឺនរៀល និងផ្ដល់ជូនដល់កម្មការិនីមានផ្ទៃពោះចំនួន ១៧៨នាក់ ដោយម្នាក់ៗទទួលបាន១លានរៀលផងដែរ។ សម្តេចតេជោក៏បានជូនពរបងប្អូន កម្មករកម្មការិនីទាំងអស់ទទួលបាននូវសេចកីសុខ សេចកីចម្រើន និងជោគជ័យក្នុងការងារជាបន្តបន្ទាប់ទៀត ៕