មហាសន្និបាតវិសាមញ្ញសហភាពសហព័ន្ធយុវជនកម្ពុជា បោះឆ្នោតជ្រើសតាំងឯកឧត្ដមបណ្ឌិត ហ៊ុន ម៉ាណែត ជាប្រធានកិត្តិយស
ភ្នំពេញ៖ មហាសន្និបាតវិសាមញ្ញសហភាពសហព័ន្ធយុវជនកម្ពុជា នៅរសៀលថ្ងៃទី២៦ ខែវិច្ឆិកា ឆ្នាំ២០២២នេះ បានបោះឆ្នោតជ្រើសតាំង ឯកឧត្ដមបណ្ឌិត ហ៊ុន ម៉ាណែត ជាប្រធានកិត្តិយស។
មហាសន្និបាតក៏បានបោះឆ្នោតជ្រើសតាំង ឯក ឧត្ដមទៀ សីហា ជាអនុប្រធានសហភាពសហព័ន្ធយុវជនកម្ពុជា និងសមាជិកគណៈអចិន្ដ្រៃយ៍បន្ថែមចំនួន០៩រូប ព្រមទាំងសមាជិក សមាជិកា គណៈកម្មាធិការកណ្ដាលថ្មី ចំនួន២០៣រូបបន្ថែមទៀតផងដែរ។
អង្គមហាសន្និបាតវិសាមញ្ញ ស.ស.យ.ក. នៅនៅនេះ បានអនុម័តវិសោធនកម្មលក្ខន្តិកៈ និងបទបញ្ជាផ្ទៃក្នុងនិងស្របតាមតួនាទីភារកិច្ចរបស់ ស.ស.យ.ក.។ មហាសន្និបាតវិសាមញ្ញ បានពិភាក្សាលើសកម្មភាព និងការសម្រេចបានកន្លងមក ក៏ដូចជាការពិនិត្យ និងអនុម័តវិសោធនកម្មលក្ខន្តិកៈ និងបទបញ្ជាផ្ទៃក្នុង។
អង្គសន្និបាត ក៏មានការឡើងជារបាយការណ៍ និងបទអន្តរាគមន៍យ៉ាងខ្លាំងក្លាពីសំណាក់សមាជិក សមាជិកា នៃអង្គមហាសន្និបាត មតិយោបល់ទាំងលើរបាយការណ៍ទិសដៅការងារ និងកិច្ចពិភាក្សាផ្សេងៗ។
ជាមួយគ្នានេះដែរ ក្រោយបញ្ចប់វគ្គពិភាក្សា លោក ឌី វិជ្ជា អនុប្រធានសសយក និងជាប្រធានអនុគណៈកម្មការដឹកនាំវិសោធនកម្មលក្ខន្តិកៈ បានធ្វើរបាយការណ៍ស្តីពីសំណើរវិសោធនកម្មលក្ខន្តិកៈស.ស.យ.ក. ជូនដល់អង្គពិធី។
សូមបញ្ជាក់ថា មហាសន្និបាតវិសាមញ្ញទូទាំងប្រទេសរបស់ស.ស.យ.ក. រយៈពេល២ថ្ងៃ មានគោលបំណងសំខាន់ៗ ចំនូន៤៖
ទី១/ បូកសរុបសកម្មភាព និងសមិទ្ធផលការងារចន្លោះមហាសន្និបាតលើកទី៤ រហូតដល់បច្ចុប្បន្ន
ទី២/ ពិនិត្យ និងអនុម័តវិសោធនកម្មលក្ខន្តិកៈ និងបទបញ្ជាផ្ទៃក្នុង របស់ ស.ស.យ.ក.
ទី៣/បោះឆ្នោតបំពេញបន្ថែមសមាសភាពសមាជិកគណៈកម្មាធិការកណ្តាល
ទី៤/ ពិនិត្យ និងអនុម័តផែនការយុទ្ធសាស្ត្រ [យុវជនក្នុងបុព្វហេតុជាតិមាតុភូមិ ២០២៣-២០២៨] របស់ ស.ស.យ.។។
