ព្រះមហាក្សត្រ ទ្រង់ចេញព្រះរាជក្រឹត្យត្រាស់បង្គាប់តែងតាំងនាយឧត្តមសេនីយ៍សាស្ត្រាចារ្យ ជា តារា ជារដ្ឋមន្ត្រីប្រតិភូអមនាយករដ្ឋមន្ត្រី

ភ្នំពេញ៖ នាយឧត្តមសេនីយ៍សាស្ត្រាចារ្យ ជា តារា ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ទទួលបន្ទុកជាសាកលវិទ្យាធិការ សាកលវិទ្យាល័យការពារជាតិ ត្រូវបានព្រះមហាក្សត្រ ប្រោសព្រះរាជទាន ព្រះរាជក្រឹត្យតែងតាំងជា រដ្ឋមន្ត្រីប្រតិភូអមនាយករដ្ឋមន្ត្រី បន្ថែមលើមុខងារបច្ចុប្បន្ន តាមសំណើទូលថ្វាយរបស់សម្តេចតេជោ ហ៊ុន សែន។

សូមបញ្ជាក់ថា នាយឧត្តមសេនីយ៍ ជា តារា ត្រូវបានគេដឹងថា ជាមេទ័ពមួយរូបដែលមានចំណេះជំនាញ លើវិស័យការពារជាតិដ៏ប៉ិនប្រសប់ ដោយបានបញ្ចប់ការសិក្សាលើវិស័យការពារជាតិនៅក្រៅប្រទេសមួយចំនួន ជាពិសេសឆ្លងកាត់សាលាសង្គ្រាម [École de guerre] និងថ្នាក់ជាន់ខ្ពស់ នៅមជ្ឈមណ្ឌលសម្រាប់ការសិក្សា ការទូត និងយុទ្ធសាស្ត្រ CEDS [Centre d’Études Diplomatiques et Stratégiques, CEDS] នៅប្រទេសបារាំង មិនតែប៉ុណ្ណោះ នាយទាហាន ដែលពោរពេញទៅដោយយុទ្ធសាស្ដ្រ និងកលយុទ្ធលើសមរភូមិរូបនេះ បានចូលរួមចំណែកយ៉ាងច្រើនក្នុងបុព្វហេតុជាតិមាតុភូមិ ដែលដឹកនាំដោយសម្ដេចតេជោ ហ៊ុន សែន មេបញ្ជាការផុតលេខ ផ្កាយមាស៥ តាំងពីឆ្នាំ១៩៧៨ ឆ្លងកាត់សមរភូមិជាច្រើនលើក ប្រកបដោយឆន្ទៈមោះមុត ស្មោះត្រង់ គាំទ្រ និងការពារដាច់ខាត ចំពោះជាតិ មាតុភូមិ។។