ឧត្តមសេនីយ៍ឯក ហួត ឈាង អញ្ជើញសំណេះសំណាល បំពាក់ឋានន្តរសក្តិ និងគ្រឿងឥស្សរិយយស ជូនយោធិនចូលសោធននិវត្តន៍ របស់អង្គភាពយោធភូមិភាគទី១ កងទ័ពជើងគោក ប្រចាំឆ្នាំ២០២២

ភ្នំពេញ៖ ឯកឧត្តម ឧត្តមសេនីយ៍ឯក ហួត ឈាង មេបញ្ជាការរងកងទ៍ពជើងគោក មេបញ្ជាការយោធភូមិភាគទី១ នាថ្ងៃទី១៥ ខែវិច្ឆិកា ឆ្នាំ២០២២ បានអញ្ជើញជាអធិបតី ក្នុងពិធីសំណេះសំណាល សួរសុខទុក្ខ បំពាក់ឋានន្តរសក្តិ បំពាក់គ្រឿងឥស្សរិយយស ជូនយោធិនដែលត្រូវដាក់ឲ្យចូលសោធននិវត្តន៍ របស់អង្គភាពយោធភូមិភាគទី១ កងទ័ពជើងគោក ប្រចាំឆ្នាំ២០២២។

មានមតិសំណេះសំណាលជាមួយយោធិនដែលត្រូវដាក់ឲ្យចូលសោធននិវត្តន៍ចំនួន ៤១នាក់ របស់ អង្គភាព យោធភូមិភាគទី១ ក្នុងឱកាសនោះ ឯកឧត្តម ឧត្តមសេនីយ៍ឯក ហួត ឈាង បានពាំនាំ នូវការផ្តាំផ្ញើ សាកសួរសុខទុក្ខ ពីសំណាក់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក ចំពោះបងប្អូនយោធិនដែលត្រូវដាក់ឲ្យចូលសោធននិវត្តន៍របស់អង្គភាពយោធភូមិភាគទី១ និងបានថ្លែងនូវការ កោតសរសើរ ចំពោះគំរូវីរៈភាព ដ៏អង់អាចក្លាហានរបស់បងប្អូនយើង រយៈកាលកន្លងមក ដែលបានតស៊ូពុះពារឆ្លងកាត់ការលំបាក គ្រោះថ្នាក់ និងឧបសគ្គនានា ហ៊ានពលីជីវិត ដើម្បីបុព្វហេតុ ការពារបូរណភាពទឹកដី ការពារជាតិ សាសនា ព្រះមហាក្សត្រ ។

ឯកឧត្តម បានផ្តាំផ្ញើថា៖ ពេលបងប្អូនវិលត្រឡប់ទៅមូលដ្ឋានវិញ ត្រូវធ្វើខ្លួនឲ្យក្លាយជាពលរដ្ឋដ៏ល្អ របស់សង្គមជាតិ ដោយត្រូវគោរពច្បាប់នានារបស់រដ្ឋឲ្យបានល្អ ខិតខំបំពេញការងារបង្ករបង្កើនផល និងប្រកប របររកស៊ីចិញ្ចឹមជីវិតប្រកប ដោយភាពសុច្ចរិត ចូលរួមគ្រប់សកម្មភាពសង្គម ជាពិសេស ត្រូវចូលរួមចុះ ឈ្មោះបោះឆ្នោត និងត្រូវទៅបោះឆ្នោត ជ្រើសរើសតំណាងរាស្ត្រអាណត្តិទី ៧ ដែលនឹងប្រព្រឺត្តទៅនៅពេលខាងមុខនេះ ។

ក្នុងឱកាសនោះ ឯកឧត្តម ឧត្តមសេនីយ៍ឯក ហួត ឈាង មេបញ្ជាការរងកងទ៍ពជើងគោក បាននាំយកនូវថវិកាជាអំណោយរបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកង យោធពលខេមរភូមិន្ទ មេបញ្ជការកងទ័ពជើងគោក ជូនចំពោះយោធិនដែលត្រូវដាក់ឲ្យចូល សោធននិវត្តន៍ទាំងអស់ ក្នុងម្នាក់ៗចំនួន ២០ម៉ឺនរៀល អំណោយរបស់ ឯកឧត្តមមេបញ្ជាការយោធភូមិភាគទី១ ក្នុងម្នាក់ៗចំនួន ២០ម៉ឺនរៀល អង្ករ ១បេ ព្រមទាំងគ្រឿងឧបភោគបរិភោគម្នាក់១កញ្ចប់ធំផងដែរ ៕